Read Pochuri Naga FILIPIRI 3 Bible Online

FILIPIRI 3 - Pochuri Naga bible

FILIPIRI 3

¹Eh füri, eh sehkhe zhü thuoüji VÜWA vünüh lozheluo, Rhükütsüri rhütsü nta wie ketünga eh kenüh thuoüji kümnomna küsü nga münyie, thi jüüta thuoüji nohri kenüh küümphakhe wie.

²Ashuhri vünüh, thi kümüsü küürori vünüh, thi ahukürheri arie nyi mürie kütseri vünüh zhüzhü luo.

³Küpakenühnyunü hiri thuoüji hukürhetsahri sietse vünüh Saküüwuowa kükhurüri thi Khrista Jisu sie küsü sanü lozhekütseri, thi asazüh vü kütsotü thsemükütseri.

⁴Hi tü asazüh vü küsara rühle nga pehveh. Anyi küpari nüh asazüh vü küsara rühle pehveh üji hi nüh jüma nyia vünüh küsara pehveh.

⁵ Hi wuo nü rülo tüzeawa e hu rhe, hi tü Israel nyiri, Benjamin kuori, Ebriri azhie vünüh Ebriri küsü; Khonyo vünüh thuoüji hi tü Farisiri,

⁶ eh kütsaza vü thuoüji hi tü kümühuwa kümnomna kütsüri, künyitsa kenüh thuoüji Khonyo kükhu vü müküle mükünyieri.

⁷Thitü hi nüh akünyia küpeh aveh Khrista kenüh jümari tü zanyo küsü nga chieke müvehthuoh.

⁸Khrista Jisu eh VÜWA küthsüra ma me hozake küpeh kenüh zanyoaveh kümiemüthuoh ta küsa azhütsa wiethuoh. Küpakenühnyunü hitü ma kenüh zanyo aveh kümiekümü samüthuoh, thi hi tü Khrista nyiara na küsa kenüh jümari aveh aküja vü chiekemüthuoh,

⁹thi ma vü küpeh ngura, hi mpa hi künyitsa kürho khonyo rügivünüh nyu nü kütsotü rügi vünüh Saküüwuowa vünüh küru künyitsawa, jümatü kütsotü Khrista vünüh kütsüwa.

¹⁰Hi nüh kümüngutsahwa thuoüji hi tü ma thi ma kürholekükhra thsüra, thi ma kümnomnari vü ma sie münomüna nü ma küsü kümüjie hi tü sara ti küsawa wiethuoh,

¹¹jüta sataji küsakümhie sanü hi nga küsü vünüh kürholewa vü küjuwa sanaveh.

¹²Hi tü jümawa vü rujumüthuoh ti küsa nyu, nyutü hi tü mühiejumüthuoh ti küsanyu; thitü jüma vi eh zhi sana küsakenüh zhütseveh, küpakenühnyunü Khrista Jisu nüh hi vi nü mampa ma zhi sakümüthuoh kenüh.

¹³Eh füri, hi tü jüma hi mpa nüh sara ti mümüshe; thitü ehkürho vü zhühnyo küsü pehveh, jüma thuoüji: asevü küpehwa kümamü nü atüvü pehküvehwa zhe zhütseveh.

¹⁴Khrista Jisu vünüh Saküüwuowa nüh rügi vünüh jisuo tsünta jiküveh, wa nti küsawa vü zhe zhütseveh.

¹⁵Hiri sietse lewuovü khruokümüri thuoüji kürü hama müsheluo, thi mükütüküzü zanyo küsüküsü vü nga nohri nüh müshezihveh üji, jüma nga Saküüwuowa nüh nohri saküthsünaveh.

¹⁶Hiri khiela ruju thuoh ünüh jümawa wule vünüh zhütsanü küjephoke taji wa ünüh raluo.

¹⁷ Eh füri, eh kürho khuke kümüjie nyi mürie nü rholuo, thi hiri nüh rhoküütsa kümüjie vünüh müzhe nü rholuo.

¹⁸Küpakenühnyunü hi nüh nyiri hozake khuke khinyi shie nohri vü küzathuoh, thi khinyi nga hi nüh eh rüthsü shu nü nohri vü küza le veh, tinü nyi jümaritü Khrista khieluothsowa mükünongüri kümüjie vünüh rhomü.

¹⁹Thitü mari thuoüji sehkhe vü zoriemünathuoh thi mari kükhurüwa thuoüji mari avo wie, thi mari thuoüji küzükrülehwie ketünga rhieza tsetseti, mari müshe tü azhihvü zanyori vü thse nü zanyo hamari satsetseti.

²⁰Thitü hiri thuoüji rügi nyirithuoh, thi jü vünüh hiri tü Küülole VÜWA Jisu Khrista huoveh.

²¹Ma nüh hiri satsa küsürawa khaphrü nü ma kütholah satsakümüjie satsü naveh, kükhra jüma nüh zanyo aveh ma kükhu vü vithse naveh.