Read Pochuri Naga EBRIRI 4 Bible Online

EBRIRI 4 - Pochuri Naga bible

EBRIRI 4

¹Hiri nüh kümünyie ngura naküsa kenüh Saküüwuowa nüh hiri vü phrateke tsü saveh. Jükenüh küzake küsa kümünyiewa nohri nyi küsü nga müküngu müsanüh sana küsa kenüh hiri aveh azhüzhüluo.

²Küpakenühnyunü mari kümüjie hiri tü Zhühthe Kümühiewa künarathuoh. Mari tü zhühlewa thsürathuoh thitü jümatü mari kenüh zanyoküsü nga kümühie samütsü, küpakenühnyunü mari nüh küünara vü mari tü kütsotü vünüh jüma müvi.

³ Hiri thari nüh tsotü nüh Saküüwuowa nüh zhüthuo küsa kümünyiewa hiri zhi sa. Ma nüh küüza kümüjie: Hi tü arüshu thi hi nüh müzü: “Hi nüh mari kümünyie kenüh azhih tsüküsawa vü piketü mari tü mütura,” ta küza. Azhih küsa vünüh ma küürowa tü jumthuoh ketünga ma nüh hama küza.

⁴ Küpakenühnyunü Zhütsazhü wuori vü rülo türüawa hama phratesa veh: “Saküüwuowa tü ma küüro aveh sajukümü sevü rülo türüawa münyie,” ta küza saveh.

⁵Zhühnyo hamatü küphratelehü sa: Hi nüh mari kümünyie nta azhih tsüküsawa vü mari tü piketü mütura.

⁶Zhühthe Kümühiewa küüna khuri tü kümünyie jüma müngu, küpakenühnyunü mari nüh mütsotü nüh samü. Jükenüh anyiküpari küüngumü.

⁷Saküüwuowa nüh rülo küpa “Nosü” ta küsa küzhütsawa hama nüh küthsütsü. Mavi hozake ase vünüh ma nüh David vünüh phrate, zhütsazhü nüh küüzale: “Mükütüküzü nosü noh nüh Saküüwuowa zhü künara thuoüji, luoveh mükhotümü luo,” ta küza.

⁸Mükütüküzü Saküüwuowa nüh phrateke küsa kümünyiewa Joshua nüh nyiri vü tsümüthuoüji, Saküüwuowa tü ase vü rülo küpa vünüh küüzawanyu.

⁹Jükümjie, jütawie ketünga Saküüwuowa nüh rülo türüawa kümünyie kümüjie Saküüwuowa nyiri tü kümünyie pehwie veh.

¹⁰ Küpakenühnyunü thari nüh Saküüwuowa nüh phrateke küsa kümünyie jüma ngu thuoh ünüh Saküüwuowa nüh ma küüro vünüh kümünyie kümüjie ma nga ma küüro vünüh münyie naveh.

¹¹Jükenüh kümünyie jüma ngu na küsa kenüh kümükhra nüh sanüh raluo, jüta thuoüji mari nüh kütsotü küzüla kenüh müsara nüh sakümü kümüjie hiri nyi küsü nga küsawa nyu.

¹²Saküüwuowa zhü thuoüji rhoveh thi khra shehmü, anyusuo awuowuo nyia vünüh tumü. Akürho thi sietse masü azhie vünga satü, akhekhe thi arüjoh masü azhie vü nga satü rehkhuo wawati. Jümatü anyiri luoveh kümüngu thi kümüshe nga thsürarati.

¹³Saküüwuowa atü vünüh zanyoküsü nga küüthira münyie; saküsa zanyo aveh ma notha vü saküja thi ngu mütsemüra pehwieveh. Thi hiri aveh tü ma tüvü hiri mpa hiri khukewa tsünaveh.

¹⁴Jükenüh hiri tü hiri nüh phrate kütse kütsotüwa küjephokeünüh raluo. Küpakenühnyunü hiri tü Levü küji Kümüsieküsü tewa Saküüwuowa atüvü pehveh, thi jümatü Jisu, Saküüwuowa Tsa.

¹⁵Hiri Levü Kümüsiewa tü hiri mükükhravü arütha mükünatü jümawa nyu. Jütanyu nü hiri nüh Levü Kümüsie küsüpehküvehwa thuoüji hiri kümüjie ma tü lekhuji aveh vü müji müra, thitü kükhiemuo müsa.

¹⁶Jükenüh hiri tü luoveh ji nü küümze pehküveh Saküüwuowa kajipe vü shenyi wa ünüh raluo. Hiri nüh müviji mükümühie vü hiri kükhra na küsa kenüh jüla hiri küümze vira naveh.