Read Pochuri Naga GALATIARI 2 Bible Online

GALATIARI 2 - Pochuri Naga bible

GALATIARI 2

¹ Jütisanü mavi türamüzü ase vünüh hi nüh Tita sie nü Barnabas hisü Jerusalem vü khru.

²Hi müwaji mümühie ta küsa kenüh Saküüwuowa nüh hi küthsütsü nü wa. Judahmükünyuri vü hi nüh zhühlekümühiezhüwa küphratewa küüzhe vünüh hi nüh sierhüri vü küza. Eh küüro khanavü saküsari nga thi khinyi küsari nga müsara nüh sakümü müsangü.

³Thitü Tita hi siekütsewa tü Greekri wie ketünga ahu rhemü üti müwurie.

⁴Thitü akürie vünüh afü sakütseri nüh küüzhe vünüh sieküturu wie, jümatü hiri nüh Khrista Jisu vünüh kükhete münyie nüh lozhe nü rhoküvehwa thsüra nü phehte nta hiri azhie vü zi küturu wie,

⁵nohri kenüh zhühlekümühie küzhütsawa sana küsa kenüh hiri tü tsotho pike wienga mari kükhu vü müwawie.

⁶Thitü thari nüh sierhü kümüjie satse nüh hi nüh hama küzeveh, küpakenühnyunü mari tü mokümjie ünüh eh kenüh thuoüji müküpa; Saküüwuowa thuoüji alievü atsowa nonü müküjo, hi nüh küüza thuoüji, sierhü jümari tü eh kenüh küchieke münyie.

⁷Thitü jüütanyunü ahukürheri vi Pitor tsotü kümü kümüjie zhühlekümühiewa vi ahu mükürheri vü sosie üta hi tsotü kümü mari nüh ngura.

⁸Küpakenühnyunü ahukürheri vü Pitor vünüh küüro küsara kümüjie Saküüwuowa kükhra vünüh ahu mükürheri vü hi nüh küüro sara.

⁹Thi küümze vi hi vü tsükümü thsüra nü Jems thi Pitor thi Johan atovüh sataji küsiake vü kütseri nüh Barnabas hisü ahu mükürheri vü küze naküsa kenüh thi mari thuoüji ahukürheri vü wa na küsa kenüh hisü sie ake si luo.

¹⁰Mari nüh kükhuo thuoüji hisü tü mari refü vü kümükhuori müshe üta, thi hi nga jüma sawie nti tsazatse.

¹¹Thitü Pitor Antiok vü küru vü hi nüh künyitoh müza atüvü nüh ma küjowiethuoh, küpakenühnyunü ma nüh müküle satohkümü kenüh.

¹²Küpakenühnyunü anyi wuori atü vünüh Jems nüh küüzeri ru ünü Pitor tü Judahmükünyuri sie ashie tsala. Thitü anyi hamari küru vü ma tü ashiemütsa nüh küpavü tewa, küpakenühnyunü ma tü ahukürheri lokütseri refü kükrü kenüh.

¹³Thi Judahri küpari nga Pitor kümüjie krü nü tewa, thi Barnabas wie nga mari kükrü müke vünüh sietewa.

¹⁴Thitü mari zhühlekümühie küzhütsawa lekhuji vü mükütse hi nüh ngu taji mari aveh atü vünüh hi nüh Pitor vü, “Noh nüh Judahri wieketünga Judahri kümüjie mürho nüh Judahmükünyuri kümüjie rho veh thuoüji mokümjie Judahmükünyuri tü Judahri kümüjie rho üta wurie mühie na lo?” ti küza.

¹⁵Hisü tü Judahmükünyuri kükhiemuori kümüjie nyu nü aküwuo vünüh Judahri wiethuoh.

¹⁶ Jütawie ketünga Jisu Khrista kütsotü vünüh küchie nüh Wule küüro vünüh nü Saküüwuowa vü mümüshora, hiri Khrista Jisu tsotü kümüri Khrista kütsotü vünüh Saküüwuowa vü kümüshora küchie nüh Wule küüro vünüh nyu, küpakenühnyunü Wule küüro vünüh nyi küsü nga Saküüwuowa vü mümüshora.

¹⁷Thitü mükütüküzü hiri tü Khrista vünüh Saküüwuowa vü müsho nta wurie thuoüji, hiri kükhiemuori ta thsüra veh, thinü Khrista tü kükhiemuo sie küsawa thuoh ülo? Piketü nyuwie.

¹⁸Thitü mükütüküzü hi nüh zorie kümüri sa le thuoüji hitü Wule küphrürieri ta hi mpa nüh thsümüthuoh.

¹⁹Wule vünüh müzhe nta thuoüji hi tü Wulewa nüh zothemü taji sümüthuoh, küpakenühnyunü hi tü Saküüwuowa kenüh rhona küsa kenüh. Hi tü Khrista sie khieluothso rügi vünüh küsümüthuoh.

²⁰Hi tü Khrista sie zekemüthuoh, hi nüh rhotekütsetü hi nüh nyunü Khrista nüh hi vü rhoküveh wie; thi khinyi hi nüh rhoküveh eh satsa kürho hama thuoüji Saküüwuowa Tsa kütsotü vünüh rhoküveh wie, ma nüh hi küümze kenüh ma mpa eh kenüh ma kürho tsü.

²¹Hi nü Saküüwuowa küümze tü azhünyo mükünyie kümüjie sa; küpakenühnyunü mükütüküzü Wule vünüh müshora vehthuoüji, Khrista küsü thuoüji zhühnyo münyiethuoh.