Read Pochuri Naga JOSHUA 4 Bible Online

JOSHUA 4 - Pochuri Naga bible

JOSHUA 4

¹Jüti sanü akuoküjiwa aveh Jordan tsekarira ünü VÜWA nüh Joshua vü,

²“Akuoh küsü vünüh nyi küsüsü vizhu nü nyiri azhie vünüh nyi türakünyi vizhu luo,

³Thi mari vü azhütsü taji, Jordan zhila vü navüri nüh tsie küveh vünüh aloh türakünyi vikari wa nü nohri sütavü khiela zeh naveh ünüh jüla shie luo,” ti küza üta küza.

⁴Jüti küsa vü Joshua nüh akuohkuoh vünüh nyi küsüsü chuh küsa Israel nyiri nyi türakünyi ji,

⁵thi Joshua nüh mari vü, VÜWA “nohri Saküüwuowa kütsathuo ku Jordan zhila vü wa nü Israel nyiri akuoh küürüta aloh asafü rügivü nüh kha taji,

⁶hama nüh nohri azhievü thsoshi küsü sataji thuohtüvü noh tsari nüh aloh hamari tü mazhünyo mowa lo, ta küna thuoüji?

⁷VÜWA kütsathuozhü küthseku Jordan kari wa ünü Jordan juh tü fethuom ta nohri nüh mari vü küza naveh. Jükenüh aloh hamari tü Israel nyiri kenüh küsuokürho müsheküpeh huo küsü sanaveh,” ti küza

⁸Thi Israel nyiri tü Joshua nüh azhükütsü kümjie sanü aloh türakünyi VÜWA nüh Joshua vü küüza üta Israel nyiri akuoh müzhe nü Jordan zhila vünüh vi taji mari nüh küzehpe vü sa.

⁹Thi Joshua nüh Jordan zhila vü kütsathuozhü küthseku kükha navüri nüh kütsiepe azhievü aloh türakünyiri shie; thi jümari tü khinyi küju nga jüla pehkhe wieveh.

¹⁰Küpakenühnyunü Mosa nüh Joshua vü azhükütsü kümjie VÜWA nüh anyiri vü küza üta Joshua vü azhükütsü aveh müjie küsakheh nü kütsathuozhü küthseku kükha navüri tü Jordan zhila vü tsie wie. Thi anyiri tü pre nü tsezhutewa;

¹¹jüti sanü nyiri aveh tsezhu jum ünü VÜWA kütsathuozhü küthseku thi navüri tü anyira tüvü tsekari tewa.

¹²Mosa nüh mari vü azhükütsü kümjie Reuben tsa nyimpari, Gad tsa nyimpari thi Manase akuoh küzhilari tü riesarie vü nü anyiri tüvü tse wa;

¹³arie kenüh küücheju anyie zührake kümjie küsa VÜWA tüvü arie sa nti Jeriko kütake vü tewa.

¹⁴Jüma rülo vünüh VÜWA nüh Israel aveh nüh küngu vünüh Joshua sakümsietsü; thi mari tü Mosa rüzhe krüküru kümjie ma kürhoju ma rüzhekrü nü rho.

¹⁵Jüti küsa vü VÜWA nüh Joshua vü,

¹⁶“Pohvü kütsathuozhü küthseku khakütse navüri vü azhütsü nü Jordan vünüh shuteru üti azhütsüluo,” ti küza.

¹⁷Jükenüh Joshua nüh anavüri vü azhütsü taji, “Jordan vünüh alievü shuteru luo,” ti küza.

¹⁸Thi VÜWA kütsathuozhü küthseku kükha navüri tü Jordan zhila vünüh mari mpha azhih küüweh alievü vizhuteru ünü Jordan juhri tü mari ape vü lishele teru nü atükhuvü kümjie ma külipe aveh lichü khehtewa.

¹⁹Thi anyiri tü asa pokhuwa rülo türake vü Jordan vünüh kariru nü Jeriko nato zhieshu wuovü Gilgal vü kürünape sanü peh.

²⁰Thi mari nüh Jordan vünüh aloh tührakünyi viküruri Joshua nüh Gilgal vü shie.

²¹Jüti sanü ma nüh Israel nyiri vü, thuotüvü atsari nüh apari vü, “Aloh hamari tü mowa küsa kenüh lo?” ta küna thuoüji,

²²nohri tü nohri tsari vü küthsü naveh, Israelri tü Jordan hama küweh nü tseshura lie, ta küza naveh.

²³Küpakenühnyunü nohri nüh müjie tsekükari küju nü VÜWA nohri Saküüwuowa nüh Jordan juhri saküweh tsü, hiri nüh Kümru Juhküji müjie tsekariküwa küju nü VÜWA nohri Saküüwuowa nüh hiri kenüh ajuh saküweh kütsü kümjie vünüh sa,

²⁴Jüta küsa vünüh nohri tü küsuokürho VÜWA nohri Saküüwuowa krü, thi azhih vü nyiri aveh VÜWA ke tü khra ta küsa thsüra naveh.