Read Pochuri Naga LESARI 1 Bible Online

LESARI 1 - Pochuri Naga bible

LESARI 1

¹Joshua süküm sevü Israel nyiri nüh VÜWA vü, hiri kuoh vü khiemawa nüh pokhu sawa nü Kananri zhe na lo, thi siesaluo na lo? ti küna.

²Thinü VÜWA nüh, “Judah nüh wanaveh; halie, hi nüh azhihwa vi ma ke vü thsemthuoh ünüh,” ti küza.

³Jüti küsa vü Judah nüh ma jie Simeon vü, “Azhih hi vü totsü küsawa vü nyi shuhru luo, jüti sanü hisü Kananri siesaluo naveh; thi hi nga jükümjie azhih noh vü totsü küsawa vü noh vü nyiwa naveh ünüh,” ti küza. Thinü Simeon tü ma vü nyiwa.

⁴Jüti küsa vü Judah tü khru ünü VÜWA nüh Kananri thi Perizri vi ma ke vü thse; thi masü nüh Bezar vünüh mari anyie türake chara.

⁵Mari tü Bezar vü Adonibezek vü ru taji ma sie saluo nü Kananri thi Perizri chara.

⁶Adonibezek thuoüji jozhutewa; thitü mari nüh ma zhewa nü rera taji ma ke tühjü küji künyi thi ma mpha tüjü künyi ti tehthuojamtü.

⁷Thinü Adonibezek nüh, “Ake tüjü küjiwa thi ampha tüji küjiwa tethuo küm kajiri rürake eh shiekütsape rügi vünüh tuohtsa küwari khrütsa pehpehti; hi nüh küsa kümjie Saküüwuowa nüh hi vü nga savehthuoh,” ti küza. Jüti sanü mari nüh ma sie Jerusalem vü ru taji ma tü jüla nüh süm.

⁸Jüsevü Judah kuoh tü Jerusalem siesaluo nü vira, anyuchuwa nüh jüma kürhieriejam nü anyih nüh tsom.

⁹Jüma sevü Judah nyiri tü Kanan vü tsuo nü küzhiho vü küpeh anyu, Negeb thi azhih sajivü kürhori siesaluo.

¹⁰Thi Judah tü Kananri Hebron (tükhuvü Hebron nyo tü Kiriatharba ta ji) vü kürhori siesaluo tewa taji Sheshai, Ahiman thi Talmai chara.

¹¹Jüla nüh mari tü Debir vü küpehri siesaluo. Atühkhuvü Debir nyo tü Kiriatsefer ta ji.

¹²Jüti küsa vü Kaleb nüh, “Thawa nüh Kiriatsefer zhe nü vira naveh ünüh hi nüh eh tsavühwa Aksa tsü taji ma vüvüh küsanaveh,” ti küza.

¹³Thinü Kenaz tsa Othniel, Kaleb anü nüh jüma vira taji ma nüh Aksa ma tsa vühwa ma tsü nü ma vüvüh küsa.

¹⁴Jüti küsa vü nyimzawa nüh ma vü küru vü, ma pa vünüh azhuh küsü khuo üti ma küchü; thi nyimzawa tü ma rawuh rügi vünüh turu, thinü Kaleb nüh ma vü, “Noh kümshe mowa lo?” ti küna.

¹⁵Jüti küüna vü nyimzawa nüh ma vü, “Aküte küsü hi tsü jie; noh nüh hi vi Negeb zhih vü samthuoh nü hi nga juwi juhküshu küsü vi hi tsü jie,” ti khuo. Jüti kükhuovü Kaleb nüh juwi wiethuowa thi lathuowa ti vi ma tsü.

¹⁶Thi Ken küthsoküzhiri, Mosa kuri thuoüji Judah nyiri sie nü aluophi nyujiwa vünüh Judah reza wuovü, jüma tü Arad kütuoh Negeb küpeh vü tewa; thi mari tü jüla wa nü anyi jümari siepehtewa.

¹⁷Thi Judah tü ma jie Simeon sietewa taji Kananri Zefat vü kürhori chara nü jüma zorie kümtsem. Jükenüh anyuji jüma tü Horma ti ji.

