Read Pochuri Naga 1 KORINTHIARI 3 Bible Online

1 KORINTHIARI 3 - Pochuri Naga bible

1 KORINTHIARI 3

¹Thitü eh füri, hi thuoüji nohri vü sietse vünüh kürhori üta müphratera nüh samü, tü nohri tü asazüh vünüh kürhori thi Khrista wuovü kürünguori kümüjie vünüh phrateveh.

² Hi nüh nohri tü ashie kümüzho vi nohri avo müsanüh tünüju nüh nohri avo sa; küpakenühnyunü nohri tü jüma kenüh müküjie kenüh; thi khinyi wienga nohri tü müjiewie,

³küpakenühnyunü nohri tü khinyi nga asazüh azhi sawieveh. Küpakenühnyunü nohri azhie vü nokürüpa thi küüproluo thi refü küsuokhuo küpeh küju nü asazüh vü pemü veh ülo? Thi anyi azhih hala ma sasa vü rhoküvehri kümüjie nyu ülo?

⁴ Küpakenühnyunü nohri wuori nüh, “Hi nü Paul wuovü,” thi küpawa nüh, “Hi thuoüji Apollo wuovü,” ta küsa nohri tü azhih nyiri nyu ülo?

⁵Thinü Apollo tü thawa, thi Paul tü thawa lo? VÜWA nüh masü vü küüro kütsü kümüjie masü tü siepe wie thi nohri tü masü vünüh kütsotüra wie.

⁶Hi nüh shie thi Apollo nüh ajuh vi zü, thitü Saküüwuowa nüh saküüji wie.

⁷Jükenüh aküshiewa nga satü ajuhküzüwa nga satü zanyoküsünga nyu, thitü saküji kütsü thuoüji Saküüwuowa mpa nüh wie.

⁸Aküshiewa nga satü ajuhküzüwa nga satü zarike wie, thi masükhürü nga masü küüro rügi vünüh jisuo nguwie naveh.

⁹Küpakenühnyunü hiri tü kürü Saküüwuowa küüro küsarikhehwie, thi nohri thuoüji Saküüwuowa zhuh wiethuoh. Thi nohri tü Saküüwuowa azhe wiethuoh.

¹⁰Saküüwuowa küümze hi kütsü kümüjie azhe küsa thsü arokümühieri kümüjie hi nüh azhefowa sa tsü nü anyiküpari küsü nüh jüma rügi vünüh azhe sa veh. Thi küsüküsü nga jüma rügi vünüh mokümjie azhe sa veh nüh azhüküüzhü luo.

¹¹Küpakenühnyunü ajupe saküsawa nyia vü nyi küsü nga ajupe küpa müsalera, thi jümatü Jisu Khrista wiethuoh.

¹²Thi nyi küsüküsü nga satü ajupe jüma rügivü nüh suna, rakasa, aloh amekükhrawa, athso, amaguo thi aluosü vi azhe sathuoüji,

¹³nyi küsüsü küürowa tü küjoküütsa sanaveh. Rülo sehkhevünüh jüma thsüra naveh, küpakenühnyunü jümatü anyih nüh küjokütsanaveh, thi nyi küsüsü küüro mokümjie küsavünüh sahsaveh nüh anyih vünüh müteno naveh.

¹⁴Mükütüküzü anyi jüma nüh küro nü azhe saküsawatü pehrathuoüji ma tü ajisuo ngu naveh.

¹⁵Thitü mükütüküzü nyi küsüküsü küürowatü tsoja mütüthuoüji kria she naveh, ma nü küülole ngu wie ketünga anyihzhu vünüh jozhuküru kümüjie vünüh ngu naveh.

¹⁶ Nohri tü Saküüwuowa kükhurüzhe, thi Saküüwuowa Sietse nohri vü pehveh ta küsa müthsü ülo?

¹⁷Mükütüküzü anyi wuori nüh Saküüwuowa kükhurüzhe zorie thuoüji Saküüwuowa nga ma zoriemüwie naveh. Küpakenühnyunü Saküüwuowa kükhurüzhe tü mütsemü, thi noh tü kükhurüzhe jümawa wiethuoh.

¹⁸Nyi küsüwienga ma mpa ma müküümüratümü. Mükütüküzü nohri azhie vü khinyi kürho hala ma tü zanyoküthsüri ta müshe tse thuoüji ma tü zanyoküthsüri sana küsa kenüh ma tüküzheri küüsamü luo.

¹⁹ Küpakenühnyunü azhih hama zanyoküthsü thuoüji Saküüwuowa atüvü aküzhewie. Küpakenühnyunü jüma kenüh zhütsazhü vü rhüküsa: “Mari aro mühie tekütsevü Saküüwuowa nüh rerara ti,” ta rhü sa veh.

²⁰Jüma sevü nga zhütsazhü nüh küüza le: “Saküüwuowa nüh zanyoküthsüra kümüshe thuoüji momasa,” ta küza sa veh.

²¹Jükenüh nyi küsü nga nyiri kenüh mürhiezatümü luo. Küpakenühnyunü zanyo aveh tü nohri zhi wie.

²²Paul nga satü, Apollo nga satü, nyutü Pitor nga satü, azhih nga satü, akürho nga satü, aküsü nga satü, nyutü khinyi küpehri nga satü, atüvü ru na küsari nga satü aveh nohri azhikheh wie;

²³thi nohri tü Khrista azhi, thi Khrista tü Saküüwuowa azhi.