Read Pochuri Naga 1 TIMOTHI 6 Bible Online

1 TIMOTHI 6 - Pochuri Naga bible

1 TIMOTHI 6

¹Nyura tühkha sanü kütseri tü ma mpa ma vüri vü küsiakekütse aveh vünüh müsheluo, jüta thuoüji nyi küsü nga nüh Saküüwuowa nyo nga thi hiri nüh küsosie nga phraküümüsüwanyu.

²Khristanyiri tühkha sanü kütseri müküchie müsatümü, küpakenühnyunü mari tü ajie nü wie. Jütanyunü mari tü jümanyie vünüh mari kütsü mükünaji mümühie, küpakenühnyunü mari küüro vünüh akünyia saraküvehri tümari nüh küümzeri thi kütsotüri küsa kenüh. Zanyo hari sosie thi müküzaji mümühie.

³Thari nüh küsosiezhü küpa sosie nü hiri VÜWA Jisu Khrista küzhütsa zhüri thi hiri nale küsosie sie kümüshe küsümüsanüh,

⁴rhieza küluo tetseveh thi zanyoküsü nga müthsü. Ma tü ruoluona küsa amüshe mükümühie pehveh thi azhü kenüh küsaluo pehveh, thi hama nüh noküüjizhi, küüjakünya, küsü nüh küsü müküchie, kümüsü vünüh müshekümüsüluo,

⁵thi rüluo küpeh huo amüshe momaküsari thi küzhütsamükünyieri vünüh ru veh. Mari nüh anale vikütse thuoüji nyirhie na küsa lekhuji ta müshesheti.

⁶Azhütsa, ma nüh mowa pehveh nüh jüma vi ma lora tseveh thuoüji anale nüh nyi küsü sakünyirhiera tsaveh.

⁷Hiri tü azhih hala küruvü zanyoküsü nga vimüru. Thi hiri tü azhih hala nüh zanyoküsü nga viküwa wanyu.

⁸Jükenüh hiri tü ashie thi thsümünyi pehthuoh üji hiri kenüh walethuoh.

⁹Thitü thari nüh nyirhiengü tseveh nüh kümüjimüra vü küluke tetututi thi zanyomüküthsü piejü hozake vünüh küzazati thi kümüsamüna kümünguvü tetututi, jümari nüh sakümüsü thi küzorie vü shotewawati.

¹⁰Küpakenühnyunü apesa kümüngu thuoüji zanyo kümüsü aveh rütsohwa wiethuoh. Nyi wuori nüh jü müngu sheh nü kütsotüvünüh letsuo tewa thi lokürü hozake vünüh mari luoveh zokhuomüthuoh.

¹¹Thitü noh Saküüwuowa nyi sakütsewa zanyo hamari aveh vünüh kari luo. Thi künyitsa, küzhütsa kürho, kütsotü, küümze, müshe küüzhike, thi kürünyi kenüh kükhra thseluo.

¹²Kütsotü vü no kümükhra nüh zhü luo, thi noh mpa noh kenüh chara nü küsuokürhowa vi luo; küpakenühnyunü noh nüh hozake atüvü müzho sheh nü no kütsotü küphrazhu kümüjie Saküüwuowa nüh akürho havü no jike sa veh.

¹³ Zanyo aveh vü kürho kütsü Saküüwuowa atüvü thi Pontius Pilate atüvü müzho sheh nü kütsotü küphrahzhuwa Khrista Jisu vünüh,

¹⁴VÜWA Jisu Khrista Rülo müjie küru küju azhütsüküsari müzhe thi kümühie ta jümari sa üti hi nüh no vü azhütsüveh.

¹⁵Ma küru thuoüji Saküüwuowa nüh tsotho khem ta küsavü virunaveh, thi jüma thuoüji: kümüngatsawa thi Takrüwa; kajiri nyia nüh Kajiwa, thi avüri nyia nüh VÜWA.

¹⁶Müküsüra thuoüji ma mpa wie, ma tü nyi küsü nga nüh müküjura küwie vü rho veh. Nyi küsü nga ma müjie nguwie, thi nyi küsü nga ma müngura. Ma tü küsiake küvüwa sa thi küsuokürho kükhrawa saluo. Amen.

¹⁷Khinyi kürho vü nyirhie küvehri mürhiezatümü üti azhütsüluo, thitü mari küluozhewa tü künyirhie zanyo pehwanasamüküvehri vü müsatü Saküüwuowa vü saluo, ma tü hiri loküzhe kenüh zanyo küsü nga mükürüpa nüh hiri kütsüwawiethuoh.

¹⁸Zanyokümühie sa, küüro kümühie vünüh nyirhie, mükürüpatü zanyo vi nyuri külie thi nyuri sie küsuo üti mari vü azhü tsüluo.

¹⁹Hakümjie küsa vünüh mari mpa mari künyirhie thuohtüvü kenüh küche kümühie shehra naveh. Thi mari tü kürho küzhütsawa ngura naveh.

²⁰Timothi, no mowa no üta tsotü saveh nüh kümühie ti rükie pehluo. Anyi wuori nüh müküle vünüh “Zanyoküthsü” ta küjiwa azhükümüsü küphrate thi mazhühnyo mükünyie kürüluo kari luo.

²¹Küpakenühnyunü anyi wuori thuoüji jü müzhe na küsa vünüh kütsotü lekhujiwa kümie müthuoh. Saküüwuowa küümzewa nüh nohri aveh sieküpehwa saluo. Amen.