Read Pochuri Naga LESARI 14 Bible Online

LESARI 14 - Pochuri Naga bible

LESARI 14

¹Samson tü Timna vü tsuo, thinü Filistin tsavühri küsü ngu.

²Jüti küsa vü ma tü khru ma pa thi ma zah vü küza taji, “Hi tü Timna vünüh Filistin tsavühri küsü ngulie, tinü ma vi nü ehvüvüh küüsajie,” ti khuo.

³Thitü ma pa thi ma zah nüh ma vü, “Noh küshukürari nyimzari azhievü rülari küsü nga münyie, nyutü hiri anyiri azhievü münyie wiethuoh nü ahu mkütsi Filistinri vi avüvüh sa nti ülo?” ti küza. Thitü Samson nüh ma pa vü, “Ma vi hi tsüluo; küpakenühnyunü matü eh külo samhie shehm,” ti küza.

⁴Ma pa thi ma zah nüh jüma tü VÜWA nüh ta küsa müthsü nüh sa; küpakenühnyunü ma nüh Filistinri vü lehkhuji phahküveh kenüh. Jüma tsotho vü Filistinri nüh Israel nyiri vü kete küveh kenüh.

⁵Jüti küsa vü Samson tü ma pa thi ma zah sie nü Timna vü tsuo, thi ma tü Timna rhelivizhuh vü ru. Thinü halie, amiewuo kügahlaküsü khu nü ma vü joke ru;

⁶jüti küsa vü VÜWA Sietse tü ma vü khrasheh nü ru, thinü ma nüh amiewuowa tü nyihzhüzah küshohthuorie üta shohriejam; tü ma kevü zanyo küsü nga müvi. Thi ma nüh mowa sanüh ma pa vü nga thi ma zah vü nga müküza.

⁷Jüti sanü ma tü tsuo taji nyimzawa sie jühle; thinü nyimzawatü ma nyiepha sakümza sheh tsü.

⁸Rülo pike sevü ma vi nti shele ru; jüti küsa vü ma tü anato vü amie küsüwa no, thinü halie, awe shieji küsü thi awejuh ti tüla.

⁹Thi ma nüh ma ke nüh künyozhu nü tsamngu taji tsewa, thi ma tü ma pa thi ma zah vü ru nü pike vi masü tsü taji masü tü tsa. Thitü ma nüh awejuh wa tü amiewa satsa vünüh vi ti küsa müküza.

¹⁰Jüti sanü ma pa tü nyimzawa vü tsuo; thi vizari nüh sasati küsa üta Samson tü akhu küsü sa.

¹¹Thi anyiri nüh ma küngu vü ma nyina küsana küsa kenüh anyicherake sieru.

¹²Thinü Samson nüh mari vü, “Hi tü küümshi küsü nohri vü raküüna nyinü; mükütüküzü nohri nüh jüma tü mowa nüh akhu rülo vü rülo türü azhievü hi vü küzara thi phahtsüra thuoüji mürilothsü cherake thi akhuthsü chehrake ti hi nüh nohri vü tsü naveh;

¹³thitü nohri nüh jüma mowa nüh hi vü müküzara thuoüji mürilothsü chehrake thi akhuthsü chehrake ti vi hi tsü naveh,” ti küza. Thinü mari nüh ma vü, “Noh küümshi zhüwa hiri nüh küüna na küsa kenüh küza luo,” ti khuo.

¹⁴“Rekütsawa vünüh kütsavüh ngu. Kükhrawa vünüh zanyo kümngengu,” ti küza. Thitü rülo küche azhievü mari tü küümshi zhüwa müküzara nüh sam.

¹⁵Rülo müzüawa mari nüh Samson vüvüh vü, “Hiri nüh noh thi noh pa azheh ti anyih nüh müjie kütso vünüh küümshiwa hiri vü künaküsa kenüh noh vüpa müro luo. Noh tü hiri sakümkhuo üti hiri jiru ülo?” ti küza.

¹⁶Jüti küüza vü Samson vüvüh tü ma tüvü krie taji, “Noh tü hi mürhü küveh mpa wie, noh tü eh nyunyiri vü küümshi zhütsü, thi jüma tü mowa nüh noh tü hi vü nü müküza,” ti küza. Thinü ma nüh nyimzawa vü, “Halie, hi nüh eh pa thi eh zah vünga müküza, thi hi tü noh vü küza naveh ülo?” ti rületsü.

¹⁷Nyimzawa tü akhu sehkhe rülo vü ma tü krie; thinü rülo türüawa ma nüh nyimzawa vü küza, küpakenühnyunü nyimzawa nüh ma vü wurie kükhri kenüh. Jüti küsa vü nyimzawa nüh küümshiwa tü ma nyu nyiri vü küza.

¹⁸Thi anyuji jüma nyiri nüh rülo türüawa rünyi müjie kütu tüvüma vü küza, “Awejuh nyiehvü kümnge mowa lo? Amiewuowa nyiehvü kükhra mowa lo?” ti küza. Thinü ma nüh mari vü, “Nohri nüh ehmieshü awiezahwa sie müküüroh tüla, eh küümshi mphahzhura nüh sana nü” ti küza.

¹⁹Jüti küüza sevü VÜWA Sietse tü khra müzho sheh nü ma vü turu taji ma tü Ashkelon vü tsuo taji anyu jüma nyiri chehrake fethem, thi mari zhi küprüra akhu thsümnyiri vi ma küümshi phrahtekütsüri vü tsü. Jüti sam nü ma tü ma rüshu sheh taji ma pa zheh vü shele tewa.

²⁰Thi Samson vüvüh thuoüji ma vü anyi kümhie ma refüwa vü tsüm.