Read Pochuri Naga JOSHUA 24 Bible Online

JOSHUA 24 - Pochuri Naga bible

JOSHUA 24

¹Jüti sanü Joshua nüh Israel kuoh aveh Shekhem vü küüsezhuh kheh, thi kükhruori, alüri, lesari thi Israel küjiri aveh jizhuhkhe nü Saküüwuowa tüvü mari mpa nüh küru kheh sa.

² Jüti küsa vü Joshua nüh anyiri aveh vü, VÜWA, Israel Saküüwuowa nüh, Nohri pari tü khana vü Eufrates kariwa nü rho, Jera, Abraham thi Nahor apa nga jüla rho, thi mari tü nyiaza küpara kütsü sa.

³Jüti sanü hi nüh nohri apa Abraham sie taji Rühgu tuwuovü nüh ma küjo Kanan zhih aveh vü wa nü ma tsatori hozake küüjeshie. Hi nüh Isaac vi ma tsü;

⁴thi Isaac vünüh Jacob thi Esau tsü. Thi hi nüh Esau küüvi nti küzhiho nyu Seir vi ma tsü, thitü Jacob thi ma tsari thuoüji Egypt vü tetsuo.

⁵Jüti küsa vü hi nüh Mosa thi Aron küze, thi hi nüh mari azhievü mowa sanüh Egypt sakümnomna tsü; jüse vünüh hi nüh nohri vizhu.

⁶Thi hi nüh Egypt vünüh nohri pari vizhu nü Juhküji vü ru; thinü Egypt tü rawuhkheka thi rawuhnyiri nüh nohri pari zhe taji kümru Juhküjiwa vü ru.

⁷Jüti küsa vü mari nüh VÜWA vü zie ünü nohri thi Egyptri azhievü aküzo thsetsü nü juhküjiwa tü mari nyiehvü wa nü mari külüwute; thi hi nüh Egyptri vü küsa nohri nothari nüh ngu nü reza vü tsotho hothake rho.

⁸ Jüsevü hi nüh nohri sie Jordan tuwuovü rhoküveh Amorri zhih vü ru; mari tü nohri sie saluo thi hi nüh mari vi nohri ke vü thse, thi nohri nüh mari zhih vi, thi hi nüh nohri tüvü nüh mari zoriekhehmtü.

⁹Thinü kajiwa Zipor atsa Balak tü sühra nü Israel siesaluo; jüti küsa vü ma nüh nohri küümzü na küsa kenüh Beor tsa Balaam küze,

¹⁰thitü hi nüh ma zhümküna nüh sa; jükenüh hi nüh ma ke vünüh nohri vizhu.

¹¹Thi nohri tü Jordan kari taji Jeriko vü ru, thinü Jeriko nyiri, Amorri nga, Perizri, Kananri, Hitri, Girhashri, Hivri thi Jebusri tü nohri sie saluo; thi hi nüh mari vi nohri ake vü thse.

¹²Thi hi nüh nohri tüvü thuozütsari küze taji jümari nüh nohri tüvü nüh mari nga thi Amorri kaji künyi nga ti zhejam; jüma tü nohri nyuchuwa nyutü nohri lawih vünüh nyu.

¹³ Nohri nüh müküüroh azhih vi nohri tsü, thi nohri nüh müküsa anyujiri vi nohri tsü, nohri tü jüla rho; nohri tü rhelivi zhuh vünüh rhelivi latsa thi nohri nüh müküshie Olive zhuh vünüh Olive la, ti küza.

¹⁴“Jükenüh khinyi VÜWA krü luo, thi aluoveh thse thi zhütsanyitsanü ma kütsü saluo, Rühgu tuwuovü thi Egypt vü nohri pari nüh nyiaza kütsü saküruri vijam luo, thi VÜWA kütsü saluo.

¹⁵Thi nohri nüh mükütüküzü aküma vünüh VÜWA kütsü santa thuoüji, thawa kütsü sanaveh ünüh nosü rüka luo, Rühgu tuwuovü asuo vü nohri pari nüh nyiaza kütsü saküru sanaveh ünü, nyutü nohri nüh küpeh Amorri zhih nyiaza kütsü sanaveh ünüh rüka luo; thitü hi thi eh zhehlori thuoüji hiri nü VÜWA kütsü sanaveh,” ti küza.

