Read Pochuri Naga LESARI 18 Bible Online

LESARI 18 - Pochuri Naga bible

LESARI 18

¹Jüma tsothovü Israel vü kajiwa münyie. Thi jüma tsothovü Danri tü mari mpa rho naküsa kenüh aka küsü phahveh; küpakenühnyunü jü tsotho küju makeri’a nüh Israel azhievü aka müküngu wie kenüh.

²Jükenüh Danri tü küsara anyi münga mari akuoh küürüh ajü, Zorah thi Eshtaol vünüh azhihwa riehzi nü jüma zino, thi mari nüh mari vü, “Wa taji azhihwa zinoluo,” ti küza. Jütisanü mari tü Efraim küzhiho anyu Mika zheh vü ru nü jüla peh.

³Mari nüh Mika zheh vü küpeh vü vizawa tü Levi jikhi müjüra nü mari nüh wuochuh wuovü sühlewa taji ma vü, thawa nüh noh sie hala ru lo? Noh tü azhie hala mowa saveh lo? Hala noh küüroh mowalo? ti küna.

⁴Jüti küüna vü ma nüh mari vü, “Hakümjie thi hakümjie vünüh Mika nüh hi vü sa: Ma nüh hi müsanü hi tü ma navü sateru,” ti küza.

⁵Thinü mari nüh ma vü, “Hiri nüh noh vü khuoveh, ti nü Saküüwuowa vü kürü taji hiri nüh zetse tsezhukütsewa tü küüsara na ünü nyu nüh thsüra nthe lie,” ti küna.

⁶Jüti küüna vü navüwa nüh mari vü, “Nohri luoveh rüzih nü waluo. Nohri nüh wa nakütse zetse vü VÜWA notha kükhu vü pehveh,” ti rületsü.

⁷Jüsevü anyi müngari tü tsezhutewa nü Laish vü ru nü anyiri jüla küpehri, mota mari tü rho kato nü pehveh ünüh, Sidoniari üta, zohm ta thi küüjakünya münyie nüh, azhihwa vü zanyoküsü nga mükünyie müsanüh künyirhie pehra, thi mari tü mokümjie vünüh Sidonia vünüh letsuomthuoh ünüh thi nyi küsü vü nga sie refü müküveh ngu.

⁸Jüti sanü mari tü mari jienüri vü Zorah thi Eshtaol vü ru ünü mari jienüri nüh mari vü, “Nohri tü mowa zhühketsü lo?” ti küna.

⁹Jüta küüna vü mari nüh, “Sühra nü hiri khru mari sie saluo naveh; küpakenühnyunü hiri nüh azhihwa ngukümthuoh kenüh, thi halie, jüma tü lothuoh ünüh. Thi nohri tü zanyoküsü nga küsawa nyu ülo? Wa nti küsa kenüh müküzhike tüm nü alovü tu luo thi azhihwavi luo.

¹⁰Nohri küwa vü nohri tü müshemkümsü nyiri vü ru naveh. Azhihwatü müza; ah, Saküüwuowa nüh jüma vi nohri ke vü tsümthuoh, azhie jüma tü azhih vü zanyoküsü nga müküju müsa,” ti küza.

¹¹Thi Dan kuoh vü anyi müza türo rietsokrü vikevü nü Zorah thi Eshtaol vünüh tsezhutewa,

¹²thi tsekhru nü Judah vü Kiriat Jearim vünüh kürünape sa. Hama kenüh azhie jüma tü nosü küju nga Mahanedan, ma zhühnyo Dan kürünape, ta ji wieveh.

¹³Thi jüla nüh mari tü kari Efraim küzhiho anyu vü tewa, jüti sanü Mika zheh vü ru.

¹⁴Thinü nyi münga Laish anyu riehzi nta teküwari nüh mari jienüri vü, “Nohri tü azheh hamari lovü navüra küüzhuvüh, kükhurüvüküsü kükhrüke atso küsü thi kümlü atso küsü ti pehveh ta küsa müthsü ülo? Jükenüh khinyi nohri tü mowa sanaveh ünüh müsheluo,” ti küza.

