Read Pochuri Naga 2 PITOR 3 Bible Online

2 PITOR 3 - Pochuri Naga bible

2 PITOR 3

¹Küümüze eh füri, hi nüh lasi rhü nohri kütsü ha akünyiawa thuoh. Lasi kürhü künyikhürü vü nga nohri luoveh vü amüshe kümtse küthotsü nti azhü hamari vi nohri müshe küthetsü küvehwie.

²Hi nüh nohri tü khana teküwa tsotho vünüh sietsaküthsü kümtseri nü azhü phrateke küsari thi VÜWA thi Küülolewa vünüh nohri povü küsari nüh nohri vü azhü tsüküsawa küümüshenthe.

³ Pokhuwa thuoüji, nosü sekhe tsotho vü anyi wuori nüh mari mpa mari kümünguwa nüh khete nü runaveh ta küsa nohri müthsüji mümühie. Mari nüh nohri riesa,

⁴thi, “Ma nüh runa ta zhühthuo mütsülo? Eh pari tü sütewakhethuoh, thitü azhi küsakhu vünüh nosü küju zarikewie, ma tü khiela pevehlo,” ta küna naveh.

⁵ Mari tü thsüto taji khana vü Saküüwuowa nüh azhü kütsüwa müküchie samü, thi thajüwuri thi azhi tü sathuoh. Azhi tü aju vünüh sazhu thi aju nüh sa.

⁶ Thi aju nüh jüküji sanü azhih kürüwiwa tü zoriem.

⁷Thitü thajüwu tü azhi künyi peküveh thuoüji anyi nü zorie nta Saküüwuowa zhü khana vü nüh saveh. Azhih jüma tü mükütsotüri ashih santi zorie nta küsa rülo kenüh saveh.

⁸ Thitü küümze eh füri, zanyo küsü müküma tümü! VÜWA tüvü thuoüji rülo küsü thi mavi küsü masü zarike; mavü thuoüji masükhürü zarikewie.

⁹Nyi wuori nüh kümüshe kümüjie VÜWA thuoüji ma nüh phrateke küsawa sana küsa mümünü. Jüta nyunü mathuoüji nohri sie küzhikeveh, küpakenühnyunü mathuoüji nyiküsü nga müküzorie ngü, ma thuoüji anyiri aveh nga mari kükhiemuo vünüh küshele ngüveh.

¹⁰ Thitü VÜWA rülo thuoüji kürühuri kümüjie runaveh. Jürülo vü thajüwu tü ajikhi zia nü ratewa nathuoh, sawutsiri tü tsuotsam naveh, thi zoriem naveh, thi azhi tü ma rügi vü küperi aveh ramü naveh.

¹¹Zanyo hamari aveh tü hakümjie vünüh zoriena saveh ji noh tü anyi mokümjie küsari müsaji mümühielo? Nohri kürho tü mütse thi Saküüwuowa wuovü sakümtse nü mütsüji mümümhie.

¹²Nohri nüh Saküüwuowa rülowa huoküveh kümüjie thi jüma shita küüro nohri kükhra thseküveh kümüjie, rülo jümatü thajüwuri tsom thi zoriem, thi thajüwu zhiri tü aküsa nüh saküliemü naveh.

¹³ Thitü hiri thuoüji Saküüwuowa nü phrateke küsa: kürüthe thajüwuri thi azhih kürüthe künyitsari nüh azhe sa nta huoküvehwa huoveh.

¹⁴Thi jükenüh eh füri, nohri nüh rülo jüma huoküveh kümjie mütsena küsa thi Saküüwuowa atüvü müküle mükünyie thi ma sie luoveh rünyi nü pehna küsa wurie luo,

¹⁵VÜWA nüh nohri külole nta ma luoveh küzhikenüh peküveh noluo, Saküüwuowa nüh kümütsa tsünü hiri küümze afüwa Paul nüh nohri vü rhükütsü kümjie VÜWA nüh nohri külole nta ma luoveh küzhike nü pehküveh noluo.

¹⁶Ma nüh kürhü aveh loso vü ma lasi vü kürhü kümüjie. Ma lasi vü zanyo kükho wuori zanyo kümtseri thi luoveh tohm ta san mükütseri nüh rie nü phrateveh, mari nüh zhütsazhü rüle küpa vi nü küsa kümüjie. Jükenüh mari mpa mari küzorie viruveh.

¹⁷Thitü nohri eh füri nü hama thsümthuoh. Jükenüh nohri mpa azhüzhü peluo, jüta thuoüji müküle küsosie wule müküvi nyiri nüh nohri sieteküwa wanyu, thi nohri küülole pe vünüh küüluwanyu.

¹⁸Nohri küümze vü thi hiri VÜWA thi küülolewa Jisu Khrista vü mükütuotü ji waluo. Khinyi nga thi küsuokürho ma tü kütholathovüwa saluo! Amen.