Read Pochuri Naga EBRIRI 7 Bible Online

EBRIRI 7 - Pochuri Naga bible

EBRIRI 7

¹Melkhizedek hamatü Salem vü kajiwa thi Kümüsietsa Saküüwuowa levü küsü wiethuoh. Abraham nüh kajiri müzüchara nü arie vünüh shele küru vü Melkhizedek tü ma mütu thi tsia ma tsü,

²thi Abraham tü ma nüh küvira aveh küüsuo türake sanü küsü ma tsü, (Melkhizedek nyo zhühnyo pokhuwa thuoüji “Künyitsa Kajiwa,” küpakenühnyunü ma nüh Salem vü kajiwa küsathuoh kenüh, ma nyo nga “Künyitsa Kajiwa,” ta ji).

³Melkhizedek apa nyutü aza nyutü ma lahnyiri zhühku rhüküsaküsü nga münyie; ma küwuo nyutü ma küsü zhühku küsü nga münyie. Ma thuoüji Saküüwuowa Tsa kümüjie wiethuoh; ma tü küsuokürho levü küsü wiethuoh.

⁴Ma tü küzake ji nüh nono nyi nü. Abraham hiri küthohla anyiwa tü arie vünüh küngura aveh küüsuo türake sanü küsü ma tsü.

⁵ Levü küshuküra levüri wie nga Israelri vünüh küüsuo türake sanü küsü vizhuh üta Khonyo vünüh azhütsü, jümatü ma mpa ma nyiri vünüh ma mpa ma nyiri wie nga Abraham küshuküra ketünga jüma küüsa.

⁶Melkhizedek tü Levü küshuküra nyu, Abraham tü Saküüwuowa vünüh küzhühthuoh küngu anyi wie ketünga Melkhizedek tü Abraham vünüh küüsuo türake sanü küsü vi nü tsia matsü.

⁷Jümatü künyitoh wiethuohnü tsiakütsüwa tü akütsia künguwanyia vünüh küüji.

⁸Leviri rühle vü thuoüji küüsuo türake sanü küsüthuoüji aküsüri nüh vizhuh; thitü Melkhizedek kenüh thuoüji zhütsazhü nüh küüza kümüjie rhoküvehri nüh vizhuh.

⁹Thi jükenüh küza nta thuoüji Abraham nüh küüsuo türake sanü küsü kütsü vü, Levi, (Küüsuo türake sanü küsüküvi) nga jüma tsü.

¹⁰Küpakenühnyunü Levi tü müjie wuo ketünga Melkhizedek nüh makümütuvü ma nyi Abraham satsa vü pehvehthuoh.

¹¹Levi vü levü küsa vü Khonyo thuoüji Israel nyiri vü tsü. Leviri nüh levü küüro küsa tü mühieju müthuoüji mokenüh Aron mükünyu levü küpa Melkhizedek küru lo?

¹²Küpakenühnyunü levü küsawa khaphrümü ünü khonyo vü nga mükhaphrüji mükümühie teru.

¹³Thi hiri VÜWA, ma zhühku phrateküruwa thuoüji akuoh küpa, thi ma kuo vünüh nyi küsü nga levü küüro müjie sa wie.

¹⁴Jümatü küthsütoh thuohnü ma tü Judah kuo anyi vünüh wuo; thi Mosa nüh levüri küphratevü akuoh hama thuoüji küphrate müsa.

¹⁵Melkhizedek kümüjie küsa levü küpa küsü ru ta küsazhühnyowa tü küthsütohra pehveh.

¹⁶Ma tü nyiri nüh küsa wule thi nyiri kürho rühle vünüh levü müsanü sehkhe mükünyie kürho kükhra vünüh küsawie.

¹⁷ Küpakenühnyunü zhütsazhü nüh, “Melkhizedek müthoh vünüh noh tü küsuokürho levü küüsanaveh,” ta küza saveh.

¹⁸Jükenüh wule kürüwiwa tü mükümüzho thi mükümühie kenüh chiekemüthuoh.

¹⁹Küpakenühnyunü Mosa Khonyowa tü zanyoküsü nga samükümühiejura nüh samü. Thitü khinyi thuoüji küluozhe kümphawa tsümüthuoh, jümawa vünüh hiri tü Saküüwuowa shehnyi rurathuoh.

²⁰Jüma nyia vü nga Saküüwuowa küüshiezhü nga pehveh. Küpakenühnyunü levü küsavü jükümjie küsa küüshie zhümünyie.

²¹ Thitü Jisu tü küüshie vünüh levü sa, Saküüwuowa nüh mavü, VÜWA nüh küshie saveh, thi ma tü ma müshe kükhaphrüwanyu; “Noh tü küsuokürho levü küsü sanaveh,” ta küza saveh.

²²Hama nüh Jisu tü kütsathuoh kümühiewa ta saküthsütohra.

²³Atükhu vü levüri tü zhi shemü, küpakenühnyunü mari tü sütewakhe taji mari küüro vü samüwalera nüh küsa kenüh.

²⁴Thitü Jisu thuoüji küsuokürho rho, thi ma levü küsawa tü küzhiluo küpari vü müwa.

²⁵Jükenüh ma tü küsarawa, khinyi nga thi tsotho aveh vü nga ma vünüh Saküüwuowa vü küruri külole nta, küpakenühnyunü makeri’a nüh Saküüwuowa vü zhieke zhiekhri nta küsuokürho rhoküveh kenüh.

²⁶Jükenüh Jisu tü Levü Kümüsie hiri nüh müviji mükümühieri sakütsüwa. Ma thuoüji mütse; ma thuoüji mavü müküle nyutü kükhiemuo münyie; ma thuoüji kükhiemuori vünüh saküpamüthuoh thi thajüwuri nyia vü vitekuothuoh.

²⁷Ma thuoüji levü kümüsie küpari üta nyu; ma tü apokhu sa mampa ma kükhiemuo kenüh rülorülo küsahthuoh münyiethuoh thi nyiri kükhiemuo kenüh küsahthuoh münyiethuoh. Ma nüh küsahthuo küsü sathuoh, thi jüma thuoüji ma mpa ma satsa kütsü vünüh küsükeri nüh aveh kenüh satsümüthuoh.

²⁸Mosa Khonyowa thuoüji anyi müküjuri vi levü kümüsie küüsasati; thitü Saküüwuowa nüh küzhühthuoh thuoüji küüshie vünüh sasaveh, thi jümatü Khonyo se vünüh ru thi jüma nüh Tsawa rüka, jüma nüh küsuokürho saküjutsüthuoh.