Read Pochuri Naga 1 KORINTHIARI 7 Bible Online

1 KORINTHIARI 7 - Pochuri Naga bible

1 KORINTHIARI 7

¹Nohri nüh lasi rhü nü hi küünawa rüle nohri tsü veh. Nyimpari tü avüvüh müvi ketünga azhümünyie.

²Thitü muomuokürho kümüngu kükrü kenüh nyimpari küsüküsü nga ma mpa ma vüvüh peh luo, thi nyimzari küsüküsü nga ma mpa ma vüpa peh luo.

³Avüpawa nga avüvühwa kümüngu zake satsüluo, thi jükümjie vüvühwa nga vüpawa kümüngu zake satsüluo, masü küsü nüh küsü müviji mükümühie kümüjie loküra satsüluo luo.

⁴Küpakenühnyunü avüvühwa tü ma mpa nyu nü vüpawa nüh ma satsa nyia vü avü sa veh, jükümjie vüpawa nga ma mpa nyunü vüvühwa nüh ma satsa nyia vü avü sa veh.

⁵Zhü küsü sanü tsotho pike kenüh küchie nüh küsü nüh küsü küja müsatümü, jümatü tsotho aveh vi kükhuo sanaküsa kenüh; thitü küüzhike küzüla vünüh Tsuore nüh müküümüra nta küsa kenüh shele kürü rhotewale luo.

⁶Hi nüh hama küüza thuoüji hakümjie wiethuoh ti küsa vünüh nyu thitü jüta sawie ketünga azhümünyie tünyie ti küsawiethuoh.

⁷Eh kümüngu thuoüji nyiri aveh nga hi kümüjie küüsa nthe. Thitü nyi küsüküsü nga Saküüwuowa vünüh aküte küütsapeh khe veh, nyi küsü nüh küpa thi küpawa nüh küpawa ti pehveh.

⁸Thitü vüpa vüvüh müküsari thitü nyivühri thuoüji hi kümüjie ma mpa küpehwa nüh küümphakhe ti küza veh.

⁹Thitü mükütüküzü müküüzhikera amüke vü pehveh üji münyumü luo. Küpakenühnyunü küraküpre peh na küsanü münyukümü nüh küümphakhe.

¹⁰ Thitü münyukümüri thuoüji hi nüh nyu nü VÜWA nüh vüvühwa tü vüpawa vünüh mükürüsuotümü üta küza veh;

¹¹thitü mükütüküzü nyimzawa nüh jüüta thuoüji ma tü vüpa müküüsale tümü luo, nyuthuoüji ma tü ma vüpa siekükale luo, thi vüpawa tü vüvühwa sie müküürüsuotümü.

¹²Hi nüh küpari vü küza veh (VÜWA nüh nyu nü hi mpa nüh): Khristanyiri küsü nüh mükütsotüvühri küsü za nü mavüvüh nüh ma sie rhowawie na küsa ma kümüshe thuoüji ma müjatümü luo.

¹³Thi Khristanyivühri küsü nüh mükütsotüpari küsü vü zanü ma vüpa nüh ma sie rhowawie na küsa ma kümüshe thuoüji ma vünüh temüwatümü luo.

¹⁴Küpakenühnyunü mükütsotü vüpawa tü ma vüvüh sie küsüküsa vünüh Saküüwuowa vü küvikütse samüthuoh, thi mükütsotüvühwa tü Khristanyi vüpawa vünüh Saküüwuowa vü küvikütse samüthuoh. Mükütüküzü hakümjie nyuthuoüji masü atsari tü mükütsotüri kümüjie samünathuoh; thitü hakümjie sakümü vünüh mari tü Saküüwuowa vü küvikütse samüthuoh.

¹⁵Thitü mükütüküzü masü azhie vü mükütsotüwa nüh Khristanyi küsawa vünüh tewa nta thuoüji küzemü luo. Hakümjie küsa kenüh thuoüji ma mpa nüh Khristanyi avüpawa nga satü thi vüvühwa nga satü kümüshe samühie veh. Küpakenühnyunü Saküüwuowa nüh luoveh rüzih nü küürho nta nohri ji sa veh.

¹⁶Nyura vüvüh sakütsewa noh tü mokümjie no vüpa külole naveh nüh noh tü thsüveh nü nyu lo? Nyura vüpa küsawa no vüvüh tü külole naveh nü nyu nüh noh tü thsüveh nü nyu lo?

¹⁷Nyi küsüküsü nga VÜWA nüh mokümjie vünüh rho üta satsü nüh thi Saküüwuowa nüh mokümjie vünüh ma ji nüh jükümjie vü mpa nüh rholuo. Nazizheh aveh vü hi nüh wule kütsü thuoüji hama wiethuoh.

¹⁸Anyi wuori ma küji tsotho vünüh ahu rhekümü thsoshiwa müküüjatümü. Anyi wuori ma küji tsotho vü ahu mürhe nüh ji ülo? Ma hurhe nti müsatümü.

¹⁹Küpakenühnyunü ahukürhe nga satü mükürhe nga satü zanyoküsü nga küchieke münyie, tü Saküüwuowa nüh azhükütsü kümüzhe vü mpa nüh wie.

