Read Pochuri Naga FILIPIRI 4 Bible Online

FILIPIRI 4 - Pochuri Naga bible

FILIPIRI 4

¹Jükenüh eh füri, hi tü nohri kümüze thi müngutse veh, ehkülozhe thi kajilüwe tü jükümjie vünüh VÜWA ehküümzetsahwa vü tsie müzho veh.

²Euodia thi Sintikhe masü VÜWA vünüh azhüka üti hi nüh khuoveh.

³Thi no hi sie küsü sanü kütsewa vü nga khuoveh, no nyimza hamasü kükraluo, küpakenühnyunü masü tü hi sie nü awuowuovü Clement thi hi sie nü kürokütse küpari nga zhühlekümühiewa kükhra thse kürokütse kenüh, mari anyo tü kürho lasipha lovü tüveh.

⁴VÜWA vünüh lozhe peh huo luo, hi nüh küzalehü na nü nohri lozheluo.

⁵Nohri luoveh küsuo nyiri aveh nüh küüthsüluo. VÜWAshenyi müthuoh.

⁶Zanyo küsü nga müshe nü kütsaza müsatümü, thitü zanyo avehvü nga kükhuo sa thi zhiekezhiekhri nü VÜWA kümüna tsüluo, nohri nüh kükhuori tü Saküüwuowa küüthsüluo.

⁷Thi Saküüwuowa kürünyiwa küthsü aveh vü küpehwa nüh Khrista Jisu vünüh nohri luoveh thi müshe sieküpehwa saluo.

⁸Eh füri, hi nüh küüzakhenguü thuoüji, mowa nü zhütsaveh nüh, mowa nü mütseveh nüh kümühie thi küsiake kütse pehvehüji kümühieti jüri müsheluo.

⁹Nohri hi vü nüh mowa thsüra, vira, künara thi ngura nüh saluo; thi Saküüwuowa kürünyiwa nüh nohri sietse naveh.

¹⁰Nohri eh kenüh kütsazawa küthele nü kütse tsotho hothake tekütsethuoh kenüh hi tü VÜWA vünüh lozhe sheh tetsethuoh; nohri eh kenüh tsaza sheh teruthuoh, thitü nohri tü tsotho kümühie müsara nüh sateru.

¹¹Hi nüh küsiake küvü kümüngu kenüh phrate müveh, thitü hitü mokümjie lozhe naveh nüh hi mpa nüh thsüküveh kenüh.

¹²Mokümüjie küzüla vünüh rho naveh nüh hi tü hi mpa nüh thsü, thi mokümjie aküzhi vünüh rho naveh nüh hi tü hi mpa nüh thsü, tsotho küsüsü vü nga satü thi aveh vü nga satü küzhe nü küzhile nga thi küzüla nga hi nüh thsü.

¹³Hi sakükhrakütsüwa Khrista vünüh hi tü zanyo aveh sara naveh.

¹⁴Thitü eh kümnomnavü hi sie küüsuo kenüh nohri müna sheh.

¹⁵Thi nohri Filipiri, hi nüh Makedonia vünüh tseshu nü Zhühthe Kümühie küüro sate küru vü, nohri wie küchie nüh kümühu küsü nga hi sie tsarü nü akütsüvü nga thi akünguvü nga samüru.

¹⁶ Küpakenühnyunü hi Thesalonia vü küpehvü nga nohri nüh küsükeri mpa nyu nü jüma nyia vü nga hi kükratsü.

¹⁷Hi nüh nohri zanyo vi hi küte phamütse, thitü nohri nüh kütsüwa avi saküzhi nti küsa wiethuoh.

¹⁸ Aküte aveh hi tü ngurathuoh, thi hozake wale veh; arheküüngu vi kükhurü, küvikütse küsahthuoh thi Saküüwuowa loküzhe küsara nohri nüh Epafrodita vü küüzeri ngura nü hi tü provehthuoh.

¹⁹Thi VÜWA nüh ma küthohlathovü vünüh nyirhie küveh Khrista Jisu vünüh nohri müviji mükümühie aveh tsü naveh.

²⁰Hiri Saküüwuowa thi VÜWA küthohlathovü küsuokürhowa saluo, Amen.

²¹Kümtseri aveh vü nga Khrista Jisu nüh loküzhe zhü tsü veh. Afüri hi siepehküvehri nga nohri vü loküzhezhü tsü veh.

²²Kümtseri aveh nga nohri vü loküzhezhü tsü veh, pehkhewie ketünga Kaisar zhehlori nüh nohri vü loküzhezhü tsüveh.

²³VÜWA Jisu Khrista küümzewa nüh nohri aveh sieküpehwa saluo. Amen.