Read Pochuri Naga GALATIARI 1 Bible Online

GALATIARI 1 - Pochuri Naga bible

GALATIARI 1

¹Paul povüküsa nyiri vünüh nyu, nyutü nyiri kümüshe vü nga nüh nyu, thitü Jisu Khrista thi Saküüwuowa[1] Pawa, aküsü vünüh kürholewa,

²thi afüri hi siekütseri aveh nüh Galatia kümühuri vü loküzhezhü tsü veh.

³Saküüwuowa hiri Pawa thi VÜWA Jisu Khrista nüh küümze thi kürükümühiewa nohri vü kütsüwa saluo.

⁴Khinyi kürho mükümühie vünüh hiri vizhutsü nta hiri Saküüwuowa thi Pawa kümüshe zhüküüna vünüh Khrista nüh ma mpa ma tsü.

⁵Ma tü küsuokürho thi sehkhe küju kütholahthovü küsawa sa luo! Amen.

⁶Nohri tü Khrista küümze vünüh nohri ji küsawa jamü nü küsosiezhü küpa vü shita teküwa kenüh hi tü ngo she veh.

⁷Jümatü zhühlekümühie küpa ta nga müphratera; thitü wuori mpa nüh nohri saküjakünya thi Khrista zhühlekümühiewa khaphrü tsü nta küsawiethuoh.

⁸Thitü hiri wienga nyutü rügizhühleri thajüwu vünüh küruri nga hiri nüh nohri vü phrateküsawa mükünyu küpa phrate thuoüji ma tü müzükümüri küsü küüsaluo.

⁹Hiri nüh khana küüza kümüjie hi nüh khinyi nga küzale hüveh, mükütüküzü anyi wuori nüh nohri nüh zhühlekümühie viküsawa mükünyu küpa vi sosieveh üji ma tü kümüzümü luo!

¹⁰Hi tü khinyi nyira küümphawa phah veh ünü Saküüwuowa küümphawa phah veh lo? Nyutü hi nyira külo sa nti wurie veh ülo? Mükütüküzü hi nüh khinyi küjuwienga nyira külo satse veh üji hi Khrista siepe küsaleh nyu.

¹¹Küpakenühnyunü eh füri, hi nüh zhühlekümühiewa nohri vü küüzawa tü nyira zhühle nyu.

¹²Küpakenühnyunü hi tü nyiri vünüh küngura nyu, nyutü nyiri nüh hi küsosie nyu, thitü jümatü Jisu Khrista nüh küthsükütsü wie.

¹³ Hi khanavü Judahri nale küvi vü eh khuke nohri vü küzathuoh, hi nüh mokümjie Saküüwuowa Nazizheh küümze münyie nüh sakümnomna thi zorie nti sanü eh kükhra küthse nohri nüh thsüthuoh.

¹⁴ Eh nyiri azhie vü Judahri nalewa eh füri hozake nyia vü nga hozake hi nüh küüthsü sa, eh lahnyira rühlewa kenüh eh kütsaza aveh thsekheh.

¹⁵ Thitü hi müjie küwuo atü vünüh ma nüh hi küümze vünüh ma küüro küüsa nta hi jimüthuoh,

¹⁶hi tü Judahmükünyuri aza vü ma povü küsana küsa kenüh lozhe nü ma Tsawa tü hi vü küthsütsü, thitü hi tü nyi küsü kümüshe nga müvi,

¹⁷nyutü eh tüvü povüküsa khuri nga phah Jerusalem vü müwa, thitü hi tü küsükeri Arabia vü wa nü shele Damaska vü teru.

¹⁸ Jütisanü mavi küche ase vünüh Pitor siemütu nti Jerusalem vü wa nü rülo türamünga ma sie peh.

¹⁹Thitü VÜWA anü Jems küchie nüh VÜWA povüküsari küpa nyi küsü nga müngu.

²⁰Hi nüh mowa rhütsü nüh zhütsa. Hi tü mürie ta küsa Saküüwuowa nüh thsü veh.

²¹Jüsevü hi tü tse Siria thi Kilikia azhih vü tewa.

²²Jüma tsotho vü Judea vü kümühuri tü anyijü vünüh küsü nga hi müthsü.

²³Thitü mari tü nyuri vü mpa nüh thsüra taji, “Hiri saküümünomünawa, kütsotü zorietsü nta küsawa tü khinyi thuoüji kütsotü zhü vi sosie tsethuoh,” ta küsa thsü.

²⁴Jütisanü eh kenüh mari tü Saküüwuowa siake.