²⁰Anyi küsüküsü nga ma küji tsotho vü mokümjie vünüh ji nüh jükümjie vünüh küpeh le.

²¹Noh küji tsotho vü noh tü siepe sapeh veh ülo? Jüma kenüh noluoveh mümüsütümü, thitü noh nüh noh mpa sakürüzih nü shura naveh üji jüma saluo.

²²Küpakenühnyunü anyi küsü nüh siepe sala nü VÜWA nüh jirathuoüji ma tü VÜWA nüh sakürüzih kütsüwa wiethuoh. Jükümjie ma küji tsotho vü thawa nüh rüzihla nü ma jira nüh ma thuoüji Khrista siepe wiethuoh.

²³Nohri tü ame nüh sü saveh, jükenüh anyira siepe müsatümüluo.

²⁴Jükenüh eh füri, nyi küsüküsü nga satü mokümjie küsavünüh ma ji nüh jükümjie küsa vünüh ma tü Saküüwuowa vü küüpehmü luo.

²⁵Thi mükümünyuhvühri kenüh thuoüji VÜWA vünüh azhükütsü münyie, thitü VÜWA küümze vünüh eh kümüshe tsü veh thi hama tsotüra mühie veh.

²⁶Khinyi nohri küsüro peküvehwa kenüh thuoüji eh kümüshe vü ma mokümjie küsa vü pehveh nüh jükümjie vünüh maküüpehkümü nüh küümpha naveh.

²⁷Noh tü avüvüh küsü kükhu vü pehveh thuoh ülo? Kürüsuo ntimüsatümü. Noh tü avüvüh müsanüh pehveh ülo? Vüvüh santi mümüshetümü.

²⁸Thitü mükütüküzü noh nüh vüvüh vimüwie ketünga kükhiemuo münyie, thi rülari küsü nüh vüpa samüwie ketünga kükhiemuo münyie, thitü vüvüh vüpa küsari thuoüji azhih vü akükho nguwie naveh, jükenüh hi nüh nohri tü jüma küükari nthe.

²⁹Eh füri, eh zhü thuoüji hama, phrateke küsa tsothowa thuoüji mülu shemüthuoh, jükenüh thari nüh vüvüh pehveh nüh mükünyieri kümüjie vünüh rholuo;

³⁰thi krie küvehri nga mükükrie kümüjie saluo, thi lozheküvehri nga mükülozhe kümüjie saluo, thi zanyo süküvehri nga zanyo mükünyieri kümüjie saluo;

³¹thi thari nüh azhih hama tsokrütseveh nüh mükütsokrü kümüjie saluo. Küpakenühnyunü azhih hama khukeri tü pehsuowa na samüküvehthuoh kenüh.

³²Hi nüh nohri tü luoveh küüraküpre vünüh rüzih nü küürhonthe. Vüvüh müküsari thuoüji VÜWA küüro vü tsaza nü mokümjie VÜWA külo sanaveh nüh ti sasati, küpakenühnyunü ma tü VÜWA külo sa nta amüshe thsekütse kenüh.

³³Thitü vüvüh vikümüri thuoüji azhih vü küüro tsaza nü mokümjie vüvühra külo sanaveh nüh ta sasati;

³⁴jütisanü ma küluozhewa tü küsuo mümüti. Thi nyimzari nyutü rülari avüpa müküsari thuoüji VÜWA küüro vü tsazanü mokümjie satsa vü thi sietse vü mütse nü rho naveh nüh ta satsetseti; thitü vüpa sakümüri thuoüji azhih vü küüro tsaza nü mokümjie ma vüpa külo sanaveh nüh ta satsetseti.

³⁵Hi nüh hama küphrate thuoüji nohri künyia kenüh wie, hi nüh nohri vü kükhete müsangü, thitü kümühieti küzhake thiVÜWA küüro vü amüshe künyi müsanüh amüshe aveh viküüro nthe.

³⁶Mükütüküzü nyi küsü nüh vüvüh müsanüh peh na küsa müsara nüh samü thi mükütüküzü küzhike na küsa khoshe müthuoüji ma müshe sanü vüvüh küüvimü luo, jüma kenüh kükhiemuo küsü nga münyie.

³⁷Thitü thari nüh luoveh lo vünüh zanyo küsü nga azhümünyieta kürathuoh müzho she nü küükhetera vü peh nü ma satsawa kümühieti sa nta thuoüji ma kenüh jüma nüh küümphakhe.

³⁸Jükenüh ma nüh ma küviza vi nü vüvüh sawie ketünga mühieveh; thitü thawa nüh vüvüh müsanüh sanaveh nüh jüma nüh küümphawa.

³⁹Vüvühwa tü ma kürho küju nü ma vüpa kükhu vü wiethuoh. Mükütüküzü ma vüpa sümüthuoüji ma mpa ma müshe vü zatewa mühieveh, thitü VÜWA vünüh sanaveh.

⁴⁰Thitü eh kümüshe kümüjie vünüh thuoüji ma tü vüpa müsale nüh jüüta pehteküwa nüh küülozhe naveh. Thi hi nüh kümüshe thuoüji hi tü Saküüwuowa Sietse pehveh ti müshe ve