Read Pochuri Naga EBRIRI 10 Bible Online

EBRIRI 10 - Pochuri Naga bible

EBRIRI 10

¹Judahri Khonyo thuoüji zhütsawa nyu thitü azhütsa kümühiewa ru na küsa thsoshiwa. Mavimavi mükütuo nüh küsahthuoh saküvehwa nüh mokümjie Saküüwuowa vü kütse nyiri saküjura na lo?

²Mükütüküzü nyiri nüh Saküüwuowa kükhurü tü mari kükhiemuo sakümtsetsa veh thuoüji, mari tü kükhiemuo kenüh amüshe kümüsüleh nyuthuoh, thi küsahthuoh küsa aveh müsanüh sanathuoh.

³Thitü jütawie ketünga anyira kükhiemuo küüthsüle na küsakenüh küsahthuoh küüro tü mavimavi sawieveh.

⁴Küpakenühnyunü shüvotsa thi nyihsü züh tü piketü kükhiemuo vimüjara.

⁵Hama kenüh Khrista azhih hala ru na küsa vü ma nüh Saküüwuowa vü küüza: “Noh tü küsahthuoh thi zanyo vi kükhuhrü mülo, thitü noh nüh eh kenüh satsa küche savehthuoh.

⁶Noh tü kükhuhrüpe rügi vü samüwa aveh kütso mülothuoh. Nyutü küsahthuoh sanü kükhiemuo viküja mülothuoh.”

⁷Thinü hi nüh, “Khonyo lasi lovü eh kürho rhüküsa kümüjie, halie, Saküüwuowa hi nüh no müshe sa nti hala pehveh,” ti küza.

⁸Atükhu vü ma nüh, “Noh tü küsahthuoh thi zanyo vi kükhuhrümülo thi lomüzhe nyutü samüwa kükhuhrüpeh rügivü kütsothi kükhiemuo küsahthuoh vija na küsa lomüzhe thi mülo,” ti küza.

⁹Thinü ma nüh, “Halie Saküüwuowa hi tü noh müshe sa nti hala pehveh,” ti küza. Jükümjie Saküüwuowa nüh küsahthuoh kürüwiri vijamü nü jümari müthoh vünüh Khrista küsahthuohwa vithse.

¹⁰Küpakenühnyunü Jisu Khrista tü Saküüwuowa nüh mowa sa üta nüh ma nüh sa, ma nüh ma mpa ma satsa tsü nü küsükerivünüh aveh kenüh hiri aveh tü kükhiemuo vünüh sakümtsera.

¹¹Judahri levü küsüküsü nga rülorülo ma küüro sa thi küsahthuoh jükümjie küsa hozakeri tsü veh; thitü küsahthuo hari tü piketü kükhiemuo vimüjara.

¹²Thitü Khrista thuoüji küsahthuoh kütsü küsü sa, ma kürhokütsü jüma tü küsuokürho müviji mükümühie kenüh, jütisanü Saküüwuowa ake azhie wuovü pehvehthuoh.

¹³Jütisanü khinyi thuoüji ma tü Saküüwuowa nüh ma mükünongüri vi ma jinyipe müjie küsa küju huopehvehthuoh.

¹⁴Thari nüh kükhiemuo vünüh sakümtsemüthuoh nüh ma nüh küsahthuoh küsükeri vünüh küsuokürho saküjumüthuoh.

¹⁵Thi Kümtse Sietse wie nga hiri vü ma povü satsü. Atükhuvü ma nüh:

¹⁶“Kütsathuoh hama tü thuohtüvü hi nüh mari sie sa nti küsawa wiethuoh ta VÜWA nüh küza: Hi nüh eh khonyori mari luoveh lovü thse naveh, thi mari müshe lovü jümari rhüke naveh,” ta küza.

¹⁷ Thi ma nüh küüza, “Mari kükhiemuo thi mari kümüsüküürori hi nüh kümüshelewanyuthuoh,” ti küza.

¹⁸Jükenüh hamari noja kümüsevü thuoüji, kükhiemuo vija naküsa kenüh küsahthuoh müvithuoh.

¹⁹Jükenüh eh füri, Jisu küsü kenüh hiri tü Kümtse Tsah Pehvü kürüzih vünüh küwara pehvehthuoh.

²⁰Ma nüh kürho lekhuji kürüthe küsü hiri kenüh satsümüthuoh, athsüküthuohteh vünüh jümatü, ma satsa vünüh.

