Read Pochuri Naga EFESARI 2 Bible Online

EFESARI 2 - Pochuri Naga bible

EFESARI 2

¹Nohri tü müküle thi kükhiemuo vünüh sükütsevü ma nüh nohri sakürhotsü.

²Jümatü nohri nüh küsükeri azhih hama kümüshewa azhih thi thajüwu vü kaji kükhrawa müzhe nü rho; sietse jümatü khinyi atsa zhümüküünari vü küroveh.

³Hiri aveh nga hamari kümüjie küsükeri asazüh kümüngu, satsathi amüshe nüh kümüngu müzhe nü rho, jükenüh küpari kümüjie hiri tü zhükha atsari samü.

⁴Thitü Saküüwuowa küümze küzhi shewa nüh ma kümüze jishe nü hiri kümüze tsü,

⁵hiri tü kükhiemuo vünüh sütetse ketünga Khrista sie kürüsakürhomüthuoh, küümze kenüh noh tü küülolewie.

⁶Kürü ma sie rhole taji Khrista Jisu vünüh ma sie thajüwu apehri vü nyipemüthuoh.

⁷Ma nüh Khrista Jisu vünüh kürule kürhori vü müküchierhüra kümüze naküsa hiri vü ma nüh kütsana küsakenüh wiethuoh.

⁸Küpakenühnyunü nohri kütsotü kenüh küümze vünüh küülolewie; hamatü nohri mpa küsa nohri kümühie vünüh nyu, thitü Saküüwuowa mpa nüh aküte kütsüwie.

⁹Nohri küüro kenüh nga nyu, nyi küsü nga mürhiezatümü.

¹⁰Küpakenühnyunü hiri ma zhuh küürori wiethuoh, küürokümühie sa üta Khrista Jisu vünüh hiri saküüjewie, jüma kenüh hiri tü küüro jümari satsepehuo üta atükhu vünüh Saküüwuowa nüh küchemüwiethuoh.

¹¹Jükenüh nohri tü küsükeri asazüh vünüh Judahmükünyuri sanü ahukürheri nüh nohri tü ahu mükürheri ta küji thsüluo, jümatü ake nüh küsa asazühwa.

¹²Nohri tü jüma tsotho vünü Khrista vünüh kietuo thi Israelri sie akuoh küsü nyu, thi zhühthuo taji phrateke küsavü anyilieri küsü sa, thi atüvü kürho küluozhe nga münyie thi azhih hala nohri tü Saküüwuowa münyie.

¹³Thitü nohri küsükeri kiatuo sheh wie ketünga Khrista Jisu nüh sahthuoh taji khinyi thuoüji shehnyi ru Khrista azüh vüpehvehthuoh.

¹⁴Küpakenühnyunü ma tü hiri tsathuoh kütsüwa, hiri küsüsakütsüwa, thi mükünoluongü hiri azhie vü azhie shothuohküsawa ma nüh zophietsü.

¹⁵ Anyi künyi vünüh anyi kürüthe küsü ma mpa ma vünüh vizhunü tsathuohtsü na küsa kenüh ma satsa vünüh Khonyozhütsüküsari thi Khonyo kücheküsari zoriekhehmüthuoh.

¹⁶Khieluothso kükhu vünüh masü khürü Saküüwuowa vü sakütsarütsü nü satsa küsü satsü nü jüla nüh mükünoluongüwa tü sehkhe samütüthuoh.

¹⁷Thi ma nüh ru nü nohri kietuo küpehri vü nga thi shenyiküpehri vü nga kürükümühiewa vi sosietsü.

¹⁸Küpakenühnyunü ma vünüh hiri aveh nga Sietse küsü vünüh Pawa vü küwara lekhuji pehvehthuoh.

¹⁹Jükenüh nohri tü khinyi thuoüji alienyiri thi küzehri kümüjie nyuthuoh, thitü kümtseri sie nyi küsüthuoh thi Saküüwuowa zheh lovü nyito küsüthuoh.

²⁰Nohri nga povüküsari thi setsaküthsüri nüh azethuoh loju küsari rügivü nohri kürho sa savehthuoh, thi Khrista mpa nüh azethuoh jüma loju küsa ajüke alohwa wiethuoh.

²¹Ma vünüh azhehlo aveh nga hurüke khehveh, thi VÜWA vünüh kümtse kükhurüzhe küsü saküjiwaveh.

²²Saküüwuowa küpehpe kenüh Sietse vünüh nohri nga ma vünüh jümawa vü sa savehthuoh.