Read Pochuri Naga JOSHUA 18 Bible Online

JOSHUA 18 - Pochuri Naga bible

JOSHUA 18

¹Jüti küsa vü Israel nyiri müzawa aveh tü Shilo vü sezhuh nü jüla kümhu juhthsüzheh khake; thi azhihwa tü mari kükhu vü peh khe.

²Khinyi wie nga Israel nyiri azhievü akuoh türü aka suope müjie kütsü pehveh.

³Jükenüh Joshua nüh Israel nyiri vü, “Nohri tü küthakele nga thachu nü tu VÜWA nüh nohri para Saküüwuowa nüh nohri kütsü azhihwa müvi nüh peh na lo?

⁴Akuoh küsü vünüh nyi kücheche tsüluo, hi nüh mari küze nü azhihwa no kümkiele naveh ünüh, mari aka küvi zhühke rhü nü hi vü ru luo.

⁵Mari tü jüma suope türü küsuo naveh, Judah tü mükütuo nüh ma zhih zhieseh wuovü vi naveh thi Josef zhehlo thuoüji zhiehtü wuovü.

⁶Thi azhihwa tü küüsuo türü vünüh rhü taji zhühkewa hala hi vü viru luo; hi nüh hala nüh VÜWA hiri Saküüwuowa tüvü nüh nohkeri nüh aküze satsü naveh ünüh.

⁷Nohri azhievü Leviri thuoüji suope küpehwa nyu, küpakenühnyunü VÜWA navü küsa tü mari aka; Gad Reuben thi Manase kuoh küzhilari thuoüji mari nüh kütsü kümjie Jordan tuwuo zhiehshu wuovü ngumthuoh,” ti küza.

⁸Jükenüh mari tü mari letse vü tsetewa; thi Joshua nüh azhih zhühke wa rhü viru nta küwari vü azhühzho tsü taji, “Wa nü azhihwa noküzülezüza luo, thi kümhieti azhühke rhü taji hi vü shele ru luo; hi nüh Shilo hala nüh VÜWA tüvü nüh nohkeri nüh aküze satsü naveh ünüh,” ti küza.

⁹Jükenüh mari tü wa nü azhih jüla tsetsuo tsekhru ti sataji lasipha küsü lovü anyuri tü küüsuo türü sanü rhüke; jüti sanü mari tü Shilo kürünape Joshua vü ru,

¹⁰jüti küsa vü Joshua nüh makeri’a nüh Shilo vü VÜWA tüvü nüh aküze sataji Joshua nüh Israel nyiri vü azhihwa mari papa müthoh vünüh suope vünüh küsuo tsü.

¹¹Aküzewa tü Benjamin kuoh müzhe nü tharuo vünüh shuru taji Judah kuoh thi Josef masü azhievü küturu üta azhihwa küsuo tsü.

¹²Zhiehtü wuovü mari arüh tü Jordan vünüh sate; jüla nüh Jeriko zhiehtü asafü wuovü wa, jüti sanü zhiehtu küzhiho nyu vü tseke taji Bethaven reza vünüh apohte sa.

¹³Jüla nüh tsele zhieseh wuovü Luz küüjo wuo Luz safü wuovü (Bethel küzarikewa) vü wa, thi jüla nüh rüsheturu Atarothadar ju nü aküzhi alü vü Bet-horon Sajiwa zhieseh vü ju.

¹⁴Thi jüla nüh küreke küpavü wa le taji zhiehtu wuovü zhieseh vü küreke nü zhieseh vü küpeh aküzhi vü Bet-horon küwiejie wuovü wa taji Kiriatfoal (jüma tü Kiriatjeatrim) Judah kuoh nyuji nüh pohte sa. Hama nüh zhiehtu wuovü arüh satezhu.

¹⁵Thi zhieseh wuovü thuoüji Kiriat Jearim nato vünüh sate nü jüla nüh Efron vü wa taji Neftoa Juhri juwi küshu ju;

¹⁶jüti sanü jüla nüh lahvü Hinnom atsa nyuo noküüze aküzhi rüshu vü tsuo, jüma tü Refaim nyuo zhiehtü pohte küju; thi jüla nüh Hinon nyuo tsuo nü Jebusri safü vünüh Enroged vü rüshetsuo;

¹⁷jüti sanü jüma tü kükhole taji zhiehtü wuovü küjo nü Enshemesh vü tewa, jüla nüh Giliot, jüma tü Adumim vü kükhru küüprüke vü tewa; jüti sanü jüla nüh Reuben tsa Bohan lovü tetsuo;

¹⁸thi zhiehtü wuovü tseke taji Bet-haraba safü vünüh rüshetsuo Araba ju;

¹⁹thi jüla nüh Bet-hogla safü zhiehtü wuovü wa nü Jordan pohte zhieseh wuovü Mütsü Juhküji nyakuo zhiehtü wuovü nüh pohte: hamatü zhieseh wuovü arüh.

²⁰Jordan thuoüji ma rüh zhiehshu wuovü nüh sashu. Hamatü Benjamin kuoh tharuo vünüh müzhe nü aka arütorüto vünüh samkiele nü kütsü.

²¹Khinyi thuoüji Benjamin akuoh tharuo vünüh müzhe taji anyujiri, Jeriko, Bet-hogla, Emekeziz,

²²Bet-haraba, Zemaraim, Bethel,

²³Avim, Para, Ofra,

²⁴Khefaramoni, Ofni, Geba nyuji türakünyi thi mari nyuzari:

²⁵Gibeon, Rama, Berot,

²⁶Mizpe, Khefira, Noza,

²⁷Rekem, Irpeel, Tarala,

²⁸Zela, Haelef, Jebus (jüma tü Jerusalem), Gibeah (Ebri vü Gibeah) thi Kiriat Jearim (Ebri vü Kiriat) nyuji türamzü thi mari nyuzari. Hamatü Benjamin kuoh aka tharuo vünüh müzhe nü kütsü.