¹⁶Thinü anyiri nüh, hiri nüh VÜWA kulem nü nyiaza küpa kütsü sana küsa tü hiri vünüh kietuotewaluo;

¹⁷küpakenühnyunü Egypt zhih, nyura kükhu vü küpeh zheh vünüh VÜWA hiri Saküüwuowa nüh hiri thi hiri pari küvizhu kenüh, thi hiri küngu vünüh ma nüh thsoshi küji jümari sanü hiri nüh lehkhuji küwa aveh vünüh thi anyiri hiri nüh kari küru aveh vünüh hiri sakürura kenüh;

¹⁸thi VÜWA nüh hiri tüvü nüh nyiri aveh, Amorri azhih jüla kürhori aveh zheja kheh; jükenüh hiri nga VÜWA kütsü sanaveh, küpakenühnyunü ma tü hiri Saküüwuowa küsa kenüh.

¹⁹Thitü Joshua nüh anyiri vü, “Nohri tü VÜWA kütsü müsara; küpakenühnyunü ma tü kümtse Saküüwuowa küsü; ma thuoüji noküüma Saküüwuowa küsü; ma tü nohri nüh phrürie küm thi nohri kükhiemuo noküjawa nyu.

²⁰Mükütüküzü nohri nüh VÜWA kulem nü aliera nyiaza kütsü sa nta thuoüji ma nüh nohri vü zanyo kümhie küsa sevü nga nüh sühleru taji nohri sakümsütsü thi sakümiem naveh,” ti küza.

²¹Jüti küüza vü anyiri nüh Joshua vü, “Nyu, hiri nü VÜWA kütsü sawie naveh,” ti rületsü.

²²Thinü Joshua nüh anyiri vü nohri nüh VÜWA rükamthuoh ta küsa thi ma kütsü sana ta küsa nohri mpa nüh nohri wuovü pohvü wiethuoh, ti küza. Thinü mari nüh, “Hiri mpa nüh pohvü wiethuoh,” ti rületsü.

²³Thinü ma nüh, “Thinü nohri azhievü pehküveh alienyira nyiazari vijam luo, thi nohri luoveh tü VÜWA, Israel Saküüwuowa vü küpeke luo,” ti küza.

²⁴Jüti küüza vü anyiri nüh Joshua vü, “Hiri nü VÜWA hiri Saküüwuowa kütsü sawie naveh, thi hiri nü ma jikhi künawie naveh,” ti rületsü.

²⁵Jükenüh Joshua nüh nyiri sie taji jüma rülovü kütsathuozhü sanü azhühkhe thi azhühkhori makeri’a nüh Shekhem vünüh sasa.

²⁶Thi Joshua nüh azhühtho hamari Saküüwuowa khonyo lasiphawa lovü rhüke; thi ma nüh aloh küji küsü vi nü jüla nguhzhe kükhu vü VÜWA kümtsezheh vü shiekütoke.

²⁷Jüti sanü Joshua nüh nyiri aveh vü, “Halie, aloh hama nüh hiri zhievü pohvü küsü küsanaveh; küpakenühnyunü VÜWA zhü ma nüh küphrahte aveh küünarathuoh kenüh; tinü nohri nüh Saküüwuowa vüriem üsü; jükenüh hama nüh jüma pohvü küsü küsanaveh,” ti küza.

²⁸Jüti sataji Joshua nüh nyiri tü mari nyi küsüsü azheh vü küzem.

²⁹Zanyo hamari sevü Nun atsa Joshua VÜWA siepewa tü ma mahvi müzake nü türake khruo kümthuoh kenüh süm.

³⁰Thi mari nüh ma ka Timnat-sera, jüma tü küzhiho anyu Efraim, Gash Küzhi zhiehtü vü chowum.

³¹Thi Israelri tü Joshua rülo aveh thi Joshua süküm sevü VÜWA nüh Israelri vü küüroh küsa aveh küthsü sierhüri rülo aveh VÜWAkütsü sa.

³²Thi Israel nyiri nüh Josef arü Egypt vünüh viküru Shekhem, Jacob nüh Shekhem apa, Hamor vünüh araka müzake nü küsü asuopewa vü chohwum; jüma tü Josef küthsoküzhi aka satera.

³³Thi Aron atsa Eleazar tü süm nü mari nüh Gibeah, ma tsa Finehas anyu, jüma tü küzhiho anyu Efriam ma vü kütsüwa vünüh chohwum.