¹⁸Judah tü Gaza thi ma zhih, Ashkelon thi ma zhih thi Ekron thi ma zhih ti nga vira.

¹⁹Jüti küsa vü VÜWA nüh Judah tü siekütse sa, thi ma nüh küzhiho vü anyu vi ma zhi sa, thitü ma tü kütake vü küpehri thuoüji zhemjara nüh sam, küpakenühnyunü mari tü amürü rawuhkheka pehküm kenüh.

²⁰Mosa nüh küza küsa üta Hebron tü vi nü Kaleb tsüm thi ma nüh jüla nüh Anak tsa nyimpa küche zhejam.

²¹Thitü Benjamin nyiri tü Jerusalem vü kürho Jebusri zhemja nüh sam; jükenüh nosü küju Jebusri tü Benjamin nyiri sie nü Jerusalem vü rho wieveh.

²²Josef zhehlo nga khru nü Bethel siesaluo; thi VÜWA nüh ma siekütse sa.

²³Thi Josef zhehlo vü nüh Bethel küüriehzi küze. (Atükhuvü anyujiwa nyo tü Luz ta ji).

²⁴Jüti küsa vü nyi küsü tü anyuji alievü shukütse küriehziri nüh ngu nü mari nüh ma vü, “Anyujiwa lovü tu na küsa lehkhuji küjo hiri kütsaluo, jüta thuoüji hiri nüh kümhie ta noh vü sanaveh ünüh,” ti küza.

²⁵Jüti küsa vü ma nüh anyuji lehkhuji küjo nü mari kütsa; thi mari nüh anyujiwa tü anyuchuwa nüh mari kürhiethe khehm, thitü mari nüh anyiwa thi ma tharuori nü küzem.

²⁶Thi anyiwa tü Hitra zhih vü tewa nü anyuji küsü sataji ma nyo tü Luz ta ji; nosü küju nga anyowa tü jüta vünüh peh wieveh.

²⁷ Manase tü Bet-shean thi ma nyuri, nyutü Tanak thi ma nyuri, nyutü Ibleam vü kürhori thi ma nyuri, nyutü Megiddo vü kürhori thi ma nyuri zhemja nüh sam; thitü Kananri thuoüji müja wiethuoh nüh azhih jüla rho wie.

²⁸Israelri tü rho kümzho mzho teru ünü mari tü Kananri vi küüroh wurie küsa, thitü zhemja kheh nüh sa.

²⁹ Thi Efraim tü Gezer vü kürho Kananri zhemja nüh sam; thitü Kananri tü mari azavü Gezer vü rho.

³⁰Zebulun tü Kitron vü kürhori nyutü Nahalot vü kürhori zhezhu müja nüh sam; thi Kananri tü mari azavü rho thi akükhu vü vithse taji wurie nü küüroh.

³¹Asher tü Ako vü kürhori nyutü Sidon vü kürhori, Alab vü kürhori nyutü Akzib, nyutü Rehob zhezhu müja nüh sam,

³²thitü azhih jüla kürhori Asherri tü Kananri azavü nyi rho; küpakenühnyunü mari tü mari zhezhu müja nüh saküm kenüh.

³³Naftali tü Bet-shemesh vü kürhori, nyutü Bet-anat vü kürhori zhezhu müja, thitü Kananri azavü nyi rho, azhih jüla kürhori; jüta wie ketünga Bet-shemesh thi Bet-anat vü vithse taji makeri’a nüh wurie küüroh.

³⁴Amorri nüh Danri tü küzhiho anyu vü zhe shele küzem, küpakenühnyunü mari tü kütake vü küüru mari nüh kheküm kenüh;

³⁵Amorri tü müjawiethuoh nüh Har-hereri vü, Aijalon vü thi Shalbim vü rho, thitü Josef tharuori ake tü mari vü peh müzho sheh, thi mari tü mari kükhu vü peh nü wurie küüroh.

³⁶Thi Amorri arüh tü Akrabim vünüh khru thi Sela wuovü tewa.