Read Pochuri Naga JOSHUA 2 Bible Online

JOSHUA 2 - Pochuri Naga bible

JOSHUA 2

¹ Nun atsa Joshua nüh Shitim vünüh küriehziri künyi küüzhevünüh küze taji, “Wa nü azhihwa noluo, pehkhewie ketünga Jeriko noluo,” ti küza. Jüti küüza vü masü tü ru taji Rahab, küüphroküphrievühwa zheh vü ru nü jüla peh.

²Thinü Jeriko kajiwa vü, “Halie, sütavü hala azhihwa riehzi nta Israel nyi wuori rupehvehthuoh ünüh,” ti wa küza.

³Jüti küüza vü Jeriko kajiwa nüh Rahab vü zhühle küze taji, “Noh vü ru nü noh zheh lovü tu pehküveh nyiri alievü vizhuwaluo; küpakenühnyunü mari tü azhihwa riehzi nta rupeh küveh kenüh,” ti küza küze.

⁴Thitü nyimzawa nüh anyi jümasü vi nü küthim taji masü vü, “Azhütsa, anyiri tü hi vü ruthuoh, thitü masü tü khievü nüh ru nüh hi tü müthsü;

⁵atsohzoküm vü kheriwa khemluo nti ünü masü tü alievü tewathuoh; masü tü khievü tewathuoh ünüh hi nü müthsü; shiti zhewaluo, küpakenühnyunü nohri tü masü phara wie naküveh kenüh,” ti küza.

⁶Thitü nyimzawa nüh masü aluomuo rügivü siekuo nü khrükhrüwie arhu vizhuh küsa lovü küüthim.

⁷Thi anyi jümari tü masü zhe nü Jordan lehkhuji vü akeka küju tewa; thi kuozheküwari alievü shutewa ünü mari tü anyuwa kheri khem.

⁸Küriehzi künyi müjie zehteküwa tüvü nüh nyimzawa tü luomuo rügivü masü vü wa,

⁹thi masü vü “VÜWA nüh azhih hama vi nohri tsümthuoh ta küsa hi nüh thsüvehthuoh, thi nohri kükrü tü hiri vü terumthuoh, jüti sanü azhih hala kürholi tü nohri tüvü nüh arühtha sümthuoh.

¹⁰Küpakenühnyunü nohri nüh Egypt vünüh tsezhuküru vü VÜWA nüh mokümjie Kümru juhküji saküwehtsü thi Jordan tuwuovü küpeh Amorri kajiwa Sihon thi Og masü vü mowa sa thi zorie khehm nüh hiri nüh küünarathuoh kenüh.

¹¹Hiri nüh jüma künara ünü hiri luoveh tü sütewa thi nyimpari nyi küsü vü nga luoveh küji münyie nüh satewa, küpakenühnyunü nohkeri nüh; VÜWA nohri Saküüwuowa tü atülü nyiehvü nga thi azhihkükhu vü nga Saküüwuowa küsa kenüh.

¹²Jükenüh khinyi, hi nüh nohsü vü kümze kütsü kümjie nohri nga eh para zhehlori vü mhie tsü naveh ti VÜWA vünüh hi vü küshietsüluo, thi küütoh thsoshi küsü hi tsüluo,

¹³thi eh pa thi eh zah, eh prahri, eh jienüvühri thi ma tharuori aveh kürholi küloletsü taji aküsü vünüh hiri vizhutsüluo,” ti küza.

¹⁴Thinü masü nüh ma vü, “Nohri kürholi müthoh vünüh hiri kürholi tsü naveh! Mükütüküzü noh nüh hisü küüroh hama müküzatü thuoüji VÜWA nüh azhihwa vi hiri kütsü vü hiri tü nohri vü mhie thi zhütsanyitsa naveh,” ti küza.

¹⁵Jüti küzaküm sevü nyimzawa nüh mürhülehpie vünüh ali thsoke taji azhih vü küzem, küpakenühnyunü ma zheh tü anyujiwa shiehku ziewa küneke nü saküsa kenüh, jüti sanü ma tü azie vü küneke nü rhoveh.

¹⁶Jüti küsa vü ma nüh masü vü, “Nohsü zheküwari mümtu nüh sana küsa kenüh aküzhi wuovü tewa nü nohsü zheküwari müjie küshele küju nü jüla rülo küche küthi peh luo; jüse vünüh nohsü mpa noh lehkhujiri vü tewaluo,” ti küza.

¹⁷Thinü masü nüh nyimzawa vü, “Noh nüh hisü vü küüshie vi hisü küüshiewa kenüh hisü tü küsazihwa nyu.

¹⁸Halie, hiri azhih hala küturu vü noh tü akuli kümru noh nüh hisü küüthuoke nü küturu hama mürhülehpie vü huke sala, thi noh zheh lovü noh pa, noh zah, noh prahri, thi noh pa thahruo aveh küsezhuh sala luo.

¹⁹Mükütüküzü nüh nohri thawa nüh noh zheh lehpie vünüh alievü lehkhuji vü shutewa naveh ünüh ma zühwa tü ma lüvü wa naveh, thi hiri vü küsazih küpehwa nyu; thitü mükütüküzü nüh noh zhehlovü noh vü anyi küpeh nyi küsüvü nga ake thsemthuoüji ma zühwa tü hiri lü vü peh naveh.

²⁰Thitü mükütüküzü nüh noh nüh hisü küüroh hama küzamtü thuoüji noh nüh küsawa vünüh küsazih münyiethuoh,” ti küza.

²¹Thinü nyimzawa nüh, “Nohsü azhü kümjie vünüh kümzhewa saluo,” ti küza. Jüti sanü ma nüh masü küzem taji masü tü tewa; thi nyimzawa nüh akuli kümruwa mürhülehpie vü huke sa.

²²Jüsevü masü tü tewa nü masü küzheri müjie shele küru küju nü rülo küche aküzhi vü pehtewa; küpakenühnyunü zheküwari tü lehkhuji aveh vü phah tü zanyo küsü nga mphahra nüh saküm kenüh.

²³Jüti sanü masü tü shele teturu taji kari tewa thi Nun atsa Joshua vü teru; thi masü vü momowa sanüh aveh vi ma vü küza kheh.

²⁴Masü nüh Joshua vü, “VÜWA nüh azhihwa aveh vi hiri kevü tsü tsam wiethuoh; thi jümpa mükünyu hiri kenüh azhih jüla kürhori aveh luoveh sükheh vehthuoh,” ti küza.