²¹Saküüwuowa azheh kühuo levü küji küsü hiri tü pehvehthuoh.

²²Jükenüh luoveh kütsaza thi kütsotü tsah vü taji, jümatü amüshe müküle vünüh luoveh sakümtsemü nü thi ajuh kümtse nüh satsari phrümü taji nü Saküüwuowa vü shehnyiraluo.

²³Küluozhe hiri nüh küphrahzhuwa kürü küjeh müzho ünüh raluo, küpakenühnyunü Saküüwuowa nüh phratekeküsawa hiri tü tsotüra naveh.

²⁴Hiri küsü nüh küsü kenüh müshe ünüh raluo, küümze kütsaluo na küsa kenüh küsü nüh küsü kükra thi kümühiesaluo.

²⁵Anyi wuori kümüjie müsatü mükütuo nüh hiri kürü mütupeh huo ünüh raluo. VÜWA Rülowa ru shehnyi sheh kümü nohri nüh küngu kümüjie hiri küsü nüh küsü küüchüwasaküzhi ünüh raluo.

²⁶Küpakenühnyunü hiri vü küzhütsawa küthsükümüsevü mükütüküzü hiri nüh khiemuo peh huo thuoüji kükhiemuo vija naküsa küsahthuoh küsü nga münyiethuoh.

²⁷Jütanyu nü krü taji ashih küsawa huoküpeh wiethuoh, thi anyih müküüzara ru nü Saküüwuowa mükünongüri zoriemünathuoh!

²⁸Anyi küsüküsü nga Mosa Khonyowa müküna thuoüji nyi künyi nyutü jüma nyia vünüh müküle ta küsa povü pehmü thuoüji küümze müpeh wiethuoh nüh zotheveh.

²⁹ Thinü anyi Saküüwuowa Tsa müküchie sakümüri tü moti sanathuoh lo? Thawa nüh kükhiemuo phrüküümütse Saküüwuowa kütsathuoh azühwa müshe kürüzih tse nüh ma tü moti sanathuoh lo? Thawa nüh küümze Sietsewa müküchie satse nüh ma tü moti sanathuoh lo? Ma tü kümnomna küzakelekümüsü küngule ünüh müshe noluo!

³⁰Küpakenühnyunü thawa nüh hama küze nüh hiri nüh thsüveh, “Müthoh küsa thuoüji e müthoh, hi nüh thuohtsülewie naveh,” thi ma nüh küüza le, “VÜWA nüh ma mpa ma nyiri ashih sawienaveh,” ta küza.

³¹Rhoküveh Saküüwuowa ake vü tu na küsa tü küükrükükraküsü.

³²Nohri teküwa rülo vü Saküüwuowa küwie nohri vü küwieke vü müshe nonoluo, nohri tü zanyo hozake vünüh küzhike thitü kükho jüri nüh nohri chakümü müsa.

³³Nohri tü küsükeri nyiri atü vünüh müküchie thi sakümnomna, thi küsükeri nohri tü hakümjie nohri müküchie küsari sie küsü nga sa.

³⁴Nohri tü küsiküsari kümnomna nga sie küsuo, thi nohri azhiprüteküwa vü nohri tü nohri zhi kümiekümü kenüh küzhike nü lozhe, küpakenühnyunü jüma nyia vünüh zanyo kümühietsawa ngu naveh ta nohri nüh küthsü kenüh, thi jümatü küsuokürhopeh naveh.

³⁵Nohri luoveh küjiwa müjatümü, küpakenühnyunü jüma nüh suope aküji satsü naküveh kenüh.

³⁶Saküüwuowa kümüshe sana küsa kenüh thi ma nüh phratekeküsawa ngu na küsa kenüh noh tü müküzhikeji mümühie.

³⁷Küpakenühnyunü zhütsazhü nüh, “Küsuomüwa nüh, ru na küsawa tü ru naveh; ma tü kümünüwa nyu,

³⁸Eh nyi künyitsari tü jütawie ketünga tsotü naveh thi rhonaveh; thitü mari nyi wuori nüh sühle tewa thuoüji, ma vü külozhewanyu,” ta küza.

³⁹Hiri thuoüji anyi sühle teküwari thi küümieri nyu. Jütanyunü hiri tü kütsotü pehveh thi külolemüthuoh.