Read Pochuri Naga EBRIRI 11 Bible Online

EBRIRI 11 - Pochuri Naga bible

EBRIRI 11

¹Kütsotü peh na küsa thuoüji hiri nüh zanyo luozhe küpehrikütoh naküsa kenüh wie, hiri nüh mükünguri kütoh naküsa kenüh.

²Khana kürhori tü mari kütsotü vünüh Saküüwuowa kümühiethsü ra.

³Saküüwuowa azhü vünüh azhih aveh tü sara ta hiri kütsotü vünüh thsüra, jükenüh ngu küvehri tü mükünguri vünüh sazhu.

⁴Kütsotü kenüh Abel tü Kain nyia vü küsahthuoh küümphaküsü sa Saküüwuowa tsü. Ma kütsotü vünüh ma tü künyitsari ta Saküüwuowa kümühie thsüra, küpakenühnyunü ma nüh kütsüwa Saküüwuowa nüh mühiemü ta sa. Abel kütsotü kenüh ma tü sümüwie ketünga ma zhühku phrateveh.

⁵ Kütsotü kenüh Enok nga aküsü müküngu nüh sa. Maküüsünyu nü ma vi Saküüwuowa vü tewa, thi nyi küsü nga ma mphara nüh samü, küpakenühnyunü Saküüwuowa nüh mavitekükuo kenüh. Zhütsazhü nüh küüza Enok müjie vitekükuo vünüh ma tü Saküüwuowa külo sa ta küza.

⁶Kütsotü müküvi nü nyi küsü nga Saküüwuowa külo müsara, küpakenühnyunü thari nüh Saküüwuowa vü ru naveh nüh jümari thuoüji Saküüwuowa tü pehveh thi ma küphahri thuoüji suope satsüveh ta küsa kütsotü müpeh üji mümühie.

⁷Kütsotü kenüh Noah tü ma nüh müküngu zanyo atüvü küpehri Saküüwuowa azhü vünüh künara. Ma tü Saküüwuowa zhüküna taji ma thi ma tharuori külole na küsa ajuhie küsü sa. Jütisanü azhihwa tü müshe müsümü, thi kütsotü vünüh küru künyitsa Saküüwuowa vünüh küruwa ngura.

⁸Kütsotü kenüh Saküüwuowa nüh ma tsü nta phrateke küsa anyuvü wa üta küji vü Abraham tü ma zhüküna. Ma khievü wanaveh nüh ma tü müthsü nüh kümuomuo tsetewa.

⁹Saküüwuowa nüh ma vü phrahteke kütsü anyu vü kütsotü vünüh alienyiri kümüjie vünüh rho. Isaac thi Jacob masü nüh Saküüwuowa vünüh phrahteke küsa zarike ngura nü ajuhthsüzheh lovü kürho kümüjie ma tü ajuhthsüzhe lovü rho.

¹⁰Küpakenühnyunü Abraham tü anyuküji Saküüwuowa nüh rhe thi saküsawa huo peh, anyu jümatü müküüselera ape küsü.

¹¹Abraham tü khruo shehmüwiethuoh ketünga thi Sara wie nga atsamüngura nüh samüwie ketünga kütsotü vünüh ma tü apa küsü sara. Ma nüh Saküüwuowa nüh phrahteke küsawa kütsotü kenüh.

¹² Abraham tü sükümüthuoh kümjie wie ketünga, rügi vü wutsiri thi anyuo vü shünyi müküchierhüra kümüjie ma vünüh küshuküra hozake ru.

¹³Anyi hamari tü kütsotü vünüh sümü. Mari tü Saküüwuowa nüh phrateke küsawa müngu, thitü kületsuo vünüh jümari ngu thi mari lieke huo, thi mari tü alienyiri thi anyu vünüh zhejakümüri kümüjie üta küthsü.

¹⁴Küpakenühnyunü anyi jüüta küphrateri nüh mari tü anyu phahtse ta küsa küzatoh.

¹⁵Mari nüh anyu jamü nü teküruwa mari nüh mümüshelethuoh, mari nüh kümüshele tüla mari tü shele tewa naveh.

¹⁶Jütanyu nü anyu jümatü mari nüh münguküru kümphatsawa, thajüwu anyuwa. Jükenüh Saküüwuowa tü mari Saküüwuowa ta küji müzükrü, küpakenühnyunü makeria nüh ma nüh anyu küji küsü küchemütüthuoh.

¹⁷Saküüwuowa nüh Abraham vi kümüte vü küthse vü kütsotü vünüh ma tü Isaac vi küsahthuoh sa. Phratekeküsawa tü Saküüwuowa nüh Abraham vü satsü, thitü ma tü ma tsa vehküsü mpa wie ketünga vi küsahthuoh sa nta sawie.

