Read Pochuri Naga JOSHUA 17 Bible Online

JOSHUA 17 - Pochuri Naga bible

JOSHUA 17

¹Jüsevü Manase kuoh vü tokütsü sa, küpakenühnyunü ma tü Josef atsa pokhuwa küsa kenüh. Manase atsa küwuokhuwa Makhir, Gileadapa, Gilead thi Nashan vü totsü, küpakenühnyunü ma tü arie küsari küsa kenüh.

²Thi Manase kuoh küpari aveh nga mari tharuo vünüh totsü, Abiezer, Helek, Asriel, Shekhem, Hefer thi Shemida; hamari tü Josef atsa Manase küthsoküzhi nyimpari mari tharuo vünüh khe.

³Khinyi thuoüji Zelofehad, Hefer atsa, Gilead atsa, Makhir atsa, Manase tü atsa nyimpari münyie, thitü nyimzari mpa; thi hamari tü ma tsavühra nyo: Mala, Noah, Hoglo, Milkon thi Tirza.

⁴ Mari tü Eleazar navüwa, Nun atsa Joshua thi sierhüra tüvü ru taji, “Hiri tsehpra sie nü hiri tü aka tsü üta VÜWA nüh Mosa vü azhütsü saveh,” ti küza. Jükenüh mari tü VÜWA nüh azhükütsü üta mari pa ajienüra zavü ma nüh aka vi mari tsü.

⁵Jükümjie vünüh Gilead thi Bashan zhih nyieh vünüh Manase vü asuope türake tewa, jüma tü Jordan küpa wuovü;

⁶küpakenühnyunü Manase tsavühri tü ma tsa nyimpari sie aka küngu kenüh. Gilead zhihwa tü Manase küpari vü totsü.

⁷Manase natonahuori tü Asher vünüh Mikmethat ju, jüma tü Shekhem zhiehshu wuovü; jüti sanü arühwa tü Entapua nüh kürho zhieseh vü mürhü wa.

⁸Tapua azhih tü Manase azhi, thitü Tapua anyu Manase rüh vü thuoüji Efraim tsara zhi.

⁹Jüti sanü arüh wa tü Kana kuza lovü tetu. Hala nyujiri akuza zhieseh wuovü. Manase nyujiri azhievü küpehri tü Efraim zhi. Jüti sanü Manase rüh wa tü akuzawa zhiehtü wuovü wa nü juhküjiwa vünüh pohte sa;

¹⁰zhieseh wuovü azhih tü Efraim zhi thi zhiehtü wuovü thuoüji Manase zhi, juhküjiwa vünüh arühwa tü shu; zhiehtü wuovü thuoüji Asher küju thi zhiehshu vü thuoüji Issachar küju.

¹¹Jüsevü nga Issachar vü thi Asher vü Manase nüh Betshean thi ma nyuzari, Ibleam thi ma nyuzari, Dor kürhope thi ma nyuzari, Endor kürhope thi ma nyuri, Tanak kürhope thi ma nyuzari, Megiddo kürhope thi ma nyuzari; kücheawa thuoüji Nafat.

¹²Jüta wie ketünga Manase nyimpari tü anyuji jümari müvira nüh sam; thi Kananri nüh mükütuo wiethuoh nüh rhotewa.

¹³Thitü Israel nyiri tü rho müzhoteru ünü mari tü Kananri vi nü tete taji küüroh, jüti sanü mari zhemja kheh nüh sam.

¹⁴Jüti küsa vü Josef kuoh nüh Joshua vü, “Noh tü mokenüh hi vü nü aküze küsü thi suope küsü mpa aka tsü lo, hi tü anyi müküchierhürari, thi khinyi küju wie nga VÜWA nüh tsia hi tsü tse wie ketünga?” ti küna.

¹⁵Thinü Joshua nüh mari vü, “Mükütüküzü nohri nüh anyi müküchierhüra samthuoh üji Efraim küzhiho anyu tü nohkeri nüh kümnyielethuoh kenüh reza vü wa nü Perizri thi Refaimri zhih vü azhie sakümtse luo,” ti küza.

¹⁶Thitü Josef kuoh nüh ma vü, “Aho anyuwa tü hiri kenüh mütse nüh samthuoh; jütawie ketünga kütake vü kürho Kananri aveh, Betshean vü nga thi ma nyuzari thi Jezreel Nyuo vü küpehri tü amürü rawuhkheka peh khem,” ti küza.

¹⁷Jüti küüza vü Joshua nüh Josef zheh, Efraim zheh thi Manase zheh vü, “Nohri tü müküchierhüra nyiri thuoh, thi kükhra küji küpehri thuoh; jükenüh nohri tü suope küsü mpa küvileh nyuthuoh,

¹⁸thitü küzhiho anyuwa tü nohri zhi sanaveh, ma mpa nüh jüma tü reza wie ketünga nohri nüh jüma sakümtse taji ma rüshu kületsuo küju vi naveh; ma mpa nüh Kananri nüh amürü rawuhkheka peh wie ketünga thi mari tü khra wie ketünga mari zhejam naveh,” ti küza.