Read Pochuri Naga GALATIARI 3 Bible Online

GALATIARI 3 - Pochuri Naga bible

GALATIARI 3

¹Halie, Galatia küzheri, thari nüh nohri saküzhemü lo? Mükünyunü nohri notha vünüh Jisu Khrista tü nyiri atüvünüh küthsüküto zeke wiethuoh nü.

²Hi nüh nohri vü küünangüwa thuoüji hama: Nohri nüh Saküüwuowa Sietse küngura tü Wule kümüzhe vünüh ünü zhühlekümühie küna nü kütsotüra kenüh lo?

³Saküüwuowa Sietse vünüh sate nü hazake zhe nti ülo? Khinyi thuoüji nohri tü nohri sazüh vünüh akhe sa nti ülo?.

⁴Nohri tü mame mükünyie vünüh hazake münomüna ru ülo? Nohri tü zhühnyo peh nü saru wie.

⁵Saküüwuowa Sietse vi nohri kütsü thi nohri azhie vü küüroküngori küsawa tü Wule küüro vünüh sa ünü kütsotü küüna vünüh lo?

⁶Abraham kürho müshe noluo; zhütsa lasi nüh küüza, “Ma tü Saküüwuowa tsotü, ma nüh Saküüwuowa kütsotü kenüh ma tü nyitsa ta chieke,” ti küza.

⁷ Jükenüh küsüküsü nga kütsotü vünüh rhokütseri thuoüji Abraham tsari ta küsa thsüluo.

⁸ Thi Saküüwuowa nüh Judahmükünyuri tü kütsotü vünüh sakümüsho nata küütü vünüh thsü nü zhütsazhü vünüh küthsüra, no vünüh akuoh aveh kütsia ngu naveh ta Zhühthe Kümühiewa nüh küütü vünüh Abraham vü phrate sa veh.

⁹Abraham tü kütsotü kenüh kütsia ngura; jükenüh kütsotüri aveh thuoüji ma kümüjie tsiatsü veh.

¹⁰Thitü Khonyo küüro tsotü kütseri thuoüji kümüzü kükhu vüpeh veh, küpakenühnyunü zhütsazhü vü rhüküsa, “Nyiküsüküsü nga Khonyo lasi lovü rhüküsari aveh müzhe nü jümari samükütseri thuoüji müzümüthuoh,” ta küza saveh.

¹¹ Khonyo vünüh nyi küsü nga Saküüwuowa atüvü mümüsho taküsa thsüto vehthuoh, “Künyitsari thuoüji kütsotü vünüh rho naveh,” ta zhütsazhü nüh küza saveh.

¹²Thitü Khonyo thuoüji kütsotü sie zanyoküsü küsa münyie, jüütanyunü zhütsazhü nüh küüza, “Thari nüh Khonyowa saju naveh nüh jümari nüh rho naveh,” ta küza sa veh.

¹³ Khonyo nüh müzü küsawa vünüh Khrista nüh hiri külole müthuoh, hiri kenüh müzü kümü küsü sakümüthuoh kenüh: küpakenühnyunü zhütsazhü nüh, “Thari nüh athsorügi vünüh zeke nüh jümari thuoüji Saküüwuowa kümüzü kükhu vü pehmüthuoh,” ta rhü saveh.

¹⁴Khrista nüh jüta küsa thuoüji Saküüwuowa nüh Abraham vü phrateke küsawa Khrista Jisu vünüh Judahmükünyuri vü tsünaveh, jütathuoüji kütsotü vünüh hiri tü Saküüwuowa nüh phrateke küsa Sietsewa ngura naveh.

¹⁵Eh füri, nyiri kürho vünüh küüzhühie nta thuoüji nyikünyi azhü tsarümü thuoüji nyi küsü mpa ma müshe sanü jüma müphrüriera nyutü müthsephera.

¹⁶Jükümjie azhüphrateke küsawa tü Abraham thi maküshukürari kenüh. Zhütsazhü nüh küphrate thuoüji anyi hozake vünüh müphrate, thitü anyi küsü vünüh küphratewie, thi jüma thuoüji Khrista.

¹⁷ Hi nüh hama küüza thuoüji, Saküüwuowa nüh küütü vünüh kütsathuoh zhü sanü phrateke sa. Thi Khonyo thuoüji mavi müzamüzü nü cherake vünüh tsü, jütawie ketünga tsathuohküsawa müzokhuora thi Phratekeküsawa tü müphrüriera.

¹⁸ Küpakenühnyunü mükütüküzü azhezhu küvilewa tü Khonyo vünüh thuoüji phratekeküsa vünüh nyu thuoh, thitü jüma kütsü thuoüji Saküüwuowa nüh Abraham vü kütsü kenüh.

¹⁹Thinü Khonyo tü mokenüh lo? Abraham küshukürari kenüh phratezhu küsa kenüh mari müjie küru küju nü Khonyo küphrürieri kenüh jümatü kütsüwie, thi jümatü rügizhüleri nüh azhie vü kürotsü.

²⁰Thi azhie vü küürori tü küsü mpa nyu, thitü Saküüwuowa thuoüji küsüwie.

²¹Thinü Khonyo tü Saküüwuowa nüh phrateke küsari siemükükato peveh ülo? Piketü nyu wie; küpakenühnyunü Khonyo tsüküsawa tü sakürho naveh üji künyitsawa tü Khonyo vünüh wiethuoh.

²²Thitü zhütsazhü nüh küüza thuoüji azhih aveh tü kükhiemuo kükhra kükhu vü pehmüthuoh ta; thi Jisu Khrista kütsotü vünüh aküte kütsü phrateke küsawatü kütsotüri vü tsümüthuoh.

²³Kütsotüwa ru nü hiri müjie küütsa küju nü hiri tü Khonyo kükhu vü thsemü.

²⁴Jükenüh kütsotü vünüh hiri sakümüsho na küsa kenüh Khrista müjie küruküju nü Khonyowa tü hiri kühuowa sateru.

²⁵Thitü khinyi thuoüji kütsotüwa teru pehkümüthuoh kenüh hiri tü Khonyo nüh kühuo kükhu vü pehmüvehthuoh.

²⁶Khrista Jisu sie küsü küsa vünüh kütsotü vünüh nohri aveh tü Saküüwuowa atsari sakhehmüthuoh.

²⁷Nohri nyi küzake nüh Khrista baptis samüthuoh nüh Khrista vikevümüthuoh.

²⁸Judahri nga satü Judahmükünyuri nga satü müküpa, tükhawa nga tükha mükünyuwa nga müküpa, nyimpawa nga nyimzawa nga müküpa, küpakenühnyunü nohri aveh nga Khrista Jisu vünüh küsü wie.

²⁹Thi mükütüküzü nohri tü Khrista azhi thuoüji nohri tü Abraham küshukürarithuoh, thi phratekeküsawa zhi küvilerithuo