Read Pochuri Naga JOSHUA 22 Bible Online

JOSHUA 22 - Pochuri Naga bible

JOSHUA 22

¹Jüsevü Joshua nüh Reubenri, Gadri thi Manase kuoh küzhilari jizhuh,

²thi mari vü, “Noh tü VÜWA siepewa Mosa nüh azhükütsü aveh müzherathuoh thi hi nüh noh vü azhükütsü jikhi aveh künathuoh;

³ru nosü haküju nga rülo hozake noh jienüri müja nüh ru, VÜWA noh Saküüwuowa nüh azhühzho kütsüwa azhüküzhü ti müzheruthuoh.

⁴Thi VÜWA noh Saküüwuowa nüh phrateke küsa üta ma nüh noh jienüri vü kümnyie tsüthuoh; jükenüh kürele nü VÜWA siepewa Mosa nüh Jordan tuwuovü nüh noh vü tsüküsa noh zheh noh suope azhih vü pehküvehwa vü tewaluo.

⁵VÜWA siepewa Mosa nüh azhükütsü thi khonyo zhükütsüri azhüzhü sheh nü müzhe üta kütsü, VÜWA nohri Saküüwuowa kümze üta, ma lehkhuji aveh vü tse üta, ma nüh azhükütsüri müzhe üta, ma vü küpeke üta, thi nohri luoveh aveh vi thi nohri kürholi aveh vi ma kütsü sa üta küza küsawa wiethuoh,” ti küza.

⁶Jüti sanü Joshua nüh tsia mari tsü taji mari küzem; thi mari tü mari zheh vü tewa.

⁷Manase kuoh küzhila vü thuoüji Mosa nüh Bashan vi asuope satsü; thitü küzhila küpawa vü thuoüji ma jienüra nato Jordan zhiehtu wuovü Joshua nüh vi suope satsü. Thi Joshua nüh tsia mari tsü nü mari zheh vü küüze vü,

⁸ma nüh mari vü, “Nohri nohzhehri vü shele küwa vü künyirhie khielo ti vü, mieshümiesa khieloti sie, rakasa, suna, sahwuowa, amürü thi thsümnyi khielo ta vü nü waluo; nohri mükünongüra zhizheküvira tsokrüri vi noh jienüri sie küsuo luo,” ti küza.

⁹Jüti küsa sevü Reubenri, Gadri thi Manase kuoh küzhilari tü Kanan zhih Shilo vü Israel nyiri sieporie nü Gilid zhih mari mpa mari zhih VÜWA nüh Mosa vü azhükütsü suopewa vü shele teru.

¹⁰Mari tü Kanan zhih Jordan asuo wuovü ru ünü Reubenri, Gadri thi Manase kuoh küzhilari tü Jordan kütuoh vü kükhurüpe küji küsü sa.

¹¹Thinü Israelri nüh jüma thsüra taji, “Halie, Reubenri, Gadri thi Manase kuoh küzhilari tü Kanan zhih atüvü Jordan asuo Israelra zhih wuovü nüh kükhurüpe küsü savehthuoh,” ti küza.

¹²Thi Israel nyiri nüh jüma küthsüra vü Israel nyiri tü arie sa nti Shilo vü sezhuh khe.

¹³Jüti sanü Israel nyiri nüh Eleazar navüwa tsa Finehas tü Reubenri, Gadri thi Manase kuoh küzhilari vü küze,

¹⁴thi ma sevü alehvüri türake, Israel kuoh küsü vünüh küsüsü, mari nyi küsüsü wie nga Israel jienüri vü tharuo alüri nyiru.

¹⁵Thi mari tü Reubenri, Gadri thi Manase kuoh küzhilari vü Gilid zhih vü ru nü mari vü,

¹⁶ “VÜWA kümhu müzawa nüh, VÜWA sekünyi vünüh nosü kürele tewa nta thi VÜWA sie saluo nta sanü nohri mpa nüh kükhurüpe saküveh hatü mowathuoh lo?

¹⁷ Hiri tü Peor vünüh kükhiemuo sataji khinyi nga hiri mpa nüh müjie saküümtsara mpa nga müwale ülo, thi jüma kenüh VÜWA müza kümhuwa vü küsaküna küru sa,

¹⁸thinü nosü VÜWA vünüh sühle temwa thuoüji mümhiethuoh ülo? Thi mükütüküzü nosü nohri nüh sie ruohluo nü sie saluo nta thuoüji thuohtü ma tü Israel müza kümhuwa ajü vü arüshu nathuoh.

