Read Pochuri Naga 2 KORINTHIARI 13 Bible Online

2 KORINTHIARI 13 - Pochuri Naga bible

2 KORINTHIARI 13

¹Hi tü kücheawa nohri vü tsethuoh. Nyi künyi küche povüpehmü thuoüji zanyo küsüküsü nga müshotewawati.

²Hi nüh lekha künyiawa nohri vü ru lehü thuoüji khana vü khiemuo kümüri nga thi küpari aveh nga hi nüh pehmüküveh vü küzawie nathuoh nü hi ru thuoüji piketü jümari kümüshiewanyuthuoh.

³Küpakenühnyunü Khrista tü hi vünüh küzatsa veh ünü nyunüh nohri nüh thsüngü küveh kenüh. Ma nüh nohri vü küpeh thuoüji mükhra nüh pehmüveh nü khra sheh nü pehveh.

⁴Küpakenühnyunü ma tü mükükhra kenüh khieluothso rügivünüh zekemü, thitü Saküüwuowa kükhra vünüh rhovehthuoh. Küpakenühnyunü hiri tü ma vünüh mükhra, thitü nohri siekütsarüra vünüh Saküüwuowa kükhra vünüh ma sie rhonathuoh.

⁵Nohri tü kütsotü vü pehveh ünü nyu nüh nohri mpa nohri kürho noluo. Jütisanü nohri katoveh ünü nyu nüh nohri mpa nohri mütenoluo. Jisu Khrista nohri vü pehveh ta küsa nohri tü müthsü ülo? Jüta nyuthuoüji nohri tü krie shehmüwienathuoh.

⁶Eh kümüshe vü thuoüji hiri tü müsara nüh samüna tünyie ti mümüshe tünüh.

⁷Thitü nohri tü müküle müsanüh sana küsa kenüh hiri tü Saküüwuowa vü kükhuo sa veh, jütü hiri tü kümütewamümütu nü kümüshowa nü mowa nüh nohri jüma küüsa nti küsa wiethuoh, ma mpa nüh hiri tü müsara nüh samüna saküveh kümüjie wie ketünga.

⁸Küpakenühnyunü hiri tü küzhütsawa sie mükünongü müsa, thitü hiri tü küzhütsawa kenüh wie.

⁹Küpakenühnyunü hiri mükhra nüh küpeh vü nohri kükhra tü lozhemü. Hiri nüh khuoküveh thuoüji nohri küüzhake naküsa kenüh wie.

¹⁰Hi küru vü hi nüh VÜWA nüh hi kütsü kükhrawa tha maviküümüzho sheh kenüh hi nüh nohri sie kietuo pehküveh vünüh lasi hama rhü veh, VÜWA nüh jüma hi kütsü thuoüji sakümühie naküsa küchie nüh zorie naküsa kenüh nyu.

¹¹Sehkhe zhü thuoüji halie eh füri, VÜWA nüh nohri sieküpehwa saluo. Nohri lekhujiri vü müshowa wie luo, eh kümüshe vü luoveh thse luo, küsü nüh küsü sie azhü tsarü luo, kürü lozhe nü rholuo, küümze thi luoveh kürünyi Saküüwuowa nüh nohri sietse naveh.

¹²Kümtse küüme vünüh küsü nüh küsü vü siakeluo. Kümtseri aveh nüh loküzhezhü tsü veh.

¹³VÜWA Jisu Khrista küümzewa, thi Saküüwuowa hiri külonawa thi Kümtse Sietse siekütsarüwa nüh nohri aveh sieküpehwa saluo.