Read Pochuri Naga 1 JOHAN 4 Bible Online

1 JOHAN 4 - Pochuri Naga bible

1 JOHAN 4

¹Küümüze, eh füri, Sietse pehveh ta küsari aveh mütsotü tümü, thitü sietsewa tü Saküüwuowa vünüh ru ünü mota nüh müte noluo. Küpakenühnyunü küzhüja setsaküthsüri tü azhie aveh vü kuoküwathuoh kenüh.

²Hakümjie vünüh nohri tü Saküüwuowa Sietse ünü nyu nüh ta küsa thsüra naveh: thawa nüh Jisu Khrista tü nyiri kürhokhuke vünüh ru ta küsa phrahte naveh nüh ma thuoüji Saküüwuowa vünüh küru Sietsewa pehvehthuoh.

³Thitü nyi küsüküsü nga Jisu zhühku hama kükuleri thuoüji Saküüwuowa vünüh küru Sietsewa pehmüveh. Ma nüh sietse pehküvehwa thuoüji Khrista Mükünongüwa vünüh küngura; jümatü ru naveh ta nohri nüh künara, thi jümatü khinyi azhih hala pehvehthuoh.

⁴Thitü eh tsari nohri tü Saküüwuowa zhi, thi küzhühja setsaküthsüri charathuoh, küpakenühnyunü Sietse nohri vü küpehwa thuoüji azhih nyiri nüh pehküveh sietsewa nyia vünüh khra sheh veh.

⁵Setsaküthsü jümari tü azhih zhiri phrahtetseveh, thi azhih watü mari zhü küna tseveh, küpakenühnyunü mari tü azhihwa zhiküsa kenüh.

⁶Thitü hiri thuoüji Saküüwuowa zhi küsa kenüh. Thari nüh Saküüwuowa thsüveh ünüh hiri zhü künaveh; mari thuoüji ehzhüri müküna. Jükenüh hakümjie vünüh Sietse küzhütsawathi Sietse mükülehwa thsüküpara veh.

⁷Küümüze füri, küsü nüh küsü kümüze luo, küpakenühnyunü küümze tü Saküüwuowa vünüh ru küveh kenüh. Thari nüh küümze pehveh ünüh Saküüwuowa tsawiethuoh thi Saküüwuowa thsüveh.

⁸Thari nüh küümze münyie nüh ma thuoüji Saküüwuowa thsümüveh, küpakenühnyunü Saküüwuowa thuoüji küümze kenüh.

⁹Thi Saküüwuowa nüh Ma Tsa azhih hala küze nü küümzewa hiri vü kütsa, jüüta thuoüji hiri tü ma vünüh rhora naveh.

¹⁰Küümüze tü hama: hiri nüh ma mükümüze nü ma nüh hiri kümüze nü ma Tsa küze, thi ma vünüh hiri kükhiemuowa nojamüthuoh.

¹¹Küümüze füri, Saküüwuowa nüh hakümjie vünüh hiri kümüzeveh üji hiri tü küsü nüh küsü küümze leh.

¹²Nyi küsü nga Saküüwuowa müjiengu, thitü hiri nüh küsünüh küsü kümüze thuoüji Saküüwuowa thuoüji hiri sieküsü sanü rho veh, thi ma küümzewa tü hiri vünüh sajuraveh.

¹³Hiri tü Saküüwuowa sie küsü sanü rhoküveh thsütohveh thi jükenüh ma tü hiri sie küsü sa rho veh, küpakenühnyunü ma Sietse vi hiri tsümüthuoh.

¹⁴Thi hiri nüh ngumüthuoh thi azhih küülolewa küüsa nta küsakenüh Pawa nüh ma Tsa küze ta küsa hiri nüh nyuri vü phrahte veh.

¹⁵Thawa nüh Jisu tü Saküüwuowa Tsa ta phrahtezhuveh nüh mathuoüji Saküüwuowa sie küsü sanü rhoveh thi Saküüwuowa nga ma sie küsü sanü rhoveh.

¹⁶Hiri mpa wienga nüh thsüveh thi hiri kenüh Saküüwuowa nüh küümze saküvehwa tsotüveh. Saküüwuowa thuoüji kümüze veh, thi thari nüh küümze vü pehveh nüh ma thuoüji Saküüwuowa sie küsü sanü rhoveh, thi Saküüwuowa nga ma sie küsü sanü rhoveh.

¹⁷Ashihküsa Rülo vü hiri luoveh ji na küsa kenüh hiri vünüh küümzewa sajumüthuoh; thi hiri nüh jüma vi naveh, küpakenühnyunü azhih hala hiri kürho tü Khrista kürhokümüjie wie.

¹⁸Küümüze vü kükrü küsü nga münyie; küümzetsahwa thuoüji kükrü aveh zhejaraveh. Jükenüh krükütsewa vünüh küümze tü küsajura münyie, küpakenühnyunü akükrü tü kümnomna vünüh saküveh kenüh.

¹⁹Hiri tü ma kümüzeveh, küpakenühnyunü Saküüwuowa nüh hiri küümzekhu kenüh.

²⁰Mükütüküzü nyi küsü nüh Saküüwuowa kümüzeveh tawie ketünga ma jienü mürhümü thuoüji ma tü akürie. Küpakenühnyunü ma jienü wienga mükümüze thuoüji anotha nüh müküngu Saküüwuowa khiela nüh kümüzerana lo.

²¹Khrista nüh azhü hiri vü tsüküsawa thuoüji hama: thari nüh Saküüwuowa kümüzeveh ünüh ma tü ma jienü nga mükümüzeji mümühie.