Read Pochuri Naga EFESARI 3 Bible Online

EFESARI 3 - Pochuri Naga bible

EFESARI 3

¹Hama kenüh hi, Paul nohri Judahmükünyuri kenüh Khrista Jisu küsi satseveh.

²Nohri kenüh Saküüwuowa küümze küüro hi vü tsü ta küsa nohri nga thsülanathuoh.

³Hi nüh nohri vü kümülu vünüh rhükütsü kümüjie azhü küsheh jümatü küthsükütsü vünüh mokümjie hi vü saküthsütsüthuoh nüh,

⁴ nohri nüh hama chie thuoüji Khrista zhü küsheh hi nüh küthsürawa nohri nga thsüra naveh.

⁵Khinyi povüküsari thi setsaküthsüri vü Sietse vünüh saküüthsü kümüjie khanavü kürho anyi atsa küpari vünü müküthsü.

⁶Zhühnyo jüma thuoüji Khrista Jisu kenüh zhühlekümühiewa vünüh mokümjie Judahmükünyuri tü awurhu nyi sara, thi satsa küsü nyi sara, thi phratekeküsawa vü suope nyi ngura nüh jüma wiethuoh.

⁷Zhühlekümühie hama kenüh Saküüwuowa nüh küümze kütsü vünüh hi tü küürori küsü küsamüthuoh, thi hamatü ma kükhra küüro vünüh hi tsü.

⁸Eh kenüh thuoüji, hi tü kümtseri aveh azhie nüh küzatsahwa. Jütawie ketünga Khrista künyirhie küpote mükünyiewa vi Judahmükünyuri vü sosie üta küümze hama tsü,

⁹thi Saküüwuowa zanyo aveh saküüjewa vünüh azhü küsheh atükhuri vünüh küthi saküruwa zhühnyo nü mowa nüh nyiri aveh vü küüngu na küsa kenüh,

¹⁰kümühuwa vünüh khinyi thuoüji Saküüwuowa zanyoküthsü hozake kükhra küviri vü thi rügivü kümüzhori vü küüthsü na küsa kenüh.

¹¹Hamatü Khrista Jisu hiri VÜWA vünüh kücheküsa küsuokürho zhühnyowa vünüh wiethuoh.

¹²Ma kenüh hiri kütsotü vünüh luoveh küji thi ma vü küwara tsah ngura.

¹³Jükenüh hi nüh nohri kenüh münomüna küveh kenüh nohri luoveh thachu temüwatüm üti nohri vü khuo veh, jümatü nohri kenüh kümphawa.

¹⁴Hama kenüh Pawa atüvü eh kho khotsütsüti,

¹⁵ma vünüh rügivü nga satü azhih vü nga satü apatsa nyo aveh thohtsü.

¹⁶Ma küthohla kümühie vünüh ma nüh kükhra vi nohri tsü nü ma Sietse vünüh nohri alo vü kürhowa sakükhra tsü üti khuoveh,

¹⁷thi kütsotü vünüh Khrista tü nohri luoveh vü peh nü rüzo chake thi küümze vü wuke naveh,

¹⁸jütisanü kümtseri aveh sie nü ma küümze tü küji thi küsuo thi kümüsie thi küsheh thsü na küsa kükhra pere naveh.

¹⁹Thi küthsü saküüzhakewa Khrista küümze thsüra nü Saküüwuowa aküjuwa nüh nohri saküpro naveh.

²⁰Thi ma tü kükhra hiri vü küüro vünüh hiri nüh kükhuo thi kümüshe aveh nyia vünüh saküzhake saküjira naveh:

²¹ma vünüh kümühu vü nga thi Khrista Jisu vü nga küthohlathovü akürho aveh vü küsuokürho saluo. Amen.