Read Pochuri Naga 2 KORINTHIARI 11 Bible Online

2 KORINTHIARI 11 - Pochuri Naga bible

2 KORINTHIARI 11

¹Hi nüh küzhezah kümüjie sawie ketünga hi vü küüzhiketü nüh müngu veh. Hi vü küzhike luo.

²Thi VÜWA kümüjie hi tü nohri kürüpa veh, küpakenühnyunü nyimzari küsü nüh nyimpari küsü nga müthsü nüh avüpari vü küwate kümüjie Khrista atüvü viwa nü nohri ma vü küüzanti samüthuoh.

³ Thitü aro müsü nü amüre nüh Eve müra kümü kümüjie nohri tsaza nü kütse thi Khrista vü mütse nü tsüküveh nohri müshe nga mükünyu vü küjothse kümü hi nüh krü veh.

⁴Anyi wuori nüh ru Jisu küpa sosie, nyutü hiri vünüh vimüküsa sietse küpa küvi nyutü zhühlekümühie hiri vünüh viküsa mükünyu küpa kükhuvü teküwa nohri tü mükho.

⁵Hi nüh kümüshe thuoüji hi tü povüküsari küji ta sakütseri kükhu vünüh küzahtsawa nga nyu tünü.

⁶Ma mpa nüh hi tü zhüküphrate vü aro müthse sheh wie ketünga hi tü zanyo küthsü mükünyie nü nyu; lekhuji aveh vü nga zanyo aveh vü hama nohri vü saküthsü veh.

⁷Thinü ame münyie nüh hi nüh Saküüwuowa Zhühthe Kümühie wa phrate nü hi mpa hi saküza nü kükhiemuo sataji nohri sakümüsie ülo?

⁸Hi nüh nohri vü kürotsü na küsa kenüh küükra kümühie küpari vünüh vi nü mari müramüthuoh.

⁹ Thi hi nüh nohri siaküpeh vü hi nüh müvijimükümühie vü hi tü nohri nyi küsü nga saküsüro mütsü, küpakenühnyunü hi nüh müviji mükümühieri thuoüji afüri Makedonia vünüh küruri nüh kütsü kenüh. Jükenüh lekhuji aveh vü nga hi nüh nohri saküsüro müru thi saküüsürowa nyu.

¹⁰Khrista künyitsawa hi vü küpeh kümüjie Akhaia azhih vü eh loküzhewa tü zo ta peteküwa wa nyu.

¹¹Mokenüh lo? Hi nüh nohri müküümze kenüh ülo? Hi nüh kümüzeveh ta küsa Saküüwuowa nüh thsü veh.

¹²Hiri nüh küro küveh kümüjie küpari nüh lozhe thi mari nüh azhüleh ta sakütseri khete na küsa kenüh hi nüh mowa satse nüh mükütuo nüh sawa wie naveh.

¹³Jükümjie küsari tü povüküsa kürieri, müramüzhi nü kürokütseri, mari mpa nüh Khrista povüküsari ta atso sakütseri.

¹⁴Thi jütü küngo münyie, küpakenühnyunü Tsuore wie nga aküwie rügizhühleri kümüjie saküthse tseraküveh kenüh.

¹⁵Jükenüh ma sehnyiri wienga künyitsawa sieperi kümüjie saküthse nü kütse küngo münyie. Thitü sehkhe vü thuoüji mari nüh küüro mokümjie vünüh saküze nüh jükümjie vünüh viküze naveh.

¹⁶Hi nüh küzale naveh nü nyi küsü nga hi küzheri kümüjie mümüshetümü, thitü nohri nüh jütawie ketünga küzheri küsü ti saluo, jüüta thuoüji hi nga pike rhiezara naveh.

¹⁷Hi nüh hama küphrate thuoüji VÜWA kükhra vünüh nyu thitü mükrü nüh rhieza nü küzheri kümüjie vünüh phrate veh.

¹⁸Anyi hozake nga azhih zhi kenüh kürhieza kümüjie hi nga rhieza naveh.

¹⁹Küpakenühnyunü nohri tü zanyo thsü nü lozhe taji küzheri nga siake küveh kenüh.

²⁰Nohri tü nyi küsü nüh nohri vi siepe sawie ketünga, nyutü nohri retsa wienga, nyutü nohri nyia vü tewa ketünga nyutü nohri müküchie sawie nga; nyutü nohri nahkie jetsü wienga nohri tü küzhike tsü veh.

²¹Eh küzükrü vünüh küza na nü hiri thuoüji jüma kenüh nü mükhra wie! Hi nüh küzheri kümüjie phratewie veh ketünga nyi küsüküsü nga rhieza nta thuoüji hi nga jüma kenüh rhieza wie naveh.

²²Mari tü Ebriri ülo? Hi nga wie. Mari tü Israelri ta ülo? Hi nga wie. Mari tü Abraham küshukürari ta ülo? Jükümjie hi nga wie.

²³ Mari tü Khrista zhuhküürori ülo? Mari nyia vünüh hi nüh küümphatsahwa, hi nüh zhekümüri kümüjie phrate veh tünü thitü hi nüh jümari nyia vünüh küüro küjiji sa, mari nyia vünüh hi nüh küsi küüzhi sa, mari nyia vünüh müküchierhüra keri fe, thi khinyi shie aküsü hozakeri setu.

²⁴ Judahri nüh münga keri hi rewa thi hi küfe zürake ju naküsa küsü nüh müju.

²⁵Akütsüh nüh küche keri hi kürhietsü; küsükeri aloh nüh hi veh. Küche keri hi tü juhie vünüh münomüna; rüza küsü thi rülo küsü hi tü juhküji nyia vü kürhu.

²⁶ Khinyikhinyi küzeh tse, arüguri vünüh kükrü setu, kürühuri vünüh kükrü setu, hi mpa eh nyiri vünüh kükrü setu, Judahmükünyuri vünüh kükrü setu, nyuküji vünüh kükrü setu, reza vünüh kükrü setu, juhküji vünüh kükrü setu, afü küzhühjari vünüh kükrü setu.

²⁷Khieloti küro thi kho sheh, rüza hozakeri wie nga müzeh, rüma thi kürieh, hozakeriwie nga ashiemütsa, aküso vü thi rütso nü tsetseti.

²⁸Thi jüma nyia vü nga Nazizheh aveh kenüh kütsaza kenüh rülorülo hi chiphakewie.

²⁹Nyi küsü nüh mükhra nüh kütse vü hi nga ma kümüjie mükhra nüh samü ülo? Nyi küsü nüh külu kümü vü hi tü alomüra nüh müsa ülo?

³⁰Hi nüh mürhiezaji mümühie thuoüji zanyo khiemari vünüh hi mükükhra ngura veh nüh jümari vünüh rhieza naveh.

³¹Saküüwuowa thi Jisu VÜWA Pawa küsuokürho küsiakewa nüh hi tü mürie ta thsü veh.

³² Hi re naküsa kenüh Damaska vü kümükhrüwa, kajiwa Aretas kükhu vü küpehwa nüh Damaska nyuküjiwa huopeh.

³³Thitü hi tü ashukhuo lovü thse nü ashieku loju küsa küpie vünüh hi vizhuwa nü jüla nüh hi tü ma ke vünüh tewara.