Read Pochuri Naga GALATIARI 5 Bible Online

GALATIARI 5 - Pochuri Naga bible

GALATIARI 5

¹Kürüzih vünüh kürho na küsa kenüh Khrista nüh hiri lejatsüthuoh; jükenüh tsie müzho luo; thi tükha khuonyi kükhuvü mütuletümü luo.

²Hi Paul nüh nohri vü küzaveh, nohri nüh ahukürhevü thuoüji Khrista tü nohri kenüh mazhünyo münyiekreke wiethuoh.

³Ahu rheküvüri vü hi nüh povü saküvehle thuoüji, mari tü Khonyo aveh mümüzheji mümühiethuoh.

⁴Nohri Khonyo vünüh müsho nta küsari, nohri tü Khrista vünüh letsuomüthuoh, thi küümzewa vünüh külumüthuoh.

⁵Küpakenühnyunü Sietse vünüh tsotü nü künyitsa küluozhewahiri tü huopevehthuoh.

⁶Küpakenühnyunü Khrista vünüh ahukürheri nga satümükürheri nga satü zanyo küsü nga müküpa, thitü kütsotütü küümze vünüh küroveh.

⁷Nohri tü akükhra thseru ünü, küzhütsawa zhü küüna vünüh thawa nüh nohri khetemü lo?

⁸Azhühnyo hamatü piketü nohri jiküsawa vünüh nyu.

⁹Ahzhi pike nüh ahie aveh saküsahü rarati.

¹⁰Eh kümüshe anyia vü küpa küviwanyu ti küsa hi nüh VÜWAvünüh tsotüveh; thi ma mpa küsüküsü nga satü nohri saküjakünya kütseri thuoüji Saküüwuowa müshekümüsü nguwie naveh.

¹¹Thitü eh füri, hi nüh mükütüküzü khinyi nga ahukürhe sosie tseji mokenüh hi tü kümnomna nguveh lo? Jütathuoüji khieluothso kenüh ajikümüshüwa tü vijamüthuoh.

¹²Nohri müshe samüsü kütseritü mari mpa mari zothuohteküwa nüh eh kümüshe.

¹³Eh füri, nohri tü kürüzih vünüh küürho nta jizhu savehthuoh; thitü siepe samüküveh loküzhe jümatü asazüh kümüshe lovü vimüthsetümü nü küümze vünüh küsü nüh küsükütsü sanü rholuo.

¹⁴Küpakenühnyunü azhükütsü, “Noh mpa no küümze kümüjieno zhephruri kümüze luo,” ta küsa hama mpa nüh Khonyo aveh sajumü wiethuoh.

¹⁵Thitü mükütüküzü nohri nüh mükoluo thi retsaluo pehthuoüji azhüzhüluo, nohri mpa nohri zoriemüwie nathuoh.

¹⁶Thitü hi nüh küüza thuoüji nohri Sietse vünüh rholuo, thi asazüh loküra kümüngu müsatümü luo.

¹⁷Küpakenühnyunü asazüh kümünguri tü Sietse sie küproluotsetseti, thi Sietse kümünguri tü asazüh sie küproluotsetseti; noh nüh sangü küvehwa vünüh khete naküsa kenüh hamasü tü münoluongü nüh tsetseti.

¹⁸Thitü Sietsewa nüh nohri sietse thuoüji nohri tü Khonyowa kükhu vü nyu thuoh.

¹⁹Thi asazüh küürori tü ngu mütse sheke wieveh; thi jümari thuoüji: müsarüla küsa, nyivühnyipa muomuo küsa, mükümtse khuke;

²⁰tsorhe kükhurü, kütüma, mükünoluongü, küsaluo, noküüjizhi, rüküshu, kümüka, zazhü müküka, refü küpaküsa;

²¹noküüma, kümüshe, müshe nü asemüküthsü, thi hakümjie küpari nga. Hamari kenüh khana hi nüh nohri vü küthokütsü kümüjie hi nüh nohri küthotsü le veh, küpakenühnyunü hakümjie küsari thuoüji Saküüwuowa kajipe vi mazhiri müsara.

²²Thitü Sietse vi thuoüji: Küümüze, loküzhe, kürükümühie, luoveh küsuo, nyuri noküümze, khuke kümühie, küzhütsa,

²³khukekürünyi, ma mpa ma kükhete, hama nyia vünü Khonyoküsü nga münyie.

²⁴Thi Khrista Jisu azhi sakümüri thuoüji müküüzhikera thi kümüngu aveh asazüh sie zekemüthuoh.

²⁵Mükütüküzü hiri tü Sietse vünüh rhoveh thuoüji Sietse vünüh tse luo.

²⁶Müsheküji temüwatü, thi arüsamüküshuluotü, thi küsünüh küsü nomükümaluotümü luo.