Read Pochuri Naga 1 TIMOTHI 1 Bible Online

1 TIMOTHI 1 - Pochuri Naga bible

1 TIMOTHI 1

¹Saküüwuowa[1] hiri Küülolewa thi Khrista Jisu hiri küluozhewa nüh azhütsü nü Khrista Jisu povü küsawa Paul nüh vi taji,

² Kütsotü vünüh eh tsato sanü kütse Timothi vü kütsü: Saküüwuowa Pawa thi Khrista Jisu hiri VÜWA nüh küümze, küürüpa thi luoveh kürünyi kütsüwa saluo.

³Hi nüh Makedonia vü wa nti kütsevü hi nüh no vü küwurie kümüjie noh tü Efesa vü küütungüveh. Anyi wuori jüla küsosiezhüri akürie vi sosieveh, thi mari lemü üta azhümütsüji mümühie.

⁴Zhühku kürüwi küphrate thi lahnyira nyo zhüchüh küsa küphrate jamü üti mari vü küza luo, jümari tü küüjakünya vizhuküveh wie; jümaritü kütsotüvü küpeh Saküüwuowa kümüshe sakütsü münyie.

⁵Küüro hama kütsü mazhühnyo thuoüji luoveh kümtse vünüh küruwa saküüzhake na küsa kenüh wie, jümatü amüshe kümütha thi kütsotü küzhütsawa.

⁶Anyi wuori thuoüji hamari vünüh letsuotewathuoh thi mari lekhuji kümiemü nü zhütsazhüji mükünyu kühaluovü tewathuoh.

⁷Mari Saküüwuowa khonyo küsosieri sangüveh, thitü mari mpa mari azhü müthsüra nüh samü nyutü mari mpa mari tsotü sheh nü phratekütse rühleri müthsüra nüh samü.

⁸Khonyo thuoüji kümühie ta küvileh vünüh vi thuoüji mühiemü ta hiri nüh thsüveh.

⁹Ah, jümatü kümüsheleh, khonyo tü anyi kümühieri kenüh samüsatü, thitü khonyo küzokhuori kenüh thi zhümüküünari kenüh wie, thi Saküüwuowa müshe vü mükünyieri kenüh thi kükhiemuori kenüh wie, thi nale müküviri kenüh nyutü sietse vünüh mükürhori kenüh, thari nüh apari nyutü azari fethe nüh jümari kenüh, nyuri küfetheri kenüh saküsa wie,

¹⁰küüphroküphrieri kenüh, nyimpari mpa küzükrü müke küsari kenüh, anyi kürühuri kenüh, azhürie nü küzhühja povü küsari kenüh, nyutü zanyo jüma nyia vünüh sanü küsosiezhü kümühieri sie küproluo kütseri kenüh wie.

¹¹Küsosiezhü jümatü zhühlekümühiewa vünüh ngura thi jümatü küzatsü üta hi vü tsotütsü, Zhühthe Kümühie jümatü küthohlathohvü thi tsiakütsü Saküüwuowa vünüh ru.

¹²Hi nüh Khrista Jisu hiri VÜWA kümüna tsü veh, ma nüh eh küüro kenüh kükhra hi tsü. Ma nüh hi tü kütsotütseri ta chieke thi ma zhuh küro üta hi ji küsa kenüh hi nüh ma kümüna tsüveh,

¹³ rülo teküwavü hi nüh ma phramüsü ketünga thi ma sakümnomna tsüwienga thi ma müküchie sawienga, Saküüwuowa tü hi kümüze sheh, küpakenühnyunü hi tü jüma tsotho vünü kütsotü müjie peh thi hi tü mowa saveh nüh müküthsü kenüh.

¹⁴Hiri VÜWA nüh hi vü ma küümzewa hozake küshoketsü thi Khrista Jisu sie küsü küsa vünüh hiri azhi sanü kütsewa kütsotü thi küümzewa hi tsü.

¹⁵Khrista Jisu tü kükhiemuori külole nta azhih vü ru ta küsa müküürüra thi kütsotüra küsü, thi kükhiemuori aveh zhie nüh hi nüh kümüsütsawa,

¹⁶thitü Saküüwuowa nüh hi küürüpatü thuohtüvü ma tsotü nü küsuokürho ngu na küsari tü ma nüh hi sie küüzhikezhikhri vünüh ma tü luoveh suo müta küsa thsoshi saküütsa wiethuoh.

¹⁷Küsuokürho Kajiwa, müküsürawa thi müküngurawa, thi ma mpa nüh kümahtsa küpeh VÜWA, ma nyia vü Saküüwuowa küpa mükünyiewa tü küsiake thi küthohla küsuokürhowa saluo. Amen.

¹⁸Eh tsa Timothi, hi nüh azhü hama no tsotüveh, jümatü no kenüh khanavü setsaküthsüzhü phrateküsawa. Saluo mühie na küsa kenüh senyusevi kümüjie azhü hamari vi luo,

¹⁹thi no kütsotüwa küjephoke luo, thi kümüshewa matsaluo. Anyi wuori thuoüji mari kümüshewa müthsü nüh mari kütsotü sakümüsümüthuoh.

²⁰Jümari azhie vü Haimenaus thi Alexander masü tü hi nüh Tsuore[2] kükhra ake vü thse nü masü sakümnomnamüthuoh; mari nüh phratemüsü kütsewa hama nüh mari sosie nü khetera naveh.