Read Pochuri Naga EFESARI 1 Bible Online

EFESARI 1 - Pochuri Naga bible

EFESARI 1

¹ Saküüwuowa[1] müshe vünüh Khrista Jisu povüküsari sanü kütse Paul nüh Efesa vü küpeh kümtseri thi Khrista Jisu vünüh zhütsa küvehri vü rhütsü veh.

²Saküüwuowa Pawa thi VÜWA Jisu Khrista vünüh küümze thi kürükümühie küruwa saluo.

³Khrista vünüh sietse kütsiari thajüwu vünüh tsia hiri kütsü kenüh hiri VÜWA Jisu Khrista Saküüwuowa thi Pawa kümüna tsüluo.

⁴Hiri tü mütse thi ma tüvü müküle müküpeh nta küsa kenüh ma vünüh azhih müjie küsa vünüh hiri rükamüthuoh. Küpakenühnyunü ma küümzewa kenüh,

⁵Saküüwuowa ma mpa ma müshe kümüjie vünüh Jisu Khrista vünüh ma tsari küüsa nta hiri kücheteruthuoh.

⁶Küümüzetsahwa vünüh müjuju hiri vü tsüküsawa kenüh ma küthola küümzewa siakeluo.

⁷ Ma nüh küümze she kümüjie ma züh vünüh rhesara nü hiri kükhiemuori nojatsü,

⁸jümatü ma nüh müküte wiethuoh nüh hiri vü müjuju tsü shethuoh,

⁹küpakenühnyunü ma müshe kümüjie Khrista vünüh küche küsari ma müshe küshehri küthsü aveh vünüh thi küngura kükhra vünüh ma nüh hiri vü saküthsümüthuoh.

¹⁰Jümatü tsotho jukümüvü sa nta küche küsari zanyo rügivü küpehri nga satü thi zanyo azhih hala küpehri nga satü aveh Khrista vünüh küsü sana küsa kenüh wie.

¹¹Zanyo aveh nga Saküüwuowa kümüshe thi küürathuoh vünüh sa; thi Khrista sie küsü küsara vünüh Saküüwuowa nüh ma mpa ma nyi sa nta hiri rüka, küpakenühnyunü atükhutsahtsa vünüh ma mpa ma kümüshe vünüh zhühthuo.

¹²Hiri atükhu vünüh Khrista rühluo teküruri tü ma küthola küüsiake nta hiri küche thi hiri sataji hiri kürho savehthuoh.

¹³Ma vünüh nohri nga zhütsazhüwa, nohri küülole Zhühthe Kümühiewa künara nü ma vünüh tsotüra taji phratekeküsa Kümtse Sietse vünüh thsoshikhuh fekemüthuoh.

¹⁴Jümatü ma küthola küsiake vü hiri nüh ajisuo müjie küvi küju nü hiri tü ma zhi küvilehri ta satoh kütsüwa. Ma kütholawa siakeluo.

¹⁵Hama kenüh nohri VÜWA Jisu vü nohri kütsotü küpeh thi nohri küümze kümtseri aveh vü küpeh hi nüh künara taji,

¹⁶eh kükhuo vü nohri müshe nü nohri kenüh kümüna kütsü hi tü müküthuoh,

¹⁷hiri VÜWA Jisu Khrista Saküüwuowa, kütholathovü Pawa nüh küthsü sietse thi küthsükütsüwa ma vü zanyoküthsü küpehwa vi nohri vü kütsüwa saluo.

¹⁸Nohri zanyoküthsüra notha saküwie nü ma nüh nohri küji küluozhe mowa nüh thi kümtseri vü küvile ma kütholathovü ma zhi momori nüh,

¹⁹thi ma kükhra müküütera küji hiri vü küpeh, ma mpa ma kükhra nüh küürora kümüjie,

²⁰ kükhra jümatü ma nüh Khrista aküsü vünüh sakürhole nü ma vi thajüwu aperi ma zhie wuo vü küüpehkümü vünüh ma nüh sajümüthuoh.

²¹Ma tü wule aveh kümüsietsah nyia thi kükhra thi kümüzho thi atakrü küsara, thi khinyi hala kürhori mpa mükünyu thuohtüvü runa küsari nga anyo küpehri aveh nyia vü;

²² kümühuwa vü ma nüh zanyo aveh vi ma jih kükhu vü thsemü nü zanyo aveh nyia vü ma nüh alü küüsamüthuoh.

²³Kümühu jümatü Khrista satsa, thi ma küjuwa nüh zanyo aveh vü protse veh.