Read Pochuri Naga JEMS 4 Bible Online

JEMS 4 - Pochuri Naga bible

JEMS 4

¹Nohri azhie vü küsaluo thi küüraluo ru veh ülo? Jümari tü nohri kümüngu vünüh ru veh, jümari tü nohri lo vünüh saluopeh huoveh.

²Noh tü zanyo vingümü, thitü noh tü jümari müngura nüh samü, jükenüh nyuri fethe veh; noh tü zanyo müngu sheh veh, thitü noh tü jümari müngura nüh samü, jükenüh nohri tü küraluo thi feluo veh. Nohri tü nohri nüh küvingüri nguramüveh, küpakenühnyunü nohri nüh Saküüwuowa vü jümari khuomüveh.

³Thi nohri nüh kükhuo vü nohri tü jüma nguramüveh, küpakenühnyunü nohri luoveh tü mümütse; nohri mpa nüh nohri loküzhe sa nta zanyo kükhuo wie.

⁴Mükünyitsa zhütsa nyiri! Azhih hama afü sana küsanü Saküüwuowa mükünongüri wiethuoh ta küsa müthsü ülo? Thari nüh azhihwa afü sie sangü veh nüh ma thuoh üji Saküüwuowa mükünongü wiethuoh.

⁵Zhütsazhü vü küzhütsa münyie ti mümüshetümü, zhütsazhü nüh küüza, “Saküüwuowa nüh sietse hiri lovü thsekümüwa nüh noküüjizhi müshe veh ülo?” ti küza.

⁶Thitü Saküüwuowa nüh küümze kütsüwa nü müzho shehmüwie. Zhütsazhü nüh küüza, “Saküüwuowa thuoüji kürhiezari kule veh, thitü rünyie nü rhokütseri vü küümze tsütsüti,” ti küza.

⁷Jükenüh nohri kürho vi Saküüwuowa kükhu vü thse luo. Sietse Kümüsüwa kule luo, jütathuoüji ma tü no vünüh zhü tewanaveh.

⁸Saküüwuowa vü shehnyi raluo, jütathuoüji ma nüh nosheh nyiru naveh. Nohri kükhiemuori, nohri ke mütsomü luo! Nohri luoveh sakümtse luo, nohri aküthse küsari!

⁹lorü shehluo, luoveh na sheh luo, thi krie luo; nohri küükhrikhaphrü nü kükrie vü thse luo, nohri loküzhe khaphrü nü nyihphamükümüza vü thse luo!

¹⁰VÜWA tüvü nohri kürho sakürünyie luo, jütathuoüji ma nüh nohri khaketsü naveh.

¹¹Eh füri, nohri küsü nüh küsü phrahtemükümüsü tümü. Thari nüh afü Khristanyiri küjo naveh nüh nyutü phramüsünaveh nüh Khonyowa küjoveh thi phramüsü veh. Mükütüküzü noh nüh Khonyowa küjo thuoüji noh tü Khonyo zhüküna müvehthuohnü jüma küüjorithuoh.

¹²Saküüwuowa mpa nüh khonyo kütsüwa thi müsheküümüsüwa. Ma mpa nüh külolera naveh thi zothera naveh. Noh mpa noh füri küjo nü noh tü thawa ti müshe veh lo?

¹³ Eh zhü künaluo, nohri tü “Nosü nyutü thuohtü hiri tüküzehtse nyuküji vü wa naveh, hiri tü jüla mahvi küsü pehnü asü sanü pesa hozake küphara sanaveh,” ti küza.

¹⁴Nohri kürho tü thuohtü mowa sanaveh nüh müthsü! Nohri kürhotü nyikhu krüru nü tsotho pike peh nü rateküwa kümjiewie.

¹⁵Nohri nüh müphrahteji mükümühie thuoüji hama: “Mükütüküzü VÜWA kümüshe thuoüji hama, hiri tü rho taji zanyo hama luoma sanaveh,” ta küzaza ti.

¹⁶Thitü nohri tü rhieza thi kuotimü; kükuoti jümari aveh tü müküle.

¹⁷Nyi küsüküsü nga zanyokümühie küsaleh tü müsanüh sathuoüji ma tü müküleh sanü khiemuomüthuoh.