Read Pochuri Naga 1 TIMOTHI 3 Bible Online

1 TIMOTHI 3 - Pochuri Naga bible

1 TIMOTHI 3

¹Küphrate hamatü azhütsa: mükütüküzü nyi küsü nüh kümühu sierhü sangüveh üji ma tü küüro kümühie münguveh.

² Nazizheh vü sierhü thuoüji müküle mükünyieri müsaji mümühie; ma tü vüvüh küsü mpa küpehri müsaji mümühie, azhüküzhüri ma mpa ma kükheke, thi arüleh vünüh küürothsüri, ma zhe vü küzehri küsiekengüri, nyuri küsosierari;

³akhazhukümüsheri nyutü zanyo vüriekütseri nüh müsanüh azhükünyiri thi anyi saküütsarürari; pesa mükümünguri;

⁴kümühie ta ma mpa ma tharuo kete nü siekürhothsüri thi ma tsari ma saküüsiake nü ma zhüsaküünarari müsaji mümühie.

⁵Küpakenühnyunü nyi küsü nüh ma mpa ma tsapatharuo kete nü siemürhothsü thuoüji mokümjie Saküüwuowa kümühuzhe sierhothsü naveh lo?

⁶Ma tü kütsotüvü khruo kümüri müsaji mümühie, jütathuoüji ma tü rhieza tewa nü Tsuore kümüjie müshemüsükümü küsawa nyu.

⁷Nazizheh lovü anyi mpa mükünyu alienyiri nga küsiakeri müsaji mümühie, jütathuoüji ma tü küzükrüwanyu thi Tsuore piejü lovü kütuwanyu.

⁸Jükümjie Nazizheh vü küükrari nga khuke kümühie thi kütsazari müsaji mümühie; mari tü akha hozake müküzhuri thi pesa mükümünguri;

⁹mari müshe mütse nü kütsotüwa küzhütsa küthsütsükümüwa müküjeh üji mümühie.

¹⁰Mari kümüsümühie no khu nü müküle münyiethuoüji mari küüro luo.

¹¹Mari vüvühri nga khuke mümühieji mümühie, thi arhüküsari küsavühnyu, mari tü zanyo aveh vü nga küzhikezhikhri thi münyitsaji mümühie.

¹²Nazizheh vü küükrari tü vüvüh küsü mpa küpehri thi ma tsari thi ma tharuori kümühie ta kete nü siekürhorari müsaji mümühie.

¹³Küükra jümari tü mari mpa mari küüro kümühieta küsari thuoüji mari mpa mari kütsiepe sakümüzho nü Khrista Jisu vünüh müzho sheh nü mari kütsotüwa phrateraveh.

¹⁴Hi nüh lasi hama kürhüvü hi nüh shita ru no siekümütu müsheveh.

¹⁵Thitü hi nüh rumünümü thuoüji Saküüwuowa zheh vü mokümjie hiri mpa hiri khuke müsaji mümühie nüh lasi hama vünüh thsü naveh; jümatü rhoküveh Saküüwuowa Nazizheh tohvühwa thi küzhütsawa künyuote.

¹⁶Hiri nale tü küzakele shehveh ünüh nyi küsü nga müküürürazhü: Ma tü nyiri sazüh vünü ru, Sietse vünüh ma tü zhütsa ta küngu, thi rügizhühleri nüh ma ngu. Akuori azhie vü ma kürhowa küza, azhih aveh vü ma tsotü, thi küthohlathovü vünüh ma sie thajüwu vü tekuo.