¹⁸ Saküüwuowa nüh, “Noh tü Isaac vünüh phratekeküsa küshukürari pehra naveh,” ta küza.

¹⁹Saküüwuowa nüh Isaac tü sakürholerawie nata Abraham tü tsotü. Jükenüh phrahte nta thuoüji Abraham tü Isaac aküsü vünüh akürho ngura.

²⁰Kütsotü vünüh Isaac tü ru na küsa tsotho kenüh Jacob thi Esau vü kütsia zhü phrahtera.

²¹Kütsotü vünüh Jacob tü süna saküvehvü Josef atsari küsüsü vü kütsia tsü. Ma kütsüh rügi vü tsüke nü Saküüwuowa khuhrü.

²²Josef tü süna saküveh vü kütsotü vünüh Israelri Egypt vünüh shuteküwa phrahtetsü, thi ma kümo kenüh mokümjie müsaji mümühie nüh azhütsü.

²³ Kütsotü vünüh Mosa tü wuo kümüsevü ma vühri nüh asah küche vi küthi. Mari tü atsawa züshehkümü ngu, thi mari tü kajiwa zhü müküüna nga mükrü nüh sa.

²⁴ Mosa tü khruokümü sevü kütsotü vünüh Faroah atsavühwa atsa nyu ta kürü.

²⁵Ma tü tsotho pikewienga kükhiemuo vü loküra müsa nüh Saküüwuowa tsari sie kümnomna lotewa.

²⁶Ma tü Egyptri künyirhie aveh nyia vünüh Messiah kenüh küsiake müvü nüh sakümüwa nüh küünyia ta thsü, küpakenühnyunü ma notha tü atü vü saküveh jisuowa vü sakümü kenüh.

²⁷Kütsotü vünüh Mosa tü mükrü nüh küjiwa rüküshu vünüh Egypt vünüh tewara. Ma nüh müküngura Saküüwuowa nguwie ketünga ma tü ase vü küüpele makümü sa.

²⁸Kütsotü kenüh ma tü tsekükariwa küchera thi amükhieri vü azüh kütheke, jüütisanü rügizhüle atsa pokhuri küzothewa tü Israelri tsa nyimpa pokhuri müzothe nüh sa.

²⁹ Kütsotü vünüh Israelri tü azhih küüwe vü kütse kümüjie Kümüru Juhküji karira; Egyptri nüh jükümjie nyi santa küsa vü ajuh nüh mari vi müzhumü.

³⁰Kütsotü vünüh Israelri tü rülo türü keri Jeriko shieku tsekümükiele vü puatewa.

³¹Kütsotü vünüh Rahab küüphroküphrievühwa tü Saküüwuowa zhü müküünari sie müzothe, küpakenühnyunü ma nüh Israelri aküzi saküruri kümühie ta küsieke kenüh.

³²Hi tü küzawawie ti lo? Hi tü Gideon, Barak, Samson, Jefthah, David, Samuel thi setsaküthsüri zhühke phratena küsa tü müphratekherawiethuoh.

³³ Kütsotü vünüh mari tü anyu aveh sie saluo nü khrara. Mowa nü katoveh nüh mari tü jümari sa thi Saküüwuowa nüh mowa phratekesaveh nüh ngura. Mari tü amiewuowa apo nga khetera,

³⁴anyih ju sheh kütse nga zokünera, anyusuowa nüh zothe na küsavü nga nüh tera. Mari tü mükhra, thitü khratera; mari tü arie vü khrasheh thi anyi küpara rienyiri chara.

³⁵ Kütsotü vünüh nyimzari tü mari ajie nü sükümüri kürholera ngura. Wuori thuoüji akürho kümühie vü rholewa nta aküsü mümawiethuoh nüh kümnomna vünüh sümü.

³⁶ Wuori thuoüji riesa thi femü, thi wuori thuoüji mürüli nüh khe nü küsizhe vü thsemü.

³⁷ Mari tü aloh nüh ve, thi athsokürhovüh nüh mari rhothuoh, mari tü müjimüra thi anyuküsuowa nüh rethemü. Mari tü nyihsü nyutü nyihzhü hu küzhu nü tsewatseru ti sa, mari tü thohtsa, kümnomna tsü, thi müküchieküzhü sa.

³⁸Azhihwa tü makeria nüh mükümühie sa! Mari tü azhe mükünyieri kümüjie reza vü thi küzhi vü küzhu, azhih lovü lopie thi lokhe lovü rho.

³⁹Anyi hamari tü mari kütsotü vünüh azhüke kümühie pehrawie ketünga mari vü Saküüwuowa nüh phrateküsawa müngu nüh samü,

⁴⁰küpakenühnyunü Saküüwuowa tü ehkeria nüh rühle kümühiemüshe küsa kenüh. Ma kümüshe thuoüji hiri vünüh mükünyunü jüri tü samükümühiejura.