Read Pochuri Naga JOSHUA 10 Bible Online

JOSHUA 10 - Pochuri Naga bible

JOSHUA 10

¹Jerusalem kajiwa Adonizedek tü Joshua nüh mokümjie Ai vitera thi jüma zorie khehm nüh, Jeriko thi jüma kajiwa vü küsa kümjie Ai thi jüma küjiwa vü nga sa, thi mokümjie Gibeon vü kürhori tü Israel nyiri sie kathuo nü mari aza vü pehveh ünüh küünara vü,

²ma tü krü jisheh tewa, küpakenühnyunü Gibeon tü anyuji küsü kaji nyuji kümjie küsa küsü, thi küpakenühnyunü Ai nyieh vünüh ji, thi ma nyiri aveh tü kümzho kenüh.

³Jükenüh Adonizedek Jerusalem kajiwa nüh zhüle vi Hebron kajiwa Hoham vü, Jarmut kajiwa Piram vü, Lakhish kajiwa Jafia thi Eglon kajiwa Dibir vü küze taji,

⁴“Hi vü shuhru nü hi kükra taji kürü Gibeon zothem ünüh raluo; küpakenühnyunü ma tü Joshua thi Israel nyiri sie kathuo kümthuoh kenüh,” ti küza.

⁵Jüti sanü Amorri kaji müngari Jerusalem kajiwa, Hebron kajiwa, Jarmut kajiwa Lakhish kajiwa thi Eglon kajiwa ti mari rienyiri sazhuhnü mari rienyiri aveh sie taji Gibeon rühwieluo nü kürünape sataji ma sie arie sa.

⁶Thinü Gibeon nyiri tü Gilgal kürünape Joshua vü zhühle küze taji, “Noh sieperi vünüh noh rüzih müpeh tü shiti hiri külole luo, thi hiri kükratsüluo; küpakenühnyunü küzhiho vü kürho Amorri kajiwa aveh tü sezhuh nü hiri sie saluovehthuoh ünüh,” ti küza.

⁷Thinü Joshua tü Gilgal vünüh tekhru, ma thi arie küsa nyiri aveh, thi luoveh küji kükhrari aveh khru kheh.

⁸Thi VÜWA nüh Joshua vü, “Mari mükrü tümluo, küpakenühnyunü hi nüh mari vi noh ke vü thsekümthuoh kenüh; mari nyi küsü nga noh tüvü mütsiera,” ti küza.

⁹Jükenüh Joshua tü Gilgal vünüh rüza ajü tse nü zhürüluo mari vü ru.

¹⁰Jüti küsa vü VÜWA nüh Israelri tüvü mari vi ariehjih küsa vü vehjakem, jüti sanü Gibeon vünüh khieloti küzothe sanü zothem, thi Bet-horon vü kütsuo leh küju mari zhewa, jüti sanü Azeba thi Makhed küju mari zothe wa.

¹¹Mari tü Israelri tüvü zhü nü Bet-horon tsaleh vü tsetsuo ünü VÜWA nüh atülü vünüh aloh küjiji veh küütsuotsataji mari tü süm; Israel nyimpari nüh anyuchuwa vi nü küzothe nyieh vünüh rahzhi nüh küvehthe nüh küüzhi sa.

¹²Thinü VÜWA nüh Amorri vi Israel nyiri ake vü küthse rülo vü Joshua nüh VÜWA vü Israelri küngu vünüh, “Rünyi, noh tü müküngahtü zoti Gibeon vü tsahtso luo, thi noh asa tü Ajijalon nyuo vü tsahtso luo,” ti küza.

¹³Thinü arünyi tü zoti tsahtsotewa, thi asa nga tsahtsotewa, akuoküjiwa tü ma mükünongüri vü amüthoh müjie küvi küju nü jüti tsahtsotewa. Hamatü Joshar Lasipha lovü rhümsa ülo? Arünyi tü rülo küsü ajü kümjie küsa tetu nta müpre thuoh nüh atülü zhila vü pehtewa.

¹⁴VÜWA nüh nyi küsü jikhi künakütsü jüma tüvü nga thi khinyi küju wienga arülo jüüta küsa münyie; küpakenühnyunü VÜWA nüh Israelri kenüh küsaluo kenüh.

¹⁵Jüti sanü Joshua, thi Israelri aveh ma sie nü Gigal kürünape vü shele teru.

¹⁶Kaji hama müngari tü zhütewa mari mpa nüh Makeda lopie vü küthitewa.

¹⁷Thinü Joshua vü, “Kaji müngari tü Makeda lopie lovü küthila nü ngurathuoh,” ti küza.

¹⁸Jüti küüzavü Joshua nüh, “Aloh küjiri küpriru alopie sotem nü anyiri sataji küühuom luo;

¹⁹thitü nohri thuoüji jüla müpeh tü nohri mükünongüri zhewa nü asevü nüh mari pa luo, thi mari tü mari nyujiri vü mükütu tümluo; küpakenühnyunü VÜWA nohri Saküüwuowa nüh mari vi nohri kevü thsekümthuoh kenüh,” ti küza.

²⁰Joshua thi Israel nyiri nüh mari zothe küji sheh nü mari zothe taji mari müjie saküümtse küju nü zothewa, mari zothetu nü pehküveh kümnyiehri tü anyuji kümzhori lovü tetu,

²¹nyiri aveh nga totera nü Makeda kürünape Joshua vü shele teru kheh; nyi vehküsü wie nga ma mizhi Israel nyiri vü phrahte küüngah müsa.

²²Jüti küsa vü Joshua nüh, “Lopie küsotewa sataji lopiewa vünüh kaji münga jümari hi vü sieraluo,” ti küza.

²³Jüti küüza vü kaji münga jümari: Jerusalem kajiwa, Hebron kajiwa, Jarmut kajiwa, Lakhish kajiwa thi Eglon kajiwa ti lopiewa vünüh siezhu nü ma vü viru.

²⁴Thi mari nüh kaji münga jümari Joshua vü siezhu küru vü, Joshua nüh Israel nyiri aveh jizhuh taji arie vü küjiri ma vü nyi küwari vü, “Shehnyira nü nohri ajih vi kaji hamara ku rügi vü nyi luo,” ti küza. Jüti küüza vü mari tü shehnyiru nü mari jih vi mari ku rügi vü nyi kheh.

²⁵Jüti sanü Joshua nüh mari vü, “Mükrü tüm, nyutü luoveh müzah tümluo; thitü müzho luo thi luoveh ji luo; küpakenühnyunü VÜWA nüh nohri sieküsaluo nohri mükünongüri aveh vü hakümjie satsü naveh,” ti küza.

²⁶Asevü thuoüji Joshua nüh mari rehthem nü athsoh münga rügivü huthuo sa. Thi mari tü münüleh küju huthuoh sa;

²⁷thitü rünyi kütuleh tsotho teru ünü Joshua nüh azhütsü taji athsoh rügi vünüh vim nü mari nüh küüthipe lopie lovü mari kümo tü vehjakem taji alohri küpriru nü alopiewa sotem, jüma tü nosü küjunga pehwieveh.

²⁸Jüti sanü jüma rülo vünüh Joshua nüh Makeda tü vitera, thi anyuha nüh jüma thi ma kajiwa rehthem; ma nüh nyi küsü nga sanü mükükhe wiethuoh nüh jüla küpeh nyiri aveh zoriekhehkümsa; thi ma nüh Jeriko kajiwa vü sakütsü kümjie Makeda kajiwa vü nga satsü.

²⁹Jüti küsa sevü Joshua thi Israel aveh tü ma sie nü Makeda vünüh tsezhu taji Libna vü tewa, thi Libna sie nü saluo;

³⁰thinü VÜWA nüh jüma nga thi ma kajiwa nga vi Israel ke vü thse nü anyuha nüh jüma thi jüla küpeh nyiri aveh rehthem, ma nüh jüla nyi küsü nga sanü mükükhe wie; thi ma nüh Jeriko kajiwa vü nga satsü.

³¹Jüsevü Joshua thi Israel aveh tü ma sie nü Libna vünüh tsezhu taji Lakhish vü tewa nü jüma zhe.

³²Thi VÜWA nüh Lakhish vi Israel ke vü thse taji ma nüh rülo künyiawa jüma vira nü anyuha nüh jüma nga thi jüla küpeh nyiri aveh nga ti ma nüh Libna vü küsa kümjie rehthe khehm.

³³Thinü Gezer kajiwa Horam tü Lakhish kükra nti ru ünü Joshua nüh nyi küsü nga mükükhe wiethuoh nüh ma nga thi ma nyiri aveh nga ti rehthe khehm.

³⁴Jüti saküm sevü Joshua tü Israel aveh sie nü Lakhish vünüh kari Eglon vü tewa; thi mari tü jüma zhe.

³⁵Thi ma nüh jüma rülo vünüh anyu jüma vi nü anyuchuwa ha nüh jüma nga thi anyi jüla küpehri aveh nga ti rehthe khehm nü jüma rülo vünüh ma nüh Lakhish vü küsa kümjie zorie khehm.

³⁶Jüti sanü Joshua tü Israel aveh sie taji Eglon vünüh Hebron vü tewa nü jüma zhe,

³⁷thi jüma vira taji anyuchuwa ha nüh ma kajiwa nga, ma nyuwa nga thi jüla küpeh nyiri nga ti aveh rehthe khehm nü ma nüh Eglon vü küsakümjie nyi küsü nga mükükhe wiethuoh nüh anyuwa nga thi jüla küpehri aveh nga ti zorie khehm.

³⁸Jüti saküm sevü Joshua thi Israel aveh asevü sheleru nü Debir zhe,

³⁹thi ma nüh jüma nyu aveh vitera; mari nüh anyuchuwa ha nüh mari nüh rehthem nü jüla küpeh nyiri aveh zorie khehm; ma nüh Hebron thi Libna thi ma kajiwa vü küsa kümjie nyi küsü nga mükükhe wiethuoh nüh Debir thi ma kajiwa vü nga satsü

⁴⁰Jüti sanü Joshua nüh azhih jüla aveh, küzhiho vü anyu nga, Negeb nga, azhih kürünyie nga kümahtsa nga thi mari kaji aveh nga ti jam; ma tü nyiküsü nga sataji mükükhe wiethuoh nüh sa, thitü VÜWA Israel Saküüwuowa nüh azhükütsü üta arühtho küsah aveh thuoüji zorie khehm.

⁴¹Jüti sanü Joshua nüh Kadesh Barnea vünüh Gaza küju mari cham, thi Goshen anyu aveh Gibeon küju chaküm sa.

⁴²Thi Joshua nüh hamari kaji aveh thi mari azhih aveh küsükeri vünüh küvikheh sa, küpakenühnyunü VÜWA Israel Saküüwuowa nüh Israel kenüh küsaluotü kenüh.

⁴³Jüti sanü Joshua tü Israel aveh ma sie nü Gilgal kürünape vü shele teru.