Read Pochuri Naga 2 KORINTHIARI 5 Bible Online

2 KORINTHIARI 5 - Pochuri Naga bible

2 KORINTHIARI 5

¹Küpakenühnyunü azhih hala hiri nüh kürho zhehwa tü müsütewa ketünga Saküüwuowa vünüh azhe küsü peh veh, azheh jüma ake nüh müsanü thajüwu vü küsuokürho küpehwiethuoh.

²Hiri tü hala nüh müngu taji küraküpre küveh thuoüji thajüwu azhewa nüh hiri küükhete ngümüthuoh;

³küpakenühnyunü azhe jüma nüh hiri hiete thuoüji hiri tü kürütsowa nyuthuoh.

⁴Küpakenühnyunü athsüzhe hala küpeh küju nü hiri tü rüthosahzhile nü lüchi küpewiethuoh, jümatü hiri tü azhih hama satsa müvü thuohti küsa nyu, thitü rügi zhiwa vikevü naveh; jütathuoüji akürhowa nüh aküsürawa müzhumü nathuoh.

⁵Hiri kenüh zanyo hama küüchewa thuoüji Saküüwuowa, ma nüh Sietse tü zhütsa ünü nyu nüh ta küsa thsüto naküsa kenüh hiri vü tsümüthuoh.

⁶Jükenüh hiri thuoüji tsotho aveh vü luoveh ji mühie tse wieveh; hiri nüh satsa zhehwa vü küpeh küju nü VÜWA siekietuo wieveh.

⁷Küpakenühnyunü hiri tü aküno vünüh mütse nü kütsotü vünüh rho kütse kenüh.

⁸Hiri thuoüji luoveh ji mühie tse veh, thi satsawa vünüh kiethuoh nü VÜWA zheh vü ma sie küüpehngüthuoh.

⁹Jükenüh hiri nü azheh hala pehtü müpehtü hiri kümüshe thuoüji ma külo sangü.

¹⁰Küpakenühnyunü hiri aveh Khrista ashi küsa pe vü tsiekheh wienaveh, jüüta thuoüji ma satsa vü ma nüh momowa sa thuoh nüh kümühie nga satü kümüsü nga satü nyi küsüsü ngu naveh.

¹¹Jükenüh VÜWA kükrüwa thsü taji rüle küüthsü nti nyiri phah tse veh; thitü hiri nü mowa nüh Saküüwuowa nüh thsükheh thi nohri nga nohri kümüshe vünüh jüma thsüveh tünti müshe veh.

¹²Hiri tü nohri atüvü hiri mpa hiri siake lehü ngü müveh, thitü nohri tü hiri vünüh lozhe ti küsa küjotsü küveh wie; jüütathuoüji nyiri luoveh lo vünüh nyu nü anyokümühie vünüh mari mpa rhieza kütseri vü rüle tsüra naveh.

¹³Küpakenühnyunü hiri tü zhetsewie ketünga jümatü Saküüwuowa kenüh wie; mükütüküzü hiri nüh amüshe kükato vünüh tsethuoüji jümatü nohri kenüh wie.

¹⁴Küpakenühnyunü Khrista küümze nüh hiri küchü tsewie, jükenüh hiri müshe kütoh tekütse thuoüji nyi küsü nüh anyi aveh kenüh sümütüthuoh, jükenüh nyiri aveh tü sümüthuoh.

¹⁵Thi ma nüh nyiri aveh kenüh sümütüthuoh, küpakenühnyunü rhoküvehri tü mari mpa makeri’a nüh mürho nü makeri’a nüh sü thi rhole ti küsawa kenüh rho naküsa kenüh.

¹⁶Jükenüh khinyi thuoüji nyi küsü vü nga nyiri kümüshe vünüh müchieke thuoh, küsükeri hiri tü Khrista tü nyiri kümüshe vünüh no, thitü khinyi thuoüji jüüta vünüh nyuwiethuoh.

¹⁷Jükenüh nyi küsü nüh Khrista vü pehmüthuoüji ma nü kürhokürüthe thuoh; kürüwiwa tewathuoh, thi halie, kürüthewa teruthuoh.

¹⁸Hamari aveh Saküüwuowa vünüh khehwie. Ma nüh Khrista vünüh hiri sie ma vü tsarümüthuoh, thi kütsarüra küürowa hiri vü tsüthuoh.

¹⁹Jümatü Khrista vünüh Saküüwuowa nüh azhihwa sie nü ma mpa ma sietsa rümüthuoh, jüti sanü nyira müküle nga müshe kümüsü müsatüthuoh, thi sietsa rükümü zhühlewa vi hiri vü tsotü tsümüthuoh.

²⁰Jükenüh hiri thuoüji Khrista kenüh azhühle küphraterithuoh, Saküüwuowa nüh hiri vünüh nohri khuoveh. Hiri nüh Khrista anyo vünüh nohri tü Saküüwuowa sie tsarü üti khuoveh.

²¹Küpakenühnyunü ma tü kükhiemuo müsawie ketünga hiri kenüh matü küükhiemuo müthuoh, jükenüh ma vünüh hiri tü Saküüwuowa künyitsawa küüsamüthuoh.