Read Pochuri Naga JOSHUA 8 Bible Online

JOSHUA 8 - Pochuri Naga bible

JOSHUA 8

¹Jüti küsa vü VÜWA nüh Joshua vü, mükrü tüm nyutü luoveh müzah tüm; küsaluo nyiri aveh noh nüh sie nü sühra taji Ai vü khru luo; noluo, hi nüh Ai kajiwa, ma nyiri, ma nyuji thi ma zhih vi noh ke vü thsemthuoh ünüh;

²thi noh nüh Jeriko thi ma kajiwa vü mokümjie sanüh. Ai thi ma kajiwa vü nga jüüta satsü naveh; jüla nüh zheküvira tsokrü thi mieshümiesa mpa nüh küvira sanaveh; tinü anyujiwa tü asewuovü nüh küzhe saluo, ti küza.

³Jükenüh Joshua thi saluo na küsa nyiri tü Ai vü khru na küsa kenüh sühra; thi Joshua nüh anyiri kümzho thi luoveh küji anyie cherake rükazhu taji arüza vünüh tsezhu küze.

⁴Thi ma nüh mari vü azhütsü taji, halie, anyuji asewuovü nüh zhe luo, anyujiwa vünüh letsuotemwa tümluo, thitü kücheju nü lieke luo;

⁵thi hi, thi anyi hi sie pehküvehri aveh nüh anyujiwa vü tsekewa naveh. Thi atükhuvü kümjie mari nüh hiri vü saluo nta shuru thuoüji hiri nüh mari atüvü nüh zhü naveh ünüh;

⁶jüti sanü hiri nüh anyujiwa vünüh mari müjie künyiezhu kheh küju nü mari tü hiri ase nyi nü shuru naveh; küpakenühnyunü mari nüh, ‘Tükhuvü kümjie mari tü hiri vünüh teküvehthuoh kenüh,’ ta sanaveh;

⁷jüti küsa vü nohri tü nohri nüh huo küveh vünüh sühra nü anyujiwa revi luo; küpakenühnyunü VÜWA nohri Saküüwuowa nüh jüma vi nohri ke vü thse naküveh kenüh.

⁸Thi nohri nüh anyujiwa vira thuoüji anyih nüh tsom naveh, VÜWA nüh küüza kümjie vünüh sa wie naveh; noluo, hi nüh nohri vü azhütsümthuoh ünüh, ti küza.

⁹Jüti sanü Joshua nüh mari tsezhu küzem; thi mari tü huo na küsa pe vü tewa nü Ai zhiehtu wuovü Bethel thi Ai masü azhievü pehtewa; thitü Joshua thuoüji jüma rüza vü anyiri azavü nyipehtewa.

¹⁰Thi Joshua tü rüne kümto sühra nü nyiri jizhuh taji Israel kükhruori sie taji nyiri atüvü nüh Ai vü tekhru.

¹¹Thi ma siepehküveh küsaluo nyiri aveh tü tekhru taji anyujiwa tüvü shehnyiwa, thi Ai zhiehtü wuovü Ai thi mari azhievü anyuo kümnyie küsü küpeh vü kürünape sanü peh.

¹²Jüti sanü ma tü anyi anyie münga kümjie küsa sie nü mari tü anyujiwa zhiehtu wuovü Bethel thi Ai masü azhievü küühuo sa.

¹³Thi mari nüh arienyiri tü ape saküüpeh, kürünape aküjiwa thuoüji anyuji zhiehtü wuovü thi atüku wuovü kühuo thuoüji anyujiwa zhiehtu wuovü. Thitü Joshua thuoüji jüma rüza vü anyuo vü pehtewa.

¹⁴Thi Ai kajiwa nüh jüma ngu ünü ma thi ma nyiri, anyujiwa nyiri tü kümto pre nü sühra Israel sie saluo nti lahvü Araba wuovü tsuo; thitü ma nü anyujiwa asewuovü nüh ma zhe nta rupehküveh müthsü nüh sa.

¹⁵Jüti küsa vü Joshua thi Israel aveh tü müküchara ro sataji reza wuovü zhüketewa.

¹⁶Jükenüh anyujiwa vü küpeh nyiri aveh mari zhewa nti jiluo, thi mari nüh Joshua zheküwa vü mari tü anyijiwa vünüh zhüzhu tekhehwa.

¹⁷Jüti sanü Ai thi Bethel vü tü Israel se zhe müküwa nyi küsü nga küükhe münyie nüh sa; mari tü anyujiwa sajamwie taji Israel zhewa.

