Read Pochuri Naga FILIPIRI 2 Bible Online

FILIPIRI 2 - Pochuri Naga bible

FILIPIRI 2

¹Jükenüh luovehküüchü wuori, thi kümüze küütho wuori thi Sietse vünüh küsü küsa, thi künyihwa thi küümze pehvehüji,

²küümze küsü sanü müshe küsü, thi luoveh küsü thi zarike sanü eh loküzhewa saju tsüluo.

³Küüproluo vünüh thi müshe küüji vünüh zanyo küsü nga müsatümü, thitü sakürünyie taji nyuri nüh no nyia vünüh mühieveh ti chieke nü saluo.

⁴Nyi küsüküsü nga ma mpa ma künyia mpa münotümü nü nyurikünyia nga no nü saluo.

⁵Khrista vünüh pehküveh luovehwa nohri azhie vü peh luo:

⁶Ma tü Saküüwuowa sie küsü wiethuoh, thitü Saküüwuowa sie zarike sa nta wurie müchieke.

⁷Thitü ma mpa ma sakürütso nü siepe kümüjie nyiri atso vünüh wuo.

⁸Thi nyiri kürho vünüh küngu kenüh ma tü ma mpa ma sakürünyie nü aküsü vü nga mümawie, jümpa mükünyu khieluothso rügi vünüh küsü nga müma wiethuoh nüh sa.

⁹Jükenüh Saküüwuowa nüh ma sakümüsie sheh müthuoh, thi anyo aveh nyia anyo kümüsietsahwa ma vü samütüthuoh.

¹⁰ Jükenüh thajüwu vü nga azhih rügi vü nga thi azhih kükhu vü nga Jisu nyo vü ru khotsü naveh,

¹¹thi Saküüwuowa Pawa küthohla vü Jisu Khrista tü VÜWA ta anyi küsüküsü nga apo vünüh phrahzhu naveh.

¹²Jükenüh küümze eh füri, nohri nüh zhüküna küru kümüjie khinyi wie nga jükümjie eh tü vü mpa mükünyu hi mükünyievü küünyihpuo jüüti saluo, thi nohri küülole kenüh krüthi kükhe nü küro luo,

¹³küpakenühnyunü küüro na küsa kenüh thi ma külo sanü küüro na küsa kenüh Saküüwuowa tü nohri vü küro veh.

¹⁴Mütsükhutsünyi tü thi müküna tü zanyo aveh saluo,

¹⁵nohri tü müshekümüsü müpeh nüh thi mütse na küsa kenüh, Saküüwuowa tsari thuoüji mükümüshori thi khuke mükünyuvü kütse kürho nyiri aza vü müküle mükünyieri sanü alati kümüjie azhih vü wie luo,

¹⁶kürhozhüwa küjephoke luo, jüüta thuoüji Khrista rülo vü ehlozhera naveh, küpakenühnyunü hi tü müjuju vünüh müzhünyutü müjuju vünüh münomüna nü müküro.

¹⁷Ma mpa nüh nohri kütsotü kükhurüpe rügi vü eh kürho sa ntawie ketünga hi tü eh loküzhe wiethuoh thi nohri aveh sie lozhe veh.

¹⁸Jükümjie nohri nga lozheluo thi hi nga sie nü lozheluo.

¹⁹Nohri zhühku thsü nü e lo saküwie na küsa kenüh Timothi nohrivü kümüto küze nti VÜWA Jisu vünüh müshe veh.

²⁰Hi siekütseri nyi küsü nga ma kümüjie eh kümüshe sie küsuothi nohri kenüh kütsaza münyie.

²¹Küpari thuoüji Jisu Khrista künyia kenüh nyu nü mari mpa mari künyia phakütsewie.

²²Thitü Timothi kümühie nohri mpa nüh thsüvehthuoh nü, apa atsamokümüjie ünüh jükümjie vünüh ma tü hi sie zhühlekümühiewa vü kürotse veh.

²³Eh kümüshe thuoüji jükenüh hi vü mokümjie sanaveh nüh küsara kümühie kümüto ma küze nti saveh.

²⁴Thi hi nüh VÜWA vü tsotü küveh thuoüji hi wienga shita runaveh.

²⁵Hi nüh müshe küveh thuoüji, hi sie küro kütsewa thi kürü Khrista riesanyi sakütsewa thi nohri zhühleküvüwa thi hi küthohtsa vü e kütsüküünawa eh nü Epafrodita nohri vü müküzeji mümühieti müsheveh.

²⁶Küpakenühnyunü ma tü nohri aveh nongü nü müngu küveh kenüh, ma tü na ta küsa nohri nüh küthsü kenüh ma tü lorüveh.

²⁷Zhütsa, ma tü na nü sü tsatsa nta sa. Thitü Saküüwuowa nüh ma kümüze tsü, ma vü mpa mükünyu hi nga kümüzetsü, küpakenühnyunü hi tü lokürü thi kürü lehü ti müküüsanta küsa kenüh.

²⁸Hi nüh ma küze na küsa eh luoveh hozake tsazaveh, jütathuoüji nohri ma küngule kenüh nohri tü lozhera naveh thi eh kütsaza nga züla naveh.

²⁹Jükenüh VÜWA vünüh loküzhe aveh vi ma sieke luo; thi anyi hakümjie küsari siakeluo,

³⁰küpakenühnyunü Khrista küüro kenüh ma tü sü zih, ma nüh makürho mükrüwiethuoh nüh tsü nü nohri küürowa hi vü sajutsü nta küsa kenüh.