Read Pochuri Naga JOSHUA 21 Bible Online

JOSHUA 21 - Pochuri Naga bible

JOSHUA 21

¹Jüti küsa vü Leviri apara zheh lüri tü Eleazar navüwa, Nun tsa Joshua thi Israel nyiri kuoh apari azheh alüri vü ru taji;

² thi mari nüh Kanan zhih Shilo vünüh mari vü, “VÜWA nüh Mosa vünüh hiri küüroh na küsa anyujiri tsü thi hiri mieshümiesa küümürhuo na küsa kenüh are kümrhuo azhih nga tsü üta küza naveh,” ti küza.

³Jükenüh VÜWA nüh azhükütsü vünüh Israel nyiri tü Leviri vü mari aka kütsü nyuji thi areküümrhuo azhih hamari tsü.

⁴Aküzewa tü Kohatra tharuori kenüh shuru: jükenüh Aron navüwa küthsoküzhi Leviri thuoüji aküze vünüh Judah, Simeon thi Benjamin kuoh vünüh nyuji türaküche ngura.

⁵Thi Kohat kuoh küpari aveh thuoüji aküzewa Efraim tharuori vünüh, Dan kuoh vünüh thi Manase kuoh küzhila vünüh nyuji türake ngura.

⁶Gershonri thuoüji aküze vünüh Issachar kuoh vünüh, Asher kuoh vünüh Naftali kuoh vünüh thi Bashan vü Manase kuoh küzhila vünüh anyuji türaküche ngura.

⁷Merari thuoüji mari tharuori müzhe nü Reuben kuoh, Gad kuoh thi Zebulun kuoh vünüh nyuji türakünyi ngura.

⁸VÜWA nüh Mosa vünüh azhükütsü üta aküze vünüh Israel nyiri nüh anyuji hamari thi arekümrhuo zhih ti vi Leviri tsü.

⁹Judah kuoh vünüh thi Simeon kuoh vünüh anyo vünüh küzaküsa üta nyuji hamari tsü,

¹⁰Aron küthsoküzhi Kohal tharuori azhievü Leviri jünü vü tewa; küpakenühnyunü aküzewa tü mari vü tsuotsake teküwa khu kenüh.

¹¹Mari nüh Kiriatharba (Arba tü Anak apa) vi mari tsü, jüma tü Hebron Judah küzhiho anyu thi ma nato arekümrhuo azhihri nga.

¹²Thitü anyujiwa zhuhri thi ma nyuzari thuoüji vi Jefune tsa Kaleb tsü nü ma küüvi.

¹³Thi Aron navüwa küthsoküzhiri vü thuoüji mari nüh Hebron nyi küfetheri kenüh kümnyipe nyuji thi arekümrhuo zhihri ti tsü, Libna thi ma rekümrhuo zhihri nga ti tsü,

¹⁴Jatir thi ma rekümrhuo zhihri nga, Eshtemoa thi ma rekümrhuo zhihri nga ti tsü,

¹⁵Holon thi arekümrhuo zhihri nga, Debir thi arekümrhuo zhihri nga,

¹⁶Ain thi arekümrhuo zhihri nga, Juta thi arekümrhuo zhihri nga, Bet-shemesh thi arekümrhuo zhihri nga, ti akuoh ha künyi vünüh anyuji tüguh;

¹⁷jüsevü Benjamin kuoh vünüh, Gibeon thi arekümrhuo zhihri nga, Geba thi arekümrhuo zhihri nga,

¹⁸Anathoth thi arekümrhuo zhihri nga thi Almon thi arekümrhuo zhihri nga ti anyuji müzü.

¹⁹Aron navüwa küthsoküzhira nyujiri aveh türaküche thi mari arekümrhuo zhihri nga ti.

²⁰Kohat küpari Kohat tharuora jünü Leviri vü anyuji mari vü tokütsü thuoüji Efraim kuoh vünüh tsü.