¹⁹Thitü khinyi thuoüji mükütüzü nüh nohri zhih tü mümtse thuoüji VÜWA zhih vü VÜWA kükhurüpe pehküveh vü thsem nü hiri aza vünüh nohri suope vi luo; thi VÜWA hiri Saküüwuowa kükhurüpe küchie nüh küpa sataji VÜWA wuluo nü sie küsaluo nyutü hiri sieküsaluo mpa nüh müsa tüm.

²⁰ Zera tsa Akhan tü kütsühna zanyori vünüh kütsotü zoriem nü Israel müza kümhuwa lüvü rükümtho müru ülo? Thi ma müküleh kenüh ma mpa müsü,” ti küza.

²¹Jüti küüza vü Reubenri, Gadri thi Manase kuoh küzhilari nüh Israel tharuo alüri vü rüle taji mari küza,

²²kükhratsa, Saküüwuowa, VÜWA! Ma nüh thsüveh; thi Israelri mpa nüh küüthsüluo! Mükütüküzü jüma tü VÜWA vü sieküsaluonyutü kütsotü küvehrie vünüh thuoüji nosü hiri müshie müsa tüm,

²³hiri nüh kükhurüpe küsü küsa kenüh VÜWA sekünyi vünüh kürele tewa nta thuoüji; nyutü mükütüküzü hiri nüh jüüta sataji kütso kükhurüri nyutü atsuo kükhurü nyutü kütsathuo kükhurüri jüla nüh sa thuoüji VÜWA ma mpa nüh ashewi küüsaluo.

²⁴Nyu wie, thitü hiri nüh hama küsa thuoüji thuohtüvü nohri tsari nüh hiri tsari vü, nohri tü VÜWA, Israel Saküüwuowa vi mowa sana lo?

²⁵küpakenühnyunü VÜWA nüh Jordan vi hiri thi nohri, nohri Reubenri thi Gadri azhievü arüh sakütsü kenüh ta sanü nohri tsari nüh hiri tsari tü VÜWA khurü na küsa kükhe kükrü kenüh.

²⁶Jükenüh hiri nüh, Kütso kükhurü thi küsahthuo kenüh kükhurüpe müsanü,

²⁷thitü nohri thi hiri zhievü thi hiri sevü wuhleri zhievü pohvü küsa kenüh jüti sanü VÜWA tüvü hiri kütso kükhurüri, küsahthuori thi kütsathuo kükhurüri sanü ma küüroh sana küsa kenüh; jüti sataji atsari vü, “Nohri thuoüji VÜWA vü suopemünyie ta thama küüza kenüh,” ti küza.

²⁸Jükenüh hiri nüh kümshe thuoüji, mükütüküzü thuohtüvü hamatü hiri vü nga thi hiri küthsoküzhiri vü nga küza thuoüji, ‘Halie, VÜWA kükhurüpe atsowa hiri pari nüh küsa, kütso kükhurü kenüh nyu, nyutü küsahthuo kenüh nyu, thitü hiri thi nohri azhievü pohvü kenüh, ta küzara naveh,’ ti küza.

²⁹Kütso kükhurü kenüh, amüsa kükhurü nyutü küsahthuo küsa kükhurüpe, VÜWA hiri Saküüwuowa kükhurüpe juhthsü-kükhurüzheh tüvü küpehwa mükünyu küpa sanü VÜWA sie saluo thi ruohluo ti sana küsanü hiri vünüh küükiehtuom luo, ti küza.

³⁰Jüti küsa vü Finehas navüwa thi Israel tharuo vü alüri, müzakümhu lehvüwa ma se nyikütse Reubenri nüh, Gadri nüh thi Manase akuoh küzhilari nüh jüüta küüza vü mari tü lozhe kheh.

³¹Thinü Eleazar navüwa atsa Finehas nüh Reubenri, Gadri thi Manase akuoh küzhilari vü, “VÜWA tü hiri azhievü pehveh ta küsa nosü hiri nüh thsüvehthuoh, küpakenühnyunü nohri tü VÜWA vü müküchie samküsa kenüh; khinyi thuoüji nohri tü VÜWA ke vünüh Israel nyiri külole sa vehthuoh,” ti küza.

³²Jüti sataji Eleazar navüwa tsa Finehas thi alehvüri tü Gilid azhih Reubenri thi Gadri vünüh Kanan azhih Israel nyiri vü azhü vü nü shele teru.

³³Thinü azhühlewa tü Israel nyiri sakülozhera; thi Israel nyiri nüh tsia Saküüwuowa tsü nü mari sie arie sataji Reubenri thi Gadri nüh peh küveh azhihwa zorie nti müphrahte nüh sam.

³⁴Jüti küsa vü Reubenri thi Gadri nüh kükhurüpewa tü Apohvü ti ji; “küpakenühnyunü,” mari nüh, “VÜWA tü Saküüwuowa ta küsa hiri azhievü pohvü küsa kenüh,” ti sa.