Read Pochuri Naga EBRIRI 12 Bible Online

EBRIRI 12 - Pochuri Naga bible

EBRIRI 12

¹Hiri kenüh thuoüji hiri povü küsa hiri mükieshe veh. Jükenüh akhuoküüzhori thi kükhiemuo hiri küpephoke nü pehküvehri vijamü nü aküzhü hiri atüvü saküvehwa vü kükhra thse nü zhüwaluo.

²Hiri notha Jisu wuovü nophoke luo, hiri kütsotü apo vünüh asehkhe küju ma vü saküpeh huo wiethuoh. Ma tü khieluothsowa kenüh müjawie! Jüta nyunü loküzhe atüvü ma huoküvehwa kenüh khieluothso rügi vünüh sü na küsa müzükrü nüh sa, thi ma tü khinyi thuoüji Saküüwuowa kajipe azhie wuovü pehvehthuoh.

³Ma tü küzakele nga kükhiemuori vünüh kümürhüwa vikevünü müshe nonoluo! Jükenüh nohri mpa thachu temüwatümü thi müjatümü.

⁴Küpakenühnyunü nohri nüh kükhiemuo sie kürütüluo kütsevü nohri tü aküsüwa müjie khetera.

⁵Saküüwuowa nüh ma tsari kümüjie nohri küchü kütsü zhüri kümamüthuoh ülo? “Eh tsa, VÜWA nüh no saküümüsho vü noh luoveh thse luo, thi ma nüh no küphra vü noh luoveh thachu temüwatümü.

⁶Küpakenühnyunü VÜWA tü ma nüh küümzeri aveh thuoüji sakümüshotsü veh, thi ma nüh ma tsa ta küsari aveh thuoüji kümnomna tsütsüti,” ti küza.

⁷Nohri küümühie nta küsa kenüh nohri vü kümnomna tsü taji sosieveh; nohri tü Saküüwuowa tsa ta küsa nohri vü ma nüh kümnomna kütsü vünüh kütsa veh. Atsa wuori apari nüh müküsie pehveh ülo?

⁸Mükütüküzü noh tü ma tsari kümüjie vünüh kümnomna tsümüveh thuoüji ma tü atsatohri nyu thuohnü alietsari thuoh.

⁹Azhih vü kürho nyira pari thuoüji mari nüh hiri vü kümnomna tsü thi hiri nüh mari küüsiakeveh. Jütathuoüji hiri tü sietse Pawa tü küzakele nga ma kükhu vü peh nü mürhoji mümühie lo!

¹⁰Hiri azhih vü kürho pari thuoüji tsotho pike kenüh hiri vü kümnomna tsüveh, jümatü makeri’a nüh katoveh tü nta sanü saveh; thitü Saküüwuowa thuoüji hiri küümpha kenüh saveh, jütisanü hiri tü ma kümtsewa nyi küsuoveh.

¹¹Hiri vü kümnomna tsü thuoüji hiri sakülozhe nta nyu nü sakülorü nta saveh tünta tsotho pike müshesheti. Thitü asevü thuoüji kümnomna jükümjie vünüh saküümüshorari tü luoveh kürünyi suope künyitsa kürho avi pepeti.

¹²Noh ke küzhi nü kütse khroke luo, thi nohri akho khekheta küshü kütseri sakükhraluo!

¹³Aleh kümüshori vü tse huo luo, jüta thuoüji ajih küjiri tü müsara nüh sakümü nyu nü sakümühiera naveh.

¹⁴Nyiri küsüküsü vü nga mühie luo, thi kümtse kürho rhonti wurie luo, küpakenühnyunü jüüta mükünyu nü nyi küsünga VÜWA müngura.

¹⁵ Saküüwuowa küümze vünüh asevü müsühle nti saluo. Nyiküsü nga are kükha shoküvehri kümüjie sanü ma kükha nüh hozake saküüjakünya kümü kümüjie müsatümü.

¹⁶ Nyi küsü nga Esau kümüjie asazüh muomuo nyutü mükünyitsakürho mürhotümü, ma tü ma kükhruo suopewa sütsuo küsü ashie nüh zhutsamü.

¹⁷ Asevü thuoüji ma tü ma pa kütsiawa vi ngü; thitü ma tü sühle tewa, küpakenühnyunü ma nüh rüthsü shuwie taji jüma phahwie ketünga ma nüh mowa samüthuoh nüh zanyo küsü vünüh nga mükhaphrülera nüh samü.

¹⁸Nohri tü Israelri nüh küru kümüjie müjie ru, nohri nüh parana küsa vü, Sinai Küzhiho vü anyihzhu juküveh, aküzo, akümo[2], atsomürhü küsavü,

¹⁹tütü kükhu khi, thi ajikhi küsa. Nyiri nüh jikhi küünaravü, azhü küpa mükünale tümü üti khuo,

²⁰ küpakenühnyunü jikhi vünüh küüza zhüwa küna nü müküzhikera nüh sa, jüma nüh küüza, “Mükütüküzü samüwa wienga küzhiho jüma shike thuoüji aloh nüh müvetheji mümühie,” ta küza.

²¹ Aküno wienga ngole kümü kenüh Mosa nüh, “Hi tü khekheti küshü thi krü,” ti küza.

²²Thitü nohri thuoüji rügizhühleri sie nü Zion Küzhiho thi Saküüwuowa nüh rho küveh nyuküji thajüwu Jerusalem vü teru pehvehthuoh.

²³Nohri thuoüji Saküüwuowa tsa küwuokhuri lozhe sheh nü küsehzhupe vü teru pehvehthuoh. Mari anyo tü thajüwu vü rhükesavehthuoh. Nohri tü Saküüwuowa nyiri aveh ashih küsawa vü teru pehvehthuoh, thi anyi kümühieri saküümühiejurawa sietse vü teru pehvehthuoh.

²⁴Nohri tü Jisu, kütsathuoh kürüthe küchekütsüwa thi Abel züh nyia vünüh kümühietsah phratekeküsa azüh kaküjake vü terupehvehthuoh.

²⁵Jükenüh azhüzhüluo, thawa nüh phrahteveh nüh jüma azhümüküüna müsatümü. Rügi vü zhühlewa azhih vü kütsüwa thari nüh müküna nüh samü nüh jümari tü mütera nüh samü. Thajüwu vünüh küphrahte vünüh tewa nta thuoüji hiri nü küzakele nga jüma nyia vünüh mükütera sanathuoh lo!

²⁶ Jüma tsotho vü ma jikhi nüh azhih saküüzhüh, thitü ma nüh phrahteke küsa thuoüji, “Hi nüh küzhüh lehü naveh thi azhih mpa küüzhüh nyu nü thajüwu nga küzhüh naveh,” ti küza.

²⁷Azhü “Küsükeri küzhühlehü naveh” ta küsawa tü saküsari tü küzhühjamü naveh thi vijamü naveh, jüta thuoüji zanyomüküzhühjara nüh pehküvehri thuoüji jü üta pehtewa nathuoh.

²⁸Jükenüh hiri kürü kümünatsü sheh luo, küpakenühnyunü kajipe müküüzhühjarawa hiri tü ngukümüthuoh kenüh. Hiri kürü Saküüwuowa kümünatsü sheh thi ma külo küsara lekhuji vünüh ma khuhrü thi krü nü ma kükhuvü rho thi küsiake vi ma tsüluo,

²⁹ küpakenühnyunü Saküüwuowa thuoüji anyih zanyo küzorierawa kümüjie wiethuoh.