Read Pochuri Naga FILIPIRI 1 Bible Online

FILIPIRI 1 - Pochuri Naga bible

FILIPIRI 1

¹ Khrista Jisu sieperi Paul thi Timothi masü nüh Khrista Jisu vünüh Filipi vü küpeh kümtseri, thi levü kümüsieri thi jüma kükhuri aveh vü rhükütsü:

²Küümüzewa nohri vü peh luo, thi Saküüwuowa[1] Pawa thi VÜWA Jisu Khrista vünüh kürükümühiewa küruwa saluo.

³Hi nüh nohri kümüshe kürüzhu eh Saküüwuowa kümüna tsütsüti;

⁴nohri kenüh hi kükhuo kürüzhu lozhe nü kükhuo sasati,

⁵atükhu vünüh nosü küju zhühlekümühie vü kürü küro kütse kenüh müna she veh.

⁶Thi nohri vünüh küüro kümühie küsashu tü sa wa Jisu Khrista rülo vünüh saju naveh.

⁷Hi nüh jüüta nohri aveh kenüh kümüshe zhüleh shekewie, hi nüh nohri vi eh luoveh lovü saküveh kenüh, küpakenühnyunü nohri aveh hi sie nü küüzevü, hi aküsi küsa vü nga satü thi zhühlekümühiewa kenüh aphele küsa vü nga satü thi zhühlekümühiewa saküümüzho vü nga satü eh küümze vü kürükütse kenüh.

⁸Küpakenühnyunü Khrista Jisu küümze vünüh küzakele hi nüh nohri aveh münguru nüh Saküüwuowa nüh thsüveh.

⁹Eh kükhuo thuoüji küthsü vünüh thi kümüsü mühie kürüka vünüh nohri küümze tü hozake küzhiküzhi wa na küsa kenüh wiethuoh.

¹⁰Jüta thuoüji zanyo kümühietsahwa nohri nüh thsüra naveh, thi Khrista rülo vü mütse thi müküle münyie nüh sanaveh.

¹¹Saküüwuowa küthohlathovü thi küsiake vü Jisu Khrista vünüh künyitsa aviri pro luo.

¹²Eh füri, zanyo hi vü momowa sa thuoh nüh jümari tü zhühlekümühiewa saküzhakewa na küsa kenüh wiethuoh ti küsa hi nüh küüthsüngüveh.

¹³ Jüta thuoüji hi aküsi küsa tü Khrista kenüh ta küsa küjiwa riehuori nga thi küpari aveh nga thsüra naküveh kenüh.

¹⁴Hi aküsi küsa kenüh afüri hozake wienga VÜWA vü kütsotü küpehra samüthuoh, thi luoveh küzhitsa müzho she le nü mükrü nüh Saküüwuowa zhü phratevehthuoh.

¹⁵Zhütsa, mari wuori thuoüji noküüma vünüh thi küüraluo vünüh Khrista phrate küvehwie.

¹⁶Hamari küsa thuoüji küümze vünüh wie; küpakenühnyunü Saküüwuowa nüh zhühlekümühie aphele küsa küüro hi tsüsaveh ta küsa mari nüh thsüveh.

¹⁷Küpari thuoüji kütsaza tsah vünüh nyu nü riekhuowa sakümühiena küsa kenüh Khrista küphratewie, thi hi nüh aküsi sakütse eh lo sakürü nta küsa wie.

¹⁸Moküsama, ma mpa küsüküsü nga saluo, küthse vünüh nga satü küzhütsa vünüh nga satü Khrista vi phrate thuoüji hi tü jüma kenüh eh loküzhe wie,

¹⁹küpakenühnyunü nohri kükhuo vünüh thi Jisu Khrista Sietse vünüh küru küükrawa nüh hi sakürüzihra naveh ti hi nüh thsüveh.

²⁰Hi nüh luozhe nü müshe küveh thi rüluo küveh thuoüji hi tü piketü küzükrüwanyu, thitü sü nga rho nga küsü nga satüsatü luoveh müzhoju wie nü hi nüh saküru kümüjie khinyi wie nga eh satsa vünüh Khrista tü küüsiake naveh.

²¹Küpakenühnyunü hi tü rhowie ketünga Khrista kenüh wie, thi sü wie ketünga eh kenüh künyia wie.

²²Mükütüküzü eh satsa hama tü rhowie nta ketünga eh kenüh avi küpera küüro wie. Thitü khiemawa rüka naveh nüh hi tü müküzara

²³Jükünyi azhie vünüh hi tü küsüro sa veh. Thitü hi tü tewa nü Khrista sie pehteküwa nüh eh küümüngu khe, küpakenühnyunü jüma nüh küümphatsahwa küsa kenüh.

²⁴Thitü nohri kenüh eh satsa hama küzhike küwa wa nüh küümphakhe.

²⁵Hama küthsütoh kenüh, nohri küüzhake kenüh thi kütsotü vü külozhe kenüh hi tü nohri aveh sie peh thi kürü wa wie naveh,

²⁶jüüta thuoüji hi nüh shele nohri vü küru kenüh hi vünüh nohri tü Khrista vünüh lozhejura naveh.

²⁷Nohri kürho khukewa tü Khrista zhühlekümühiewa kenüh ame küpeh küüsa wie luo, jüüta thuoüji hi nü nohri vü ru tü müru tü zhühlekümühiewa kütsotü kenüh awuowuo vünüh müshe küsü sa kükhra thse nü sietse küsü vünüh tsie müzho shehveh ta küsa hi nüh thsüra naveh.

²⁸Thi zanyoküsü vü nga nohri sieküproluo kütseri nüh nohri samüküükrütümü, mari zorie na küsa hama thuoüji thsoshi kümtsemüra küsü, thitü nohri kenüh thuoüji küülole, thi jümatü Saküüwuowa vünüh.

²⁹Thi Khrista kenüh jüma sakütsü thuoüji ma kütsotü mpa nyu thitü ma kenüh münomüna na küsa kenüh nga wiethuoh.

³⁰ Hi nüh saluo kütse nohri nüh künguwa vü kürü küsü sah luo, thi khinyi thuoüji eh zhi sana küsa kenüh künaluo.