Read Pochuri Naga JOSHUA 6 Bible Online

JOSHUA 6 - Pochuri Naga bible

JOSHUA 6

¹Israel nyiri kenüh Jeriko tü alovü nga nüh thi alievü nga nüh khe khehm; nyi küsü nga alievü müwa thi nyi küsü nga alovü müturu.

²Jüti küsa vü VÜWA nüh Joshua vü, “Noluo, hi nüh Jeriko, ma kajiwa thi luoveh küji anyi kümzhori vi noh ke vü tsümthuoh ünüh.

³Nohri anyujiwa tse mükiele naveh, arie küsa nyiri aveh küsü keri anyujiwa tse mükiele luo. Jüti vünüh nohri tü rülo türo sanaveh.

⁴Thi kütsathuozhü küthseku tüvü navü türü nüh nyihzhüvo rütsü tütü vi nü tse naveh; thi rülo türüawa navüri nüh tütü khu taji anyujiwa türü keri tse mükiele naveh.

⁵Jüti sanü mari nüh nyihzhüvo rütsü khu suo taji nohri nüh küsie vünüh tütü kükhu khi künara naveh ünüh nyiri aveh nüh zie kümsie sheh nü zie naveh, jüti küsa vü anyuchuwa shiehku tü puo kürüpuoke tewa nü anyiri tü papa kütovü külesho tsekhru naveh,” ti küza.

⁶Jüti küüza vü Nun tsa Joshua nüh navüri ji taji mari vü. “Kütsathuozhü küthseku kükha taji navü türüri nüh nyihzhüvo rütsü tütü küüvü nü VÜWA kütsathuozhü küthseku tüvü küükha luo,” ti küza.

⁷Thi ma nüh anyiri vü, “Atüvü tsewa nü anyujiwa mükiele taji riesürie küvüri tü VÜWA kütsathuozhü küthseku tüvü tse küüze luo,” ti küza.

⁸Thi Joshua nüh anyiri vü azhükütsü kümjie navü türü nyihzhüvo rütsü tütü kükhari tü VÜWA tüvü tsezhuwa nü tütü khu taji wa, thi VÜWA kütsathuozhü küthseku nüh mari se nyi, ti sa.

⁹Arie sürie küvüri nüh tütü kükhu navüri tüvü tse, tütü nüh mükütuo wiethuoh nüh khu thi asevü kühuo refüwa nüh asevü nüh ru, ti sa.

¹⁰Thitü Joshua nüh anyiri vü azhütsü taji, “Nohri tü müzie tüm nyutü nohri jikhi tü müküünake tüm, jümpa mükünyu hi nüh zie luo ta arülo müjie kütsü küju nü nohri po vünüh azhü küsü nga shu müküüze tüm; jüchih ünüh zie luo,” ti küza.

¹¹Jükenüh ma nüh VÜWA kütsathuozhü küthseku tü anyujiwa küsükeri mükiele küüze; jüti sanü mari tü kürünape vü teru taji arüzawa viküzem.

¹²Thinü Joshua tü arüne kümto süra, thi navüri tü VÜWA kütsathuozhü küthseku kha.

¹³Thi navü türü nyihzhü rütsü tütü kükhari tü VÜWA kütsathuozhü küthseku tüvü tse, tütüri tü mükütuo nüh khu, thi arie sürie küvüri nüh mari tüvü tse thi asevü kühuori nüh VÜWA kütsathuozhü küthseku sevü tse, jüti küsa vü mükütuo wiethuoh nüh atütüri tü khu.

¹⁴Rülo künyiawa mari tü anyujiwa küsükeri tse mükiele, jüti sanü kürünape vü sheleteru. Mari tü rülo türo jüti vünüh sa.

¹⁵Jüsevü rülo türüawa mari tü rüne kümto atholeh vünüh tesüra taji jüma tüvü küsa kümjie vünüh anyujiwa türükeri tse mükiele lehü: mari tü jüma rülo mpa nüh türükeri anyujiwa tse mükiele.

¹⁶Lekha türüawa navüri nüh tütü kükhu vü Joshua nüh nyiri vü, “Zie luo; küpakenühnyunü VÜWA nüh anyujiwa nohri vü tsükümthuoh kenüh.

¹⁷Anyujiwa thi jüma lovü küpehri aveh thuoüji zorie na küsa kenüh VÜWA vü tsümthuoh; Rahab küüproküphriehvühwa thi ma zheh lovü ma siepehküvehri aveh mpa nüh rho naveh, küpakenühnyunü zhühleri hiri nüh küüzeri ma nüh küthi kütsü kenüh.

¹⁸Thitü küüzorie nta tsükümwa vünüh kükheke luo, nohri nüh küüzorie nta tsü küm küzorie zanyori vi taji Israelra kürünape tü küzorie küsam nü küüjakünyah viru üsü nüh.

¹⁹Thitü rakasa, suna, sahwuo thi mürü küfüri thuoüji VÜWA vü mütsem; jükenüh jümari thuoüji VÜWA künyirhiere lovü tü naveh,” ti küza.

²⁰Jüti küsa vü anyiri tü zie, thi tütüri tü khu. Nyiri nüh tütü khikünara ünü mari tü zie küji kümsie sheh, thi ashiehkuwa tü puo kürüpuoketewa, thinü anyiri tü anyujiwa vü tsewa nü papa küto atüvü kümsho tsewa taji anyujiwa vira.

²¹Jüti sanü mari nüh anyuji aveh zoriem, nyimpari nga nyimzari nga, rünguo kükhruo, shüvotsa, nyihzhü thi rawuhri aveh anyuchuwa zhietü wuovü nüh kürhiethe khehm.

²²Jüti küsa vü Joshua nüh azhihwa riehziküwa künyi vü, “Küüphroküphriehvühwa zheh lovü tu nü noh nüh ma küüshie kümjie jülovü nüh nyimzawa thi ma vü küpehri aveh alievü siezhuru luo,” ti küza.

²³Jüti küüza vü riehziküwa viza künyi tü tu nü Rahab, ma pa, ma zah, ma prahri, ma vü küpehri aveh thi ma jienüri aveh siezhuru taji Israelra kürünape alievü sa kheh.

²⁴Jüti sanü mari nüh anyujiwa thi ma lovü kütüri aveh anyih vi nü tso khehm; rakasa, suna, sahwuo, thi amürü küfüri mpa nüh VÜWA zhehkünyirhiepe vü thse küm sa.

²⁵ Thitü Rahab küüphroküphriehvühwa, ma pa zhehlori thi ma zhi aveh thuoüji Joshua nüh akürho külole, thi ma tü nosü küju nga Israel vü rhoveh, küpakenühnyunü Jeriko riehzi üta Joshua nüh küüze zhühleri küthikütsü kenüh.

²⁶Jüma tsotho vü Joshua nüh küüshie mari vü thse taji, “Anyi sühra nü Jeriko nyuji hama küsalewa tü kümzü küvüwa saluo. Ma tsa küwuo khuwa ame nüh ma pe küloju saluo, thi ma tsa nyimpari ehpewa ame nüh ma kheri khake naveh,” ti küza.

²⁷Jüti sanü VÜWA nüh Joshua siekütse sa; thi ma kütholah tü