Read Pochuri Naga LESARI 16 Bible Online

LESARI 16 - Pochuri Naga bible

LESARI 16

¹Jüsevü Samson tü Gaza vü wa ünü küüphroküphrievüh küsü nguranü ma nüh ma vü tu.

²Jüti küsa vü Gazari vü, “Samson tü hala rupehvehthuoh,” ti küza, thinü mari nüh azhie jüma mükieshe nü arüza vü anyujiwa kheri vünüh ma huopeh. Rüza ajü mari tü zohm ti pehnü, “Hiri tü rüne atholeh küju huo nü ma fethem naveh,” ti sa.

³Thitü Samson tü tsotüla küju huopeh nü tsotüla vünüh ma tü sühra taji nyujiwa kheri mükhie thi tovüh künyi kheke taji arüpe nga thi küsate nga ti aveh lozhu khehm taji ma safü rügi vü sanü kha Hebron küzhiho alü vü tewa.

⁴Hama sevü ma tü Sorek nyuo vü nyimza küsü ma nyo Delilah ti küsawa lotewa.

⁵Thi Filistin avüri tü nyimzawa vü ru nü ma vü, “Ma künyi nü ma kükhra küjiwa tü khiela pehveh ünüh thi mokümjie vünüh hiri tü ma nyieh vü küchara sataji ma phehte nü ma kükhra saküzülanaveh ünüh aro phahtsüluo; jüta thuoüji hiri nyi küsüsü nüh rakasa müza küsüsü vi noh tsü naveh ünüh,” ti küza.

⁶Jüti küüza vü Delilah nüh Samson vü, “Münathe tü noh kükhraküjiwa tü khiela pehveh ünüh, thi mokümjie vünüh noh phehtenü wuori nüh noh kükhra saküzüla tsü naveh ünüh hi vü küzajie,” ti khuo.

⁷Thinü Samson nüh ma vü, “Mükütüküzü mari nüh lawihli kürüthe kümoma türü vi hi pheh thuoüji hi tü mükhra nüh satewanü küpari üta sam nathuoh,” ti rületsü.

⁸Jüti küüzavü Filistin avüri nüh lawihli kürüthe türü kümoma nyimzawa vü viru tsü, thi ma nüh jümari vi nü ma pheh.

⁹Jüma tsothovü nyimzawa nüh azheh küshothuo lovü anyiri sanü küühuosaveh. Thinü nyimzawa nüh ma vü, “Filistinri tü noh vü tsethuoh, Samson,” ti küza. Thitü ma nüh lawihli jümari tü anyih vünüh rünali kürothuo kümjie küthothuo jam. Jüti sanü ma küüthi kükhrawa tü müthsüra nüh sam.

¹⁰Jüti saküm vü Delilah nüh Samson vü, “Halie, noh nüh hi küriesasam nü hi vü akürie küzamthuoh; münathetü mokümjie noh phehtenaveh ünüh hi vü küza jie,” ti khuole.

¹¹Jüti kükhuo vü ma nüh ma vü, “Mükütüküzü mari nüh ali vi mkütsokrüsa kürüthe nüh vi hi phehtem thuoüji hi tü akükhramünyie nüh samnathuoh, thi anyi küpari üta satewa nathuoh,” ti küza.

¹²Jüti küüza vü Delilah nüh ali kürüthe vi nü jümari nüh maphehte taji ma vü, “Filistinri tü noh vü tsethuoh, Samson,” ti küza. Jüti küüzavü huoküveh nyiri tü azheh küshothuo lovü tüveh. Thitü ma nüh ma pie vü aliri tü alo kükhothuo kümjie küthothuo jam.

¹³Jüti saküm levü Delilah nüh Samson vü, “Khinyi küju nga noh tü hi küüriesam wiethuoh, thi hi vü rie nü küzam wiethuoh; tinü nohtü mokümjie vünüh phehte naveh ünüh hi vü küzajie,” ti khuo le. Jüta kükhuo vü ma nüh nyimzawa vü, “Mükütüküzü noh nüh eh lüsheh küphrirü türüri alo torü nü huke taji zetemthuoüji hi tü mükhra nüh samnathuoh, thi anyi küpari üta satewanathuoh,” ti küza.

¹⁴Jükenüh ma zehküveh vünüh Delilah nüh ma lüsheh küphrirütürüri vi alo torü. Jüti sanü nyimzawa nüh huke nü zetem taji ma vü, “Filistinri tü noh vü tsethuoh,” ti küza. Thitü ma tü ma küzeh vünüh sühra nü zete küsawa ti, alo thi ma küüritewa küthozhu jam.

¹⁵Jüti küsa vü nyimzawa nüh ma vü, “Mokümjie vünüh nohtü, Hi nü noh loveh ta phrahtera na lo, noh luoveh tü hi siemükütse? Noh nüh ha küchekeri hi küriesamthuoh, thi noh kükhraküjiwa tü khiela pehveh ünüh hi vü müküza nta,” ti küza.

¹⁶Thitü nyimzawa nüh rülo küsü nüh rülo küsü sevü azhüwurie nü ma küchü ünü ma kürho tü saküjakünya nü sü ntasa.

¹⁷Thinü ma nüh ma luoveh aveh vi nyimzawa vü küza taji mavü, “Alühse küsü nga eh lü vü müjie kükawie; küpakenühnyunü hi tü eh zah volo vünüh Saküüwuowa vü Nazaren wuleh, Saküüwuowa vü phrahzhuküm sakümthuoh kenüh. Mükütüküzü hi nüh ehlüsheh semthuoh üji eh kükhra tü hi jaküzem nathuoh, thi hi tü mükhra nüh sam nü anyi küpari üta samnathuoh,” ti küza.

¹⁸Thinü ma nüh ma müshe aveh vi küüza Delilah nüh küngura vü ma nüh Filistinra vüri jüti küze taji, “Küsükeri shuhru luo, küpakenühnyunü ma nüh ma müshe aveh vi hi vü küzasavehthuoh ünüh,” ti küza. Jüti küza küüze vü Filistinra vüri tü mari ake vü apesa vi nü shuhru.

¹⁹Nyimzawa nüh ma tü ma thüchi rügi vü küzeh nü nyi küsü jitaji ma nüh ma lü sheh küphrirü türüri sejam. Jüti sanü nyimzawa nüh ma saküna sheh tsü, thi ma kükhra tü ma jam.

²⁰Thinü nyimzawa nüh, “Filistinri tü noh vü tsethuoh, Samson,” ti küza. Jüti küüza vü ma tü ma küzeh vünüh josühra taji, “Küpa tsotho vü üta hi alievü wa naveh, thi hi mpa nüh hi sakümro naveh,” ti sa. Thi ma tü VÜWA nüh ma jaküm müthsünüh sam.

²¹Jüti küsa vü Filistinri nüh ma re nü ma notha künyi khrüzhumütü nü ma sie Gaza vü ru, jüti sanü sahwuo li nüh phehte taji küsizhuh vü ahie küüre sa.

²²Thitü ma lüsheh tü seküm sevü shozhu teru le.

²³Khinyi thuoüji Filistin vüri tü sezhuh nü mari nyiaza[2] vü küsahthuo kükhurü küji küsü sanü lozhe nti sa; küpakenühnyunü mari nüh, “Hiri nyiaza nüh Samson hiri mükünongüwa vi hiri ke vü thsekümthuoh kenüh,” ti küza.

²⁴Thi anyiri nüh ma küngu vü mari nyiaza siake; küpakenühnyunü mari nüh, “Hiri nyiaza nüh hiri mükünongüwa, hiri anyu küzoriewa, hiri khielo ta küfethewa vi hiri ke vü thsekümthuoh kenüh,” ti küza.

²⁵Thi mari luoveh tü lozhe ünü mari tü, “Samson ji luo, jüti sanü hiri kenüh saküüzhie luo,” ti küza. Jükenüh mari nüh küsizhehlovü nüh jizhuru nü mari tüvü nüh saküüzhie. Mari nüh ma tü atohvühri azhievü küütsie;

²⁶jüti küsa vü Samson nüh ma site küveh vizawa vü, “Hi tü azhehtohvühri raküüpa luo, jüti sanü hi tü jümari vü küürüngakeluo,” ti khuo.

²⁷Jüti kükhuo vü azheh lovü tü nyimpari thi nyimzari proveh; Filistinri aveh tü jüla pehveh, thi aluomuo rügi vü nyimpari thi nyimzari anyie küche Samson nüh saküüzhie no pehveh.

²⁸Jüti küsa vü Samson nüh VÜWA ji taji, “O VÜWA Saküüwuowa, hi müsheluo, hi nüh noh vü khuoveh, thi hi sakükhratsüluo, hi nüh noh vü khuoveh, küsükeri mpa, O Saküüwuowa, jüti sanü hitü eh notha künyi kenüh Filistinri vü amüthoh ra küsaluo,” ti küza.

²⁹Jüti sanü Samson tü azheh vüte küveh tohvüh küzhila künyimüzhe nü ma küüzho jümasü vü thse, ma ke azhie wuovü nüh küsüküchie thi ma ke azhu wuovü nüh küpawa küchie.

³⁰Jüti sanü Samson nüh, “Hi tü Filistinri sie küsüm luo,” ti küza. Thi ma tü ma kükhra aveh vü küngiewa; thinü azhehwavüri vü thi jüma lovü tü küvehri aveh vü puoru. Jüti sanü ma kürho vü ma nüh anyi küzothe nyieh vünüh ma sühle vü küzothe nüh küüzhi zothe.

³¹Thinü ma jienüri thi ma tharuo aveh turu nü ma vikhru taji Zorah thi Eshtaol azhievü ma pa Manoa rüku l