Read Pochuri Naga EBRIRI 2 Bible Online

EBRIRI 2 - Pochuri Naga bible

EBRIRI 2

¹Jükenüh hiri nüh küzhütsa küna küsawa kümükhra nüh müküjehphokeji mümühie, jüüta thuoüji hiri tü mürateküwa wanyu.

²Rügizhühleri nüh zhühlewa hiri lahnyiri vü kütsü zhütsata küsa thi thari nüh jüma mümüzhe nüh samü nyutü müküna nüh sakümü vünüh kümnomna ngu thuoüji,

³hiri nüh küülole jüma kulemü thuoüji mokümjie tera nalo? VÜWA ma mpa nüh küülole hama küthsü tsü khu, thi thari nüh künara nüh jüma tü azhütsa ta hiri vü nga küza tsü.

⁴Thi Saküüwuowa nga ma müshe vünüh küngoküüro thi küükrükükra thi kükhra küpapa thi Kümtse Sietse kütsiari vi mari thsephetsü.

⁵Saküüwuowa tü rügizhühleri vi ru na saküveh azhih kürüthe hiri nüh phrate küvehwa vü aküji küüsa müsa.

⁶Jütanyu nü, Zhütsa lasi wuori vü: O Saküüwuowa, anyiwa tü thawa nü noh tü ma kenüh müshe vehlo? Nyutü nyitsawa, noh tü ma kenüh mowa tsaza veh lo?

⁷Noh nüh rügizhühleri kükhu vünüh tsotho pike ma saküza sa veh; noh nüh küthohla thi küsiake vi ma kajilüwe samütüthuoh,

⁸thi ma tü zanyo aveh nyia takrüwa küüsamüthuoh. “Saküüwuowa nüh nyiwa tü zanyo aveh nyia takrü küüsamüthuoh,” ta küza saveh; hamatü zanyo aveh chieke sa veh. Jütawie ketünga khinyi thuoüji anyiwa nüh zanyo aveh takrüsaküveh müngu.

⁹Thitü Jisu tü küsükeri rügizhühleri kükhu vünüh saküzakümü ngu, jüüta küsa vünüh Saküüwuowa küümze vünüh nyiri aveh kenüh müsüji mümühie. Ma nüh münomünanü küsü vünüh khinyi thuoüji ma tü küthohla thi küsiakevi ma kajilüwe samüthuoh.

¹⁰Saküüwuowa zanyo aveh küsawa thi zanyo aveh küji küpehwa, matsa hozake sieru tholathovü wa sieküsuo na küsa kenüh Jisu tü kümnomna vünüh jura na küsa ma mütho wiethuoh küsa kenüh. Küpakenühnyunü Jisu tü, mari sie küülole vü küruwa küsakenüh.

¹¹Nyiri kükhiemuo vünüh ma nüh sakümtse tsü veh, thi ma thi sakümtse küsari aveh tü Pa zarike. Jükenüh Jisu nüh mari tü ma füri ta küji müzükrü.

¹² Ma nüh Saküüwuowa vü: “Noh nüh mowa sanüh hi nüh eh füri vü küza naveh; mari mütuküveh vü hi nüh noh siake naveh,” ta küza.

¹³ Ma nüh küüzale, “Hi nüh e kütsotüwa Saküüwuowa vü thsenaveh.” Ma nüh küüzale, “Saküüwuowa nüh hi kütsü atsarisie hi tü hala pehveh,” ti küza.

¹⁴Atsari ta ma nüh küjiri tü asa thi azüh anyiri küsa kenüh, Jisu tü ma mpa mari kümüjie sanü mari sie anyiri kürhowanyi vi. Ma nüh hama küsa thuoüji ma küsü vünüh Tsuore zorie nta küsa kenüh wie, ma tü aküsü nyia kükhra pehveh,

¹⁵hakümjie küsa vünüh aküsü kükrü kenüh mari kürho aveh aküsi sakütseri lejatsü.

¹⁶ Küpakenühnyunü jümatü rügizhühleri nüh mükükra ta küsa thsütohveh. Jütanyu nü, zhütsazhü nüh, “Ma nüh Abraham küshukürari kükratsü,” ta küza.

¹⁷Hama mazhühnyo thuoüji zanyo aveh vü ma tü ma füri kümüjie müsaji mümühie; jümatü ma tü Saküüwuowa küürosakütsevü küzhütsa thi küümzetsah mari Levü Kümüsiewa sana küsa kenüh, jüütathuoüji nyira kükhiemuo tü nojaranaveh.

¹⁸Thi khinyi thuoüji thari nüh müjimüramüthuoh ünüh ma nüh kükrara naveh, küpakenühnyunü ma wie nga müjimüra thi kümnomna kenüh.