²¹Mari vü kütsü thuoüji Shekhem, nyiküfetheri kenüh kümnyie nyuji, Efraim vü küzhiho nyu arekümrhuo zhihri nga, Gezer thi rekümrhuo zhihri nga,

²²Kibzaim thi arekümrhuo zhihri nga Bet-horon thi arekümrhuo zhihri nga ti anyuji müzü;

²³Dan kuoh vünüh Elteke thi arekümrhuo zhihri nga, Gibethon thi arekümrhuo zhihri nga,

²⁴Aijalon thi arekümrhuo zhihri nga, Gat-Rimon thi arekümrhuo zhihri nga ti nyuji müzü;

²⁵thi Manase kuoh küzhila vünüh Tanak thi arekümrhuo zhihri thi Gatrimon thi arekümrhuo zhihri nga ti nyuji künyi.

²⁶Kohatri küpari tharuo nyujiri aveh türake thi arekümrhuo zhihri nga.

²⁷Thi Levi tharuori vü Gershonri vü kütsü thuoüji Manase akuoh küzhilawa vünüh tsü, Bashan vü Golan thi arekümrhuo zhihri; anyiküfetheri kümnyipe nyuji, thi Beshtera thi arekümrhuo zhihri ti nyuji künyi,

²⁸thi Issachar kuoh vünüh Kishion thi arekümrhuo zhihri Daberat thi arekümrhuo zhihri,

²⁹Jarmut thi arekümrhuo zhihri, Enganim thi arekümrhuo zhihri ti nyuji müzü;

³⁰Asher kuoh vünüh Mishal thi arekümrhuo zhihri, Abdon thi arekümrhuo zhihri,

³¹Helkat thi arekümrhuo zhihri thi Rehob thi arekümrhuo zhihri ti nyuji müzü;

³²thi Naftali kuoh vünüh Galilee vü Kedesh thi arekümrhuo zhihri, anyiküfetheri kenüh kümnyipe nyuji, Hamotdor thi arekümrhuo zhihri thi Kartan thi arekümrhuo zhihri ti nyuji küche.

³³Gershonri tharuo hozake vünüh anyujiri aveh türaküche thi arekümrhuo zhihri nga ti.

³⁴Thi Levi küpari thuoüji, Merari tharuori tü Zebulun kuoh vünüh tsü, Jokneam thi arekümrhuo zhihri nga, Karta thi arekümrhuo zhihri nga,

³⁵Dimna thi arekümrhuo zhihri nga, Nahalal thi arekümrhuo zhihri nga ti nyuji müzü;

³⁶thi Reuben kuoh vünüh Bezer thi are kümrhuo zhihri nga, Jahaz thi arekümrhuo zhihri nga,

³⁷Kedemot thi arekümrhuo zhihri nga thi Mefat thi arekümrhuo zhihri nga ti nyuji müzü;

³⁸Gad kuoh vünüh Gilid vü Ramot thi arekümrhuo zhihri nga, anyiküfetheri kenüh nyuji kümnyipe, Mahanaim thi arekümrhuo zhihri nga,

³⁹Heshbon thi arekümrhuo zhihri nga, Jazer thi arekümrhuo zhihri nga ti aveh nyuji müzü.

⁴⁰Merarira tharuo hozakeri kenüh nyujiri, jüma tü Levira tharuo kümnyiehri kenüh mari vü tokütsü nyujiri aveh küsaji tührakünyi.

⁴¹Israel nyira zavü Levira suope anyuji zürake nü tüze thi arekümrhuo zhihri nga.

⁴²Nyuji hamari tü arekümrhuo zhih nüh mükieshe, jüti vünüh anyuji hamari tü sa.

⁴³Hakümjie vünüh ma nüh mari pari vü tsü nta küshieküsa azhihwa aveh VÜWA nüh Israel vü tsü; thi mari nüh küvira kümjie mari tü jüla pehtewa.

⁴⁴Ma nüh mari pari vü küshiekütsü üta VÜWA nüh mari vü awuowuovü nüh kümnyie tsü; mari mükünongüri küsü wie nga mari tüvü mütsiera nüh sam, küpakenühnyunü VÜWA nüh mari mükünongüri aveh vi mari ake vü thseküm kenüh.

⁴⁵VÜWA nüh Israel zhehlovü kümhie phrahteke kütsü aveh küsü nga müküju müsa; aveh nga saju wie.