Read Pochuri Naga TITA 1 Bible Online

TITA 1 - Pochuri Naga bible

TITA 1

¹Paul, Saküüwuowa[1] siepe thi Jisu Khrista povü küsawa vünüh kütsü. Hi tü rüka nü Saküüwuowa nüh rüka küsa nyiri kütsotü kükra üta thi hiri nalewa nüh küzhütsa sosiekütsüwa vü küjotsü üta,

²jümatü küsuokürho kenüh küluozhewa rügi vü phrateke küsawa. Tsotho atükhu vünüh akürho hama hiri vü phrateke küsawa Saküüwuowa thuoüji mürie,

³thi tsotho khem ta küsavü ma nüh ma zhühlewa vünüh küthsütsüthuoh. Hamatü hi vü tsotütsümüthuoh, thi hi nüh Saküüwuowa hiri VÜWA kümüshe vünüh phrateveh.

⁴ Hi nüh hama rhü kütsotü küsü sanü kütse eh tsa tsahwa Tita vü tsü veh. Saküüwuowa Pawa thi Khrista Jisu hiri Küülolewa nüh küümze thi kürükümühie kütsüwa saluo.

⁵Hi nüh no Kret vü küpehmü nü teküru thuoüji khinyi nga zanyo müsaji mükümühie arühle vü sa thi anyu aveh vü kümühu kükhruori küche küüsa nti küsa kenüh. Hi nüh küüzari müsheluo:

⁶ Kümühu vü kükhruori thuoüji müshemüküümüsürari, ma tü vüvüh küsü mpa küpehri müsaji mümühie, ma tsari tü kütsotüri müsaji mümühie, kümüsü sanü phratekütseri nyutü nyurazhü müküünari küsavühnyu.

⁷Küpakenühnyunü kümühuvü sierhüri tü Saküüwuowa küüro vü alüri küsa kenüh ma tü müshemüküümüsüri müsaji mümühie. Ma tü kürhiezari nyutü arüküshunyiri, nyutü zhukümüsheri, mükükhetera arüküshuri, nyutü pesa kümünguleri küsavüh nyu.

⁸Thi aküze küsiekengüri thi kümühie mowa nüh külori müsaji mümühie. Ma tü ma mpa ma kükheteri, luoveh kümüshori, kümtseri, thi amükeküzü vünüh kürhori müsaji mümühie.

⁹Ma tü kütsotüra zhühlewa müküjephoji mümühie thi küsosiezhü vü kütsarüri müsaji mümühie. Hakümjie vünüh ma tü küsosie azhütsawa vi anyi küpari küchüra naveh, thi thari nüh jüma küjo tseveh nüh mükümühiewa küjokütsana küsa kenüh.

¹⁰Küpakenühnyunü nyurazhü müküünari thi zhütsazhüji mükünyu vünüh nyuri kümüra zhile, pehkhewie ketünga ahukürheri küüzhi.

¹¹Mari nüh phratekütseri khete kümüleh, küpakenühnyunü mari nüh küsaleh mükünyuwa vi tsapatharuo aveh sosie kümüsü tse, thi küzükrü müke aveh sanü pesa mülie tseveh.

¹²Mari mpa mari azhie vünüh mari setsaküthsüri küsü nüh küzhütsa vünüh phrateküsa: “Kretri thuoüji tsotho aveh vü riemü, khukekümüsü samüwari khe, thi küchu nü amüwi küjiri,” ta phrate sa veh.

¹³Hama kenüh noh tü mari phrasheke tsüluo, jütathuoüji mari tü kütsotü kümühie pehra naveh,

¹⁴thi jütathuoüji mari tü Judahri küzhühja zhühkuri thi küzhütsawa kulemü nü kütseri vünüh anyira zhükütsüri müvi nüh sanathuoh.

¹⁵Kümtseri kenüh thuoüji zanyo aveh nga mütsemü; thitü mükütsotüri thi sakümüne kümüri kenüh thuoüji zanyoküsü nga mümütse, küpakenühnyunü mari thuoüji mari lori thi mari müsheri sakümüne kümüthuoh kenüh.

¹⁶Mari nüh küphrate thuoüji mari tü Saküüwuowa thsüveh ta, thitü mari müke vünüh jüma kürümü, mari tü akükreri, thi azhümüküünari, zanyokümühie küsa aveh vünüh mari tü mümühie.