Read Pochuri Naga 2 KORINTHIARI 4 Bible Online

2 KORINTHIARI 4 - Pochuri Naga bible

2 KORINTHIARI 4

¹Jükenüh Saküüwuowa küümze vünüh hiri küüro hama küsara vü hiri luoveh küji temüwa.

²Thi hiri tü küzükrü küüro thi küüthi küsü lekhujiri jamüthuoh; thi arokümüsü amüke nyutü Saküüwuowa zhü phraküümüsü aveh kulemü nü küzhütsawa phrate nü Saküüwuowa atüvü nyuri nüh müküümüshezih nüh hiri mpa nüh küüsiake satsethuoh.

³Thi ma mpa nüh hiri nüh zhühlekümühiewa küzakütsewa küthiwie ketünga kümiemüna küsari vü mpa küthi küvehwie.

⁴Mari kenüh thuoüji nyiaza[4] nüh mari mükütsotüra müshe sakürüpo mütüthuoh, jümatü Saküüwuowa tso vü kütsewa Khrista kütholah Zhühthe Kümühie küwiewa müküüngu nüh khete tüna küsawiethuoh.

⁵Küpakenühnyunü hiri nüh phrate küvehwatü hiri mpa hiri zhühku phrate müveh, thitü Jisu Khrista tü hiri VÜWA, thi Jisu kenüh hiri thuoüji nohri siepe kümüjie wiethuoh ti phrate tse veh.

⁶Küpakenühnyunü aküzo vünüh küwiewa wieru luo ta Saküüwuowa nüh küza, Khrista anyia vünüh Saküüwuowa kütholah küthsü küwiewa hiri tsü naküsa kenüh ma nüh hiri luoveh vü wieke tsüthuoh.

⁷Thitü kükhra küjiwa tü hiri vünüh nyu nü Saküüwuowa vünüh ta küsa nyuri nüh küüngu na küsa kenüh künyirhie hamatü azhihküfü lovü thsesaveh.

⁸Awuowuo nüh hiri sakümnomna thitü hiri satsa müzorie, mükümüshera küüsa; thitü küluozhewa ramüküze;

⁹hiri vü kükho tsü, thitü Saküüwuowa nü hiri müja, hiri feküzeh, thitü hiri müzorie.

¹⁰Nyuri nüh hiri satsa vünüh Jisu kürho küüthsü na küsakenüh hiri satsa vünüh Jisu küsüwa vü tse veh.

¹¹Küpakenühnyunü hiri satsa küsürawa vünüh Jisu kürho küüthsü naküsa kenüh hiri rhoküveh vünüh Jisu kenüh tsotho aveh vü hiri kürhowa aküsü thsethse ti.

¹²Jükenüh aküsüwa tü hiri vü küro tsetseti, thitü akürhowa thuoüji nohri vü küro tsetseti.

¹³ Hiri tü, “Hi nüh tsotü, jükenüh phrate,” ta zhütsazhü nüh küza. Kütsotü sietse jümawa vünüh hiri nga phrate veh, küpakenühnyunü hiri nüh tsotü küveh kenüh.

¹⁴VÜWA Jisu saküürholewa nüh hiri nga Jisu sie saküürhole nü hiri tü nohri sie ma tüvü tsie naveh ta thsüküveh kenüh.

¹⁵Küpakenühnyunü jümari aveh nohri kenüh wie; thi Saküüwuowa küümzewa nyiri küzhiküzhi vü wa taji Saküüwuowa kütholah vü kümüna kütsü zhira naküveh kenüh.

¹⁶Jükenüh hiri luoveh tü temütsuo, Hiri satsa alievü thuoüji kuomüsütewathuoh ketünga hiri kürho alovü thuoüji rülo avehvü sakürüthetse wieveh.

¹⁷Thitü küzah thi tsotho pike kükho hama hiri nüh münomünaküvehwa nüh müküüzara thi küsuokürho kütholahwa hiri vü tsü naveh, thi jümatü kümnomna nyia vünüh ji veh.

¹⁸Jükenüh hiri tü zanyo nguküvehri nomüveh nü ngumüküvehri noveh, küpakenühnyunü zanyo khinyi nguküvehri thuoüji aküsuomüpeh, thitü zanyo khinyi ngu müküvehri thuoüji küsuokürho.