Read Pochuri Naga GALATIARI 4 Bible Online

GALATIARI 4 - Pochuri Naga bible

GALATIARI 4

¹Küvileh mazhünyo hi nüh phrateküveh thuoüji ma mpa nüh zanyo aveh vüwa wiethuoh ketünga ma nüh rünguo küveh küju nü tükha nyia vünüh mümühie.

²Thitü Pawa nüh rülowa müjie küsa küju nü ma tü akünohri thi küücheri kükhu vü wiethuoh.

³Jükenüh hiri tü kürünguo vü thuoüji azhih hama sietseri apokhu tükha saru.

⁴Thitü tsothowa khemti ruju ünü Saküüwuowa nüh ma Tsa küze taji nyimzari küsü vünüh wuo nü Khonyo kükhu vünüh rho,

⁵ jümatü küpakenühnyunü hiri tü Saküüwuowa tsari küüsana küsa kenüh Khonyo kükhuvü pehküvehri rhesana küsa kenüh wie.

⁶Thi hiri tü atsari sakümüthuoh kenüh, Saküüwuowa nüh ma Tsa Sietse hiri luoveh lovü thse nü Abba, eh Pa, ta küüsa vehthuoh.

⁷Jükenüh Saküüwuowa vünüh nohri tü atükhari nyu nü atsasamüthuoh, thi atsa samüthuoh nü awurhuwa wiethuoh.

⁸Khanavü nohri Saküüwuowa müküthsüvü thuoüji Saküüwuowa mükünyu tükha sa.

⁹Thitü khinyi thuoüji nohri tü Saküüwuowa thsümüthuoh, nyutü Saküüwuowa nüh nohri thsümüthuoh, thinü nohri tü mokenüh mükükhra thi momaküsa sietseri vü shele wa taji mari tükha salehü ngü veh lo?

¹⁰Nohri nüh rülo thi asah, thi azaleri thi amahviri müzheru.

¹¹Hi tü nohri vü azhühnyo mükünyie küüro satse tünti müshenü krüveh.

¹²Eh füri, hi nüh nohri vü khuo küveh thuoüji hi nüh nohri kümüjie üta nohri nga hi kümüjie saluo. Nohri tü hi vü müküle zanyo küsü nga müsa.

¹³Hi nüh pokhu vü nohri vü zhühlekümühiewa küüza thuoüji hina küveh kenüh wie.

¹⁴Thi eh küna jüma nohri kenüh kümüte kümüjie wie ketünga hi müküchie nga müsa thi kükule nga müsa, thitü Saküüwuowa zhühleri kümüjie thi Khrista Jisu kümüjie hi sieke.

¹⁵Nohri tü mowa vünüh lozhera lo? Küpakenühnyunü hi nüh nohri povü küsa thuoüji mükütüküzü küsara kümühie nü nohri tü nohri notha khrüzhu taji hi vü thse naküsa kenüh.

¹⁶Hi nüh nohri vü küzhütsawa küphrate kenüh nohri mükünongüwa samüthuoh ülo?

¹⁷Mari tü nohri kenüh kütsaza she kümüjie, thitü jümatü kümühie kenüh nyu, thitü nohri khetemü nü nohri tü mari siekütsaza küsü sana küsa kenüh.

¹⁸Küpakenühnyunü zanyokümühie küsa thuoüji hi nüh nohri sieküpevü mpa nyu nü tsotho aveh vü nga sieküpehwa wiethuoh.

¹⁹Eh tsari, atsa küwuo kümnomna kümüjie Khrista tü nohri vü müjie küpeh küju nü hi tü jükümjie na le vehthuoh.

²⁰Hi tü khinyi nohri sie küpeh küzakele eh müshe thuoh lo, jüütathuoüji e müke tü khaphrüra naveh, küpakenühnyunü hi tü nohri kenüh eh luoveh tsaza küveh kenüh.

²¹Nohri Khonyo kükhu vü küpehngüri hi vü küza luo, nohri tü Khonyowa nüh küüza mükünara ülo?

²² Küpakenühnyunü rhüküsa thuoüji Abraham tü atsa nyimpa künyi peh ta, küsü thuoüji ma tükha vühwa tsa, thi küpawa thuoüji tükhavüh mükünyuwa tsa.

²³Thitü tükhavühwa tsa thuoüji asazüh müshe vünüh wuo, thi tükhavüh mükünyuwa tsa thuoüji phratekeküsa vünüh wuo.

²⁴Hama thuoüji küüzhühie: nyimza ha künyi tü zhühthuoküsa künyi. Küsü thuoüji Sinai küzhiho vünüh thi ma thuoüji tükha vünüh, thi ma thuoüji tükha vünüh atsa wuo; jümathuoüji Hagar.

²⁵Hagar thuoüji Arabia vü Sinai küzhiho; thi ma tü khinyi Jerusalem wa sie zarike, küpakenühnyunü ma tü ma tsari sie nü tükha vü küpeh kenüh.

²⁶Thitü thajüwu vü Jerusalem thuoüji tükha müsa, thi mathuoüji hiri aveh aza.

²⁷Küpakenühnyunü zhütsazhü nüh küzaküsa: “Halie, atsa kümügu, atsa mükünyie, atsaküwuo küna müküngu vühwa lozhe nü zia luo; küpakenühnyunü ma mpa küpehvühri atsari tü avüpa sakümüri nyia vünüh zhiküveh kenüh,” ta sa saveh.

²⁸Eh füri, hiri tü Isaac kümüjie phrateke küsa atsari wiethuoh.

²⁹Thitü jüma tsothovü asazüh vünüh küwuowa tü Sietse vünüh küwuowa müküchie küsa kümüjie, khinyi nga jükümjie wiethuoh.

³⁰ Thitü zhütsa lasi nüh mowa küza lo? “Tükhavühwa thi ma tsa zhezhujamü luo; küpakenühnyunü tükhavühwa tsanüh tükhavüh mükünyuwa atsa masü kürü küvileh küsü müsara,” ta küza saveh.

³¹Jükenüh eh füri, hiri tü tükhavühwa tsari nyu nü tükhavühmükünyuwa tsari.