Read Pochuri Naga 1 KORINTHIARI 16 Bible Online

1 KORINTHIARI 16 - Pochuri Naga bible

1 KORINTHIARI 16

¹ Judea vü kütsotüri kenüh zanyoküvizhuhwa hi nüh Galatia kümühuri vü küüza kümüjie nohri nga saluo.

²Jüasekhe rülo pokhuwa kürüzhu nohri nyi küsüsü nga Saküüwuowa nüh ma tsiakütsü kümüjie zanyo vizhuh luo, jüüta thuoüji hi küru vü zanyoküvizhuh küsawanyu thuoh.

³Thi hi ru thuoüji nohri nüh rüka küsari nohri nüh zanyo vizhuhküsari vi nü lasi rhü nü Jerusalem vü küze naveh.

⁴Mükütüküzü hi nga müwaji mümühie ta thuoüji mari hi sienü küwa nga sanaveh.

⁵Hi nüh Makedonia kari küwa ase vünüh ru nohri mütu naveh, küpakenühnyunü hi tü Makedonia vünüh kari küru küüropehküveh kenüh.

⁶Thi hi ru nü nohri sie tsotho pike peh naveh, samühie thuoüji küsosa ajü pehtewa tü müthsü, küpakenühnyunü hi wuovü nga watü nohri nüh shishi ta hi küüze na küsa kenüh.

⁷Hi nüh ru kari küwa vünüh nohri kümütu mpa nyunü VÜWAkümüshe thuoüji ru tsotho pike nohri sieküpe müngu veh.

⁸ Thitü Pentecost tsotho küju thuoüji Efesa vü pehtewa naveh.

⁹Küpakenühnyunü amükhie kümüza küsü küüro samühie shehna küsa sa hi vü tsü küsa kenüh, thi jüla mükünongüri nga hozake peh veh.

¹⁰Thi Timothi ru thuoüji kümühieti loküzhe vünüh nohri azhievü siepehla luo, küpakenühnyunü ma tü hi kümüjie VÜWAzhuh küro kütse kenüh.

¹¹Nyi küsü nga ma mükükuletümü. Jütisanü shiti ma hi vü küze luo, jütathuoüji ma tü hi vü shele rura naveh; küpakenühnyunü ma tü afüri sie nü küru tsotü küveh kenüh.

¹²Thi hiri afüwa Apollo thuoüji afü küpari sie nü ru nohri mütu üti wurie hi nüh ma vü küzathuoh, thitü khinyi ru na küsa makümüshe nyuwie ta. Thitü ma tsotho kükato ngu thuoüji ma nga ru naveh.

¹³Huotoke la wie luo, nohri kütsotü vü mükünga tü küto shepela luo, sashe satsie la luo, thi müzho luo.

¹⁴Nohri nüh zanyo küsa aveh vü Khrista küümze vünüh saluo.

¹⁵Thi eh füri, Akhaia vü Stefena tsapari nüh luoveh kükhaphrükhu ta küsa nohri nga thsüvehthuoh, thi mari tü kümtseri küürovü tsotho aveh thse tse veh,

¹⁶nohri wie nga nyi jümari thi kürü küro kütseri thi münomüna kütseri sierhü kükhu vü peh üti nohri küchüveh.

¹⁷Thi Stefena thi Forjunata thi Akhaika mari kütse kenüh hi tü lozhe veh, küpakenühnyunü nohri mükünyie vü mari nüh nohri müthoh sakütsü kenüh,

¹⁸küpakenühnyunü mari nüh hi thi nohri sietse küchü kütsükenüh. Jükenüh nohri anyi jükümjie küsara kümüshe thsoshi satse luo.

¹⁹Asia vü kümühuri nüh loküzhe zhü nohri tsü veh. Aquila thi Presila thi mari azhe vü kümühuwa nüh kürü loküzhe zhüVÜWA vünüh tsü veh.

²⁰Afüri aveh nüh külozhe zhü küze veh. Kümtse küüme vünüh küsü nüh küsü loküzhe müke tsüluo luo.

²¹Hi, Paul, hi mpa eh ke vünüh rhü nü nohri vü loküzhe zhütsü veh.

²²Mükütüküzü wuori nüh VÜWA kenüh küümze münyie thuoüji ma tü küümüzümü luo. Hiri VÜWA tsethuoh!

²³VÜWA Jisu küümzewa nüh nohri siekütsewa saluo.

²⁴Khrista Jisu vünüh eh küümzewa tü nohri aveh siekütsewa saluo. Amen.