Read Pochuri Naga 2 TIMOTHI 2 Bible Online

2 TIMOTHI 2 - Pochuri Naga bible

2 TIMOTHI 2

¹Noh eh tsa thuoüji Khrista Jisu sie zarike küsara, küümze hiri zhi küsara vünüh khra müzho luo.

²Nyiri hozake atü vünüh hi nüh küsosie noh nüh küünarari vi luo, thi thari nüh küpari nga sosiera naveh nüh kütsotükütseri vü tsotüluo.

³Khrista Jisu rienyi kümühieri kümüjie nyi münomüna luo.

⁴Rienyi sanü küüro kümühie sakütsevü ma nyia vü küjiwa loküzhe küsangü küchie nüh anyi küpari küüro nga küsanyie münyie.

⁵Aküzhü saküüzhie sakümüjieri tü wuleri küüna vünüh küchie nüh jisuo müngura.

⁶Zhuhküürori kümükhra nüh küroküsawa tü kümawie vü suope pokhuwa künguleh.

⁷Hi nüh mowa küzaveh nüh müsheluo, küpakenühnyunü Saküüwuowa nüh jümari aveh no saküüthsüra naveh.

⁸Jisu Khrista küsü vünüh kürholewa müsheluo, Zhühthe Kümühie vü hi nüh küüza kümüjie ma tü David küthsoküzhi.

⁹Zhühthe Kümühiewa hi nüh küüza kenüh hi tü münomünaveh thi müküleküsari kümüjie mürüli nüh hi kürite. Thitü Saküüwuowa zhü thuoüji mürüli nüh küürite vü pehmüveh,

¹⁰jükenüh Khrista Jisu vünüh küülole kütsüwa thi küsuokürho küthohlathovü viküru Saküüwuowa nüh rüka küsari küüngu na küsa kenüh hi tü zanyo aveh vü küzhike tseveh.

¹¹Azhü hamatü azhütsa: Hiri ma sie sü thuoüji, ma sie kürho nga sanaveh.

¹² Hiri nüh küüzhike peh thuoüji, ma sie kajira naveh. Hiri nüh ma kule thuoüji, ma nga hiri kule naveh.

¹³Hiri nüh müzhütsanyitsa wie ketünga, ma thuoüji zhütsanyitsa veh, küpakenühnyunü ma tü ma mpa müriera.

¹⁴Hama vi mari luoveh küthetsüluo, azhüri kenüh mari müsaluotümü üti Saküüwuowa atü vünüh mari vü azhü kümühieti küza luo. Jümatü küünari saküümüsü küchie nüh zanyo kümühie küsa münyie.

¹⁵Saküüwuowa atüvü mühietsamü ta sana küsa kenüh no kükhra thse luo, küürori Saküüwuowa küzhütsa zhühle tü arüleh vünüh sosie kütsewa thuoüji ma küüro kenüh küzükrü münyie.

¹⁶Mükümtse thi azhü zhühnyo mükünyieri vünüh kari luo, jümari tü Saküüwuowa vünüh nyiri saküütuowa le veh.

¹⁷Küsosiezhü jüritü akhüma pieke nü küna kümüjie asazhü tsathuoh tewaveh. Nyi künyi azhü jümari sosie kütseri tü Himenaus thi Filetas.

¹⁸Masü tü küzhütsawa lekhuji jamü nü hiri kürhole tsotho tü jumthuoh ta phrate nü kütsotüri wuora kütsotü sakümüsümüthuoh.

¹⁹ Thitü Saküüwuowa nüh zhefo saküsawa thuoüji küngamüjara; thi azhü hamari tü jürügi vü rhüke saveh: “Thari nü Saküüwuowa zhi nüh ma nüh thsüveh thi thari nü VÜWA zhi ta phrate tse nüh müküle küsa vünüh mükariji mümühie.”

²⁰Azheh küji küsü vü ahuo akhu thi küfüküju küpapa pehveh: wuori thuoüji aloh amekükhrawa nüh thi suna nüh sa, küpari thuoüji athso thi azhih nüh küsa; wuori thuoüji rülo küji vü küvi thi wuori thuoüji muomuo küvi kenüh.

²¹Mükütüküzü nyi küsü nüh zanyo kümüsü jümari aveh vünüh ma mpa nüh mütse thuoüji ma tü küüro kümühie kenüh vi naveh, küpakenühnyunü ma tü sakümtsemüthuoh thi VÜWA kenüh zanyoküsara sanathuoh thi küüro kümühie aveh kenüh vi nü saküwa sanathuoh.

²²Noh tü rülaviza asazüh kümünguri kari nü künyitsa, kütsotü, küümze, thi luoveh kürünyi hamari küükra kenüh luoveh mütse nü VÜWA vü ji küsari sie nü kürü wurie phah luo.

²³Thitü aküzhe thi kürüluo müküzü rüluo nü kütse kule luo; jümari tü asehkhevü thuoüji küüraluo nüh asehkhe sasati.

²⁴VÜWA sieperi thuoüji küüraluovüh nyu. Tü aveh vü nga ma tü mümühieji mümühie, azhüzhü thi küzhike nü küsosieri müsaji mümühie,

²⁵ma nüh azhüküzhü vünüh ma nüh mari kükhaphrüra tsotho tsü nü küzhütsawa küthsüra sanaveh.

²⁶Jüta sanü mari tü ase thsü le nü Tsuore piehjü vünüh jozhura naveh, ma nüh mari re nü ma kümüshevü thse nü ma zhü küünamü.