Read Pochuri Naga JEMS 5 Bible Online

JEMS 5 - Pochuri Naga bible

JEMS 5

¹Nohri nyirhieri, eh zhü künaluo! Nohri vü kümnomna kütsewakenüh lorü thi zia nü krie luo.

² Nohri künyirhie tü mitewathuoh thi nohri thsümünyi tü amükhra nüh tsamüthuoh.

³Nohri suna thi rakari tü awuozüh nüh ka khehmüthuoh, thi awuozüh hama nüh nohri küüjo povü thi anyih kümüjie nohri satsa tsamü naveh. Nohri tü ru sehkhe vünüh nohri künyirhie vizhuh savehthuoh.

⁴ Nohri tü nohri zhuh vü küürori vü ake küsü nga müjietsüwie. Mari nüh lokhu küveh künaluo! Noh zhuh vü wakümawietüra kükriekhi tü wa Saküüwuowa, VÜWA Kükhratsahwavü juvehthuoh.

⁵Azhih hala nohri kürho tü rho lokürü thi külozhe mpa nüh promü. Nohri küfethe rülo kenüh nohri tü nohri mpa nohri saküjivehthuoh.

⁶Nohri tü künyitsari müküchie sa thi mari fethemüthuoh, thitü mari tü nohri mükule.

⁷Jükenüh eh füri, VÜWA müjie küru küju küzhikezhikhri luo. Zhuhküürotsari nüh ma luoshü tü avi küsie pe nathuoh nta küzhike nü kühuo thsüluo. Ma tü küzhike nü marakhu thi pasü tsokürü huohuoti.

⁸Nohri nga müküzhikeji mümühie. Nohri küluozhe tü müsia luo, küpakenühnyunü VÜWA küru rülo tü shehnyi müthuoh.

⁹Eh füri, küsü nüh küsü vü küjakhujazhi müsatümü, jüütathuoüji Saküüwuowa nüh nohri müshekümüsüwa nyu. Nohri küünawa tü shehnyi sheh vehthuoh, nohri atüvü teru nasavehthuoh.

¹⁰Eh füri, VÜWA nyo vünüh küphrahte setsaküthsüri müsheluo. Mari nüh kümnomna vünüh küzhikezhikhri thsoshi müshenü nohri nga küzhike luo.

¹¹Mari nüh küüzhike zhikhri kenüh hiri nüh mari tü loküzheri ta ji veh. Nohri nüh Job küüzhikezhikhri künarathuoh, thi sehkhevü VÜWA nüh ma kenüh mowa tsü nüh nohri nüh thsüveh. Küpakenühnyunü VÜWA tü Küümüze thi künyiawa nüh pro.

¹² Eh füri pehkhewie ketünga nohri küüshie zhü müphratümü. Thajüwu vi müküshietümü, nyutü azhih nga müküsietümü. Ah thuoüji ah ti sa, thi nyu thuoüji nyu ti küsa mpa nüh saluo, jüütathuoüji noh tü Saküüwuowa ashih küsa vü küruwa nyuthuoh.

¹³Nohri azhie vü nyi wuori münomünaveh ülo Ma kükhuo müsajimümühie. Nyi wuori lozhe veh ülo Ma tü küsiake zahri müsajimümühie.

¹⁴ Nyi wuori naveh ülo? Nazizheh vü kükhruori ji nü mari nühVÜWA nyo vünüh kükhuo küüsa thi Olive vüjuh vi mari künetsüluo,

¹⁵tsotü nü kükhuo hama nüh künari sakümühiera naveh; VÜWAnüh ma satsa sakümühie tsü naveh, thi kükhiemuo ma nüh sakümüwa nojatsü naveh.

¹⁶Jükenüh küsü nüh küsü tüvü kükhiemuo phrahzhu luo thi küsü nüh küsü kenüh kükhuo saluo, jütathuoüji noh tü mühiera naveh. Künyitsara kükhuo thuoüji zanyo küji sara veh.

¹⁷Elijah tü hiri kümüjie wie. Ma nüh atsomükürü nti küsakenüh ma müshe thse nü khuo, thinü mavi küche nü küzhila atso tsuomüru nüh sa.

¹⁸ Thitü ma nüh kükhuo sa le ünü thajüwu vünüh atso rürunü azhihwa tü ma vi pera le.

¹⁹Eh füri, nohri wuori küzhütsa vünüh ase vü sühle tewa nü nyi wuori nüh ma sie sheleru thuoüji,

²⁰hama müsheluo: thari nüh kükhiemuo lekhuji kümüsü vünüh sie shele ru naveh nüh küsü vünüh ma sietse küloletsüthuoh thi kükhiemuo hozake noküja vü sierura naveh.