Read Pochuri Naga 1 PITOR 3 Bible Online

1 PITOR 3 - Pochuri Naga bible

1 PITOR 3

¹Jükümjie nohri vüvühri tü nohri vüpari kükhu vü müpehüji mümühie, jüütathuoüji mari wuori nüh Saküüwuowa zhümüküna nüh sawie ketünga thi nohri nüh azhü küsü nga müküzawie ketünga nohri khukewa nüh mari sie kütsotü vü ruranaveh,

²küpakenühnyunü nohri khuke tü küzake mütse thi siake nüh taküsa mari nüh ngu naveh.

³ Zanyo müküzüküzü vi nohri samüküzütümü, jümari tü nohri asheh hie müküzüküzü küsake, nyutü suna aloh ame kükhrarivi küüteh, nyutü thsümünyi, müthehmürie nü küsari vinü küteh mütsetümü.

⁴Jütanyu nü noh küzüwa tü alo vünüh zhütsa küzüwamüsaji mümühie, mükürarah küzü khuke kürünyiwa thi mükürhiezari vi nohri küteh luo, jümari tü Saküüwuowa atüvü ame kükhratsahwa wiethuoh.

⁵Küpakenühnyunü khanavü akürho vi VÜWA tsü nü Saküüwuowa vü luozhe küruri wienga mari kürho vi avüpari kükhu vü thsenü zü ru.

⁶ Sarah nga jükümjie wie; ma tü Abraham zhüküna thi ma vi mavüwa ta ji. Nohri nüh zanyokümühie sa thi nohri nüh zanyokümüsünga mükrü thuoüji nohri khinyi tü ma tsehvüriwiethuoh.

⁷Jükümjie nohri vüpari wienga avüvühri tü akükhra küzülari ta küsa amüshe kümühie ta thsüluo taji vüvühri sierholuo. Küsiake vi mari tsüluo, küpakenühnyunü Saküüwuowa nüh akürho thi aküte kütsüwa mari nga nohri siengu na saküveh kenüh. Hama saluo, jütathuoüji nohri kükhuowatü zanyoküsü nga nüh saküüjakünyawa nyu.

⁸Sekhe zhü thuoüji: nohri aveh kürü müshe küsü sa thi kürüluoveh küsü saluo; ajienü kümüjie küsü nüh küsü vü mühie thi rünyie luo.

⁹Nohri vü kümüsü sawie ketünga shewi müsa letümü nyutü nyuri nüh nohri müzüwie nga nyuri mümüzüle tümü; jüütanyu nü akütsiawa phratsü le luo, küpakenühnyunü kütsiawatü Saküüwuowa nüh nohri küji vü nohri tsü nta phrahteke saküveh kenüh.

¹⁰Zhütsazhü nüh küüza kümüjie, “Küsüküsü nga akürho vi lozhe ngü veh üji, thi tsotho kümühie ngu ngü veh üji, zhükümüsü küphrahte vünüh khetemü luo, thi zhükürieri lemü luo.

¹¹Ma tü kümüsü vünüh kürelewa zanyokümühie müsajimümühie; ma tü luoveh aveh vi kürükümühiewa mphah üji mümühie.

¹²Küpakenühnyunü VÜWA notha tü künyitsari nyia vü no küvehkenüh thi mari kükhuo küna küveh kenüh; thitü kümüsü küsari vü thuoüji sie küproluo tse wieveh,” ta küza saveh.

¹³Noh nüh zanyokümühie satse thuoüji thawa nüh no sakümüsüna lo?

¹⁴ Thitü noh nüh zanyokümühie sakütse kenüh nyuri nüh sakümnomna tse thuoüji noh tü küzakele nga lozhe lo! Mari nyiküsü nga mükrütümü thi mütsazatümü.

¹⁵Thitü nohri luoveh lo vünüh Khrista siakeluo, thi ma tü VÜWAti anyo kümühie vi ma tsüluo. Küluozhe nohri vü pehküvehwa anyi küsüküsü vü nga rüle tsüwie na ti tsotho aveh vü küche luo,

¹⁶thitü jüma kürünyi vünüh thi küsiake vünüh saluo. Noh kümüshewa tü mütsa peh huo luo, jütathuoüji noh nüh khukekümühie sanü Khrista se nyimüzhe kütsevü müküchie sanü phraküümüsü vü mari nüh mowa phrahte nüh jüma kenüh mari mpa zükrü naveh.

¹⁷Küpakenühnyunü Saküüwuowa kümüshe thuoüji zanyokümüsüsana küsanü zanyokümühie sanü kümnomna kümpha.

¹⁸Küpakenühnyunü Khrista nüh kükhiemuo kenüh küsükeri vünüh aveh kenüh sümüthuoh, Saküüwuowa vü siewa na küsa kenüh anyikümühieri küsü nüh kükhiemuori müthoh vünüh sümütüthuoh. Ma tü satsa thuoüji küsümü thitü sietse vü thuoüji sakürhomü,

¹⁹thi ma nüh sietse kürho vünüh küsizhe vü küpehri vü wa sosie.

²⁰ Sietse hamari tü Saküüwuowa zhü müküünari, Noah nüh ma juhie saküveh rülo küju nü ma tü küzhikewie. Juhie lovü anyi pike küpeh mari tüze thuoüji aju vünüh külole,

²¹hama tü baptis küsa thsoshi, jüma nüh khinyi nohri külole savehthuoh. Jümatü satsa mükümtse phrühküja nyu, thitü amüshe kümühie vünüh Saküüwuowa vü zhühthuo küsa. Jümatü Jisu Khrista Kürhole vünüh no külole veh,

²²ma tü thajüwu vü tewathuoh thi Saküüwuowa azhie wuovü tewapehvehthuoh, rügizhühleri thi thajüwu vü kükhra küviri thi kümüzhori aveh nyia vü kaji vehthuoh.