¹⁸Jüti küsa vü VÜWA nüh Joshua vü, “Noh ke vü peh küveh aviphrüwa Ai wuovü thsuoküze luo; küpakenühnyunü hi nüh jüma tünoh ke vü thse naküveh kenüh,” ti küza. Jüti küüza vü Joshua tü avi ma ke vü pehküvehwa anyuji wuovü thsuoküze.

¹⁹Thi huo küvehri tü shiti mari ape vünüh sühra nü ma nüh ma ke thsuo küze ünü mari tü zhü anyujiwa lovü tu taji jüma vira, jüti sanü prelepreza anyih nüh anyujiwa tsom.

²⁰Jüti küsa vü Ai nyiri tü asevü noküze ünü halie, anyujiwa nyikhu tü atülü vü tekuo küju sa; thi mari tü zhü hawuovü nga nyutü tuwuovü nga küwara kükhra münyie nüh sam, küpakenühnyunü anyiri reza wuovü teke küwari tü zheküwari vü shele küru kenüh.

²¹Jüti küsa vü Joshua thi Israel aveh tü wuküvehri nüh anyujiwa viküm küngura vü thi anyujiwa nyikhu tü rügi vü tekükuo küngura vü mari tü shele teru nü Ai nyiri aveh zothe khehm.

²²Thi küpari tü anyujiwa vünüh shuru nü mari sie saluo; jükenüh mari tü Israelri azhila vü pehküm sa, wuori nüh hawuovü thi wuori nüh tuwuovü ti sanü nyi küsü nga müküükhe nyutü nyi küsü nga jozhu müküze wiethuoh nüh Israel nüh mari zothem.

²³Thitü Ai kajiwa thuoüji mari nüh rera taji Joshua vü sieru.

²⁴Israel nüh Ai vü kürho nyiri aveh zheküwari reza vünüh zothe khehm thi anyuchuwa nüh asehkhewa küju reh küüzehkhem nü Israel aveh tü Ai vü shele teru taji anyuchuwa nüh jüla küpehri aveh rehthe khehm.

²⁵Thi jüma rülo vü tsuohtsa kümri aveh, nyimpari nga thi nyimzari nga Ai nyiri aveh anyie türakünyi.

²⁶Ai vü kürhori aveh müjie küzorie kheh küju nü Joshua tü ma viphrü thsuoküüzewa tü ma ke vünüh vi müshele.

²⁷Anyu jüma mieshümiesa thi zanyo küzhechiera mpa nüh VÜWA nüh Joshua vü azhükütsü kümjie vi mari zhi sa.

²⁸Jükümjie vünüh Joshua nüh Ai tsom nü nosü pehküveh kümjie küsuokürho müsü küüfikemthuoh.

²⁹Thi ma nüh münüleh küju athsoh küsü rügi vünüh Ai kajiwa huthuo nü rünyi kuotetu ünü Joshua nüh azhütsü taji athsoh rügi vünüh ma kümo vi nü anyujiwa kheri lehpie vü khawa sataji nosü küju pehküveh kümjie aloh nüh priphohm.

³⁰ Jüti küsa sevü Joshua nüh Ebal Küzhi vünüh VÜWA Israel Saküüwuowa vü kükhurüpe küsü satsü,

³¹Mosa khonyo lasipha lovü rhüküsa üta VÜWA siepewa Mosa nüh Israel nyiri vü azhükütsü kümjie, “Amürü tsokrü vi nü nyiküsü nga aloh müküüjikhuo vi nü sa üta”. Küza küsa sa; thi mari nüh jüma rügi vünüh VÜWA vü kütso kükhurü thi kürükümhie küsahthuo kükhurü satsü

³²Thi jüla nüh, Israel nyiri küpeh vünüh Mosa khonyo küsü ma nüh rhüküsawa alohri rügi vü rhüke.

³³Jüti sanü Israel aveh, priküruri nga thi azheh vünüh küwuori nga, mari lesari nga ti Levi navüri tüvü kütsathuozhü küthseku mari nüh khakütse VÜWA kütsathuozhü küthseku küwiejievü tsie, mari küzhila thuoüji Gerizim Küzhi tüvü thi küzhila thuoüji Ebal Küzhi tüvü ti mari nüh Israel nyiri tsia mütsü üji mümhie ta VÜWA siepe Mosa nüh azhütsüküsa kümjie vünüh tsie.

³⁴Asevü thuoüji ma tü khonyo aveh akütsia zhü nga kümzü zhü nga aveh khonyo lasipha lovü müzhe nü rhüküsa chiezhu kheh.

³⁵Israel kümhuwa aveh tüvü chiezhu üta Mosa nüh azhükütsü küsü nga nyimzari vü nga, kürünguora tüvü nga thi priru mari zhievü rhoküvehra tüvü nga ti Joshua tü müküchie küsü nga müsa.