¹⁵Thinü mari tü kürele nü jüla nüh Levi vizawa Mika zheh vü teru nü ma vü, ma tü mokümjie veh ünüh ti küna.

¹⁶Jüti küsa vü Danri anyi müza türo rietsokrü küvüri tü kheri lehpie vü tsiepeh;

¹⁷thi nyi münga azhih riehzi nta teküwari tü tekhru nü tu kükhurütsowa, navüra küüzhuvüh, kükhurüvü thi kümülü atsowa vi, thi navüwa thuoüji anyi müza türo arie tsokrü küvüri sie nü kheri lehpie vü tsiepeh.

¹⁸Thi hamari tü Mika zheh lovü tu taji kükhrüke atsowa, navüri küüzhuvühwa, kükhurüvühwa thi külü atsowa küvi vü, navüwa nüh mari vü, “Nohri tü mowa saveh lo?” ti küna.

¹⁹Thinü mari nüh ma vü, “Zoti peh, noh ke vi noh po küwute nü hiri vü nyira taji hiri vü apa küsü thi navü küsü saluo. Noh kenüh nyi küsü azhehvü navü küsa kümpha ünü nyutü akuoh küsü thi Israel tharuovü navü küsa kümpha khe na lo?” ti küza.

²⁰Jüti küüza vü navüwa luoveh tü alowietewa; ma nüh navüraküüzhuvühwa, kükhurüvühwa, kükhrüke atsowa ti vi nü nyiri azavü tsetewa.

²¹Jükenüh mari tü atsa küzahri, mieshümiesa thi tsokrüri mari tüvü thse taji kürele nü tewa.

²²Mari tü Mika zheh vünüh tse kiehtuo tewa ünü Mika zheh kütuohvü küpeh azhehri vünüh jizhu nü Danri phara.

²³Thi mari tü Danri vü zie taji mari vü küzüle nü Mika vü, “Mozhühnyowa nü noh tü riekhuo hakümjie sieru lo?” ti küza.

²⁴Thinü ma nüh, “Nohri tü hi nüh küsa nyiaza thi navüwa vi nü tewathuoh, thi hi tü mowa kükhe savehthuoh lo? Thinü noh tü mokenüh ‘Mozhühnyowa lo?’ ti künaveh lo?” ti küza.

²⁵Jüti küüzavü Danri nüh ma vü, “Rüküshuri nüh hiri rügivü müküru nüh sana küsa kenüh thi nohri kürho tü nohri zhehlorakürho sie thama küümie kenüh hiri azhievü nohri jikhi müküünaketümluo,” ti küza.

²⁶Jüti sanü Danri tü mari lehkhuji vü tewa; thi Mika kenüh mari tü kükhrale küngu vü ma tü sühle ma zheh vü tewa.

²⁷Mika nüh saküsa thi navü ma vü küpehwa Danri nüh vi nü Laish vü, anyi küüzoh thi küüjakünya mükünyie nyiri nüh mari müwiethem thi anyih vi anyujiwa tsomtü.

²⁸Thi jüma tü Sidon vünüh kiehtuo küm kenüh küvizhuri münyie nüh sam, thi mari tü nyi küsü vü nga kütsarü mükünyie kenüh. Jümatü Bet-rehof azhih anyuo vü. Thi mari nüh anyuji jüma sa le nü jüla rho.

²⁹Thi mari nüh anyuji jüma tü Dan, mari anyi, Israelri vü wuo kütsüwanyo vünüh Dan ti jitsü; thitü anyujiwa nyo tü tükhu vü thuoüji Laish ta ji.

³⁰Jüti sanü Danri tü kükhurüvühwa mari mpa makeri’a nüh sasa; thi Mosa atsa Gershonwa atsa Jonathan thi ma tsari tü mari zhihwa nyuraküsi müjie sateküwa küju nü Danri kuoh navüri sa.

³¹Jükenüh mari tü Saküüwuowa zheh Shilo vü küpeh küju nü Mika nüh küsa kükhurüvühwa jüla sa wie.