Read Pochuri Naga JOSHUA 13 Bible Online

JOSHUA 13 - Pochuri Naga bible

JOSHUA 13

¹Khinyi thuoüji Joshua tü khruomthuoh thi mahvi zhimthuoh; jüti küsa vü Vüwa nüh ma vü, “Noh tü khruomthuoh thi mahvi zhimthuoh, thi khinyi nga azhih khielota küvileh pehüveh;

²Azhih müjie küvi hama Filistinra suo; thi Geshurri aveh,

³(Shihor vünüh, jüma tü Egypt zhieshu wuovü, zhiese wuovü Ekron rüshu, jüma tü Kanan kümjie vü chieke; Filistin vü takrü küsamünga peh, jümari tü Gaza, Ashdod, Ashkelon, Gat thi Ekron), thi Avimri nga,

⁴zhieseh wuovü Kananra zhih aveh, thi Mera thuoüji Sidonra zhih, Afek vünüh Amorra rüh küju,

⁵Gebalra zhih, thi Lebanon aveh rünyiküshupe wuovü küju, Baal-gad vünüh Hermon Küzhi kükhu vünüh Hamath leshu küju,

⁶küzhiho vü kürho anyu aveh Lebanon vünüh Misrefotmaim küju, Sidonri aveh küju wie nga Israel nyiri tüvü nüh hi nüh hi mpa nüh mari zhejam naveh; hi nüh azhükütsü kümjie Israelri küürho na küsakenüh azhih vi nü mari kütsü mpa nüh saluo.

⁷Jükenüh khinyi thuoüji Israelri küürho na küsa kenüh azhihwa küsuo taji akuoh tüguh thi Manase kuoh küzhilari vü küsuotsüluo,” ti küza.

⁸ VÜWA siepewa Mosa nüh kütsü üta Manase kuoh küzhilari sie nü Reubenri thi Gadri tü mari aka vira:

⁹Aroer vünüh jüma tü Arnon nyuo nato vünüh, thi anyujiwa jüma tü anyuo azhila vünüh, thi Medeba ho kütake vünüh Dibon küju,

¹⁰Amonri kajiwa Sihon, Heshbon vü küüketewa nyujiri aveh, thi Amonri rüshu küju;

¹¹thi Gilead, thi Geshurri thi Makatri asuo küju, Hermon Küzhiaveh, thi Bashan vünüh Saleba küju aveh;

¹²Bashan vü Og, Ashtarot thi Edrei vü küüketewa kajipe aveh (ma mpa nüh Refaim vü kükheja küsa sa); Mosa nüh hamari cha nü zheküja sa.

¹³Jütawie ketünga Israel nyiri tü Geshurri nyutü Makatri zhemja nüh sam; thitü Geshur thi Makat tü nosü küju nga Israelra za vü nyirho tsewie.

¹⁴ Levi akuoh vü mpa nüh Mosa nüh aka mütsü nüh sam; VÜWA nüh mavü küüza kümjie Israel nüh anyih nüh tso nü VÜWA Saküüwuowa vü kükhurü vi taji mari aka küüsa.

¹⁵Thi Mosa nüh mari tharuo müzhe nü Reuben kuoh vü aka tsü.

¹⁶Jükenüh mari zhih tü Aroer vünüh jüma tü Arnon nyuo nato vü küpehwa, thi Medeba ho kütake aveh;

¹⁷Heshbon ho thi ma nyujiri küzhiho kütake vü küpeh aveh; Dibon, Bamotbad thi Betboalmeon,

¹⁸thi Jahag, Kedemot thi Mefat,

¹⁹Kiriathaim, Sibma, Zeretshahar aküzhiwa nyuo vü,

²⁰Betpeor, thi Pisga rüshe kütsuori thi Betjeshimot,

²¹jüma tü küzhiho kajiwa Sihon kajipe aveh, Heshbon vü küüketewa, Mosa nüh Midia sierhüri sie nü küchara, Evi, Rekem, Zur, Hur thi Reba, Sihon kajitsa azhih jüla kürhori.

²²Israel nyiri nüh küpari sie anyuchuwa nüh zotheküm Beor tsa Balaam, küütüzhü phrahtekütsüwa tsa nga.

²³Reuben nyira rüshu tü Jordan nüh arüh sa. Hamatü Reubenra ka, mari tharuo vünüh mari nyuji thi anyuzari kümzhe.

²⁴Thi Mosa nüh Gadri kuoh vü nga mari tharuo müzhe taji akaküsüsü tsü.

²⁵Mari zhih tü Jazer, thi Gilead nyuji aveh, thi Amonra zhih küzhila Aroer vü, jüma tü Rabbah zhieshu wuovü,

²⁶thi Heshbon vünüh Ramat Mizpe thi Betonim, thi Mahanaim vünüh Debir zhih küju,

²⁷thi anyuo vü thuoüji Betharam, Betnimra, Sukkoth thi Zafon, Heshbon kajiwa Sihon kajipe küpari thuoüji Jordan nüh arüh, asaji pohtevü Khineret Juhküji Jordan zhieshu wuovü küju.

²⁸Hamatü Gadri tharuo müzhe nü mari vü aka kütsü mari nyujiri thi nyuzari.

²⁹Thi Mosa nüh Manase akuoh küzhilari vü aka tsü, jüma tü tharuo vünüh müzhe nü Manaseri vü totsü.

³⁰Mari asuo tü Mahanaim vünüh wa Bashan aveh, Bashan kajiwa Og kajipe ajü, thi Bashan vü küpeh Jair anyuji aveh, anyuji rorake,

³¹thi Gilead küzhila, Ashtarot thi Edrei, Bashan vü Og kajipenyujiri, hamari tü Makhirri küzhila kenüh mari tharuori müzhe tajivi Manase tsa Makhir nyiri vü totsü.

³²Jordan tuwuovü Jeriko zhiehshu wuovü Moab kütake Mosa nüh akaküsuo tsü.

³³Thitü Levi kuoh vü thuoüji Mosa nüh aka mütsü nüh sam; ma nüh mari vü küüza üta VÜWA Israel Saküüwuowa tü mari akawa